ޕެނަލްޓީގައި ޖަޕާން ހިތްދަތިކޮށްލުމަށް ފަހު ކްރޮއޭޝިއާ ކުއާޓާ ފައިނަލަށް

އަލް ވަކްރާ (ޑިސެމްބަރު 5) - ޕެނަލްޓީ ޝޫޓް އައުޓުގައި ޖަޕާންގެ މައްޗަށް 3-1 ގެ ނަތީޖާ އަކުން ކާމިޔާބު ހޯދައި ކާމިޔާބު ހޯދައި އެންމެ ފަހުގެ ރަނަރަފް ކްރޮއޭޝިއާ އިން ކުއާޓާ ފައިނަލަށް ދަތުރުކޮށްފި އެވެ.

މެޗުގެ ފުރިހަމަ ވަގުތު ނިމުނީ 1-1 ން އެއްވަރުވެގެންނެވެ. އިތުރު ވަގުތުގެ ދެހާފުގައި ވެސް ނަތީޖާ ބަދަލު ނުވުމުން ޖެހި ޕެނަލްޓީޝޫޓު އައުޓްގައި ތަރިއަކަށްވީ ކްރޮއޭޝިއާގެ ކީޕަރު ލިވަކޮވިޗް އެވެ. ޖަޕާނުން ފޮނުވާލި ހަތަރު ޕެނަލްޓީގެ ތެރެއިން ތިން ޕެނަލްޓީ އޭނާ ދިފާއު ކުރި އެވެ. ޖަޕާންގެ ވިންގާ ޓަކުމީ މިނަމިނޯ އާއި ކައޯރޫ މިޓޯމާ އަދި މާޔާ ޔޮޝީޑާ ފޮނުވާލި ޕެނަލްޓީތައް ލިވަކޮވިޗް ދިފާއު ކުރި އެވެ. ޖަޕާނަށް ކާމިޔާބުވީ ޓަކުމާ އަސާނޯ ޖެހި ޕެނަލްޓީ އެކަންޏެވެ.

މުޅި މެޗުގައި ވެސް ރަނގަޅު ކުޅުމެއް ދެއްކި ޖަޕާންގެ ކީޕަރު ޝުއިޗީ ގޮންޑާ އަށް ޕެނަލްޓީ ޝޫޓް އައުޓްގައި މާބޮޑު ކަމެއް ނުކުރެވުނެވެ. ކްރޮއޭޝިއާއިން ޖެހި ހަތަރު ޕެނަލްޓީގެ ތެރެއިން އެއް ޕެނަލްޓީ ވެސް އޭނާ އަށް ދިފާއު ނުކުރެވުނެވެ. ކްރޮއޭޝިއާގެ ލޮވްރޯ މަޔާ ޖެހި ޕެނަލްޓީ ނާކާމިޔާބުވީ ގޯލްގެ ދަނޑި އަށް އަމާޒުވުމުންނެވެ. ކްރޮއޭޝިއާގެ ޕެނަލްޓީތައް ވައްދާލީ ނިކޮލާ ވްލަސިޗް، މާސެލޯ ބްރޮޒޮވިޗް އަދި ކްރޮއޭޝިއާ މެޗުން މޮޅު ކަށަވަރުކޮށް ދިން ޕެނަލްޓީ ޖެހި މާރިއޯ ޕަލަޝިޗް އެވެ.

ބޯޅަ ކޮންޓްރޯލްކޮށްގެން ފުރަތަމަ ހާފުގައި ކްރޮއޭޝިއިާއިން އުފެއްދި ހަމަލާތަކުގައި އެ ޓީމަށް ކާމިޔާބު ނުވުމުން އޭގެ ފައިދާ ޖަޕާނުން ނެގީ މެޗުގެ 43 ވަނަ މިނެޓްގަ އެވެ.

ޔޮޝީޑާ ދިން ބޯޅައިން ޖަޕާނަށް ލީޑް ނަގައި ދިނީ ޑައިޒެން މައިޑާ އެވެ. ފުރަތަމަ ހާފު ނިމުމުގެ ކުރިން ޖަޕާނުން ލީޑް ނެގިނަމަވެސް ދެވަނަ ހާފުގައި ލީޑްގައި ހިފަހައްޓައެއް ނުލެވުނެވެ.

ދެވަނަ ހާފުގެ ކުރީކޮޅު ކްރޮއޭޝިއާއިން ނަތީޖާ ހަމަހަމަ ކުރި އެވެ. ޑެޔާން ލޮވްރެން ނަގައިދިން ބޯޅަ ބޮލުން ގޯލްގެ ތެރެއަށް ވައްދައިލައިގެން ލަނޑު ޖެހީ އީވާން ޕެރިޝިޗް އެވެ. އޭނާ ބޮލުން ޖެހި ބޯޅަ ވަނީ ގޯލްގެ ތިރީ ކަނަށެވެ.

މެޗުގެ ފުރިހަމަވަގުތު އެއްވަރުވެގެން ނިމުމުން ކުޅުނު އިތުރު ވަގުތުގެ ދެ ހާފުގެ ތެރެއިން ފުރަތަމަ ހާފުގައި ޖަޕާނުން ކުޅެން މަސައްކަތް ކުރީ ފަހަތުގައި ތިބެގެން ކައުންޓަ އެޓޭކް ފުރުސަތުގައި ކުރިއަށް އެރުމަށެވެ. އެ ހާފުގައި ކްރޮއޭޝިއާގެ ކޯޗު ޒަލްޓަކޯ ޑަލިޗް ވަނީ އޭނާގެ ކެޕްޓަން ލުކަ މޮޑްރިޗް ބަދަލުކޮށްފަ އެވެ. ރެއާލް މެޑްރިޑްގެ މިޑްފީލްޑަރުގެ ބަދަލުގައި ކުޅެން ނުކުތީ ލޮވްރޯ މަޔާ އެވެ.

ކުއާޓާ ފައިނަލުގައި ކްރޮއޭޝިއާ ނުކުންނާނީ ބްރެޒިލް އާއި ދެކުނު ކޮރެއާގެ ތެރެއިން ޓީމަކާ ދެކޮޅަށެވެ. ކޮރެއާ އާއި ބްރެޒިލްގެ މެޗު މިރޭ 12 ޖަހާއިރު އޮންނާނެ އެވެ.