އޮޅުވާލައިގެން ފައިސާ ހޯދާ ބޮޑު ނެޓްވޯކެއް އިންޑިއާ އިން އަތުލައިގެންފި

ނިއު ދިއްލީ (އޮކްޓޯބަރު 5) - އޮޅުވާލައިގެން ފައިސާ ހޯދަމުން ދިޔަ ބޮޑު ނެޓްވޯކެއްގައި ހިމެނޭ 750 މީހުން އިންޑިއާގެ ހުޅަނގުގެ ސިޓީއެއް ކަމަށްވާ ތޭން އިން ފުލުހުން އަތުލައިގެންފި އެވެ.

ފުލުހުން ބުނީ އޮޅުވާލައިގެން ފައިސާ ހޯދި ގްރޫޕުން ވަނީ އެމެރިކާ އިން ޓެކްސް ނުދައްކާ ބައެއް މީހުންގެ ނަންތައް ހޯދާ އެ މީހުންގެ އެކައުންޓް ތަފްސީލުތައް ހޯދުމަށް ބިރު ދައްކައިފަ އެވެ. މި ނެޓްވޯކުން އޮޅުވާލައިގެން ދުވާލަކު 150،000 ޑޮލަރު ހޯދަ އެވެ. ފުލުހުން ބުނީ މިއީ އިންޑިއާގެ ތާރީޚުގައި ވެސް އޮޅުވާލައިގެން އެންމެ ގިނަ ފައިސާ ހޯދަމުން ދިޔަ ނެޓްވޯކް ކަމަށެވެ.

ތޭންގެ ފުލުހުން ބުނީ މި މައްސަލައިގެ ތެރެއަށް އިތުރަށް ފީނުމަށް އެމެރިކާގެ އެފްބީއައިގެ އެހީ ހޯދަމުން އަންނަ ކަމަށެވެ.

ފުލުހުން ބުނީ ހައްޔަރު ކުރި މީހުންގެ ތެރޭން އޮޅުވާލައިގެން ފައިސާ ހޯދުމުގައި އިސްކޮށް އުޅުނީ ނުވަ މީހުން ކަމަށް ބެލެވޭ ކަމަށެވެ. އަދި އޮޅުވާލައިގެން ފައިސާ ހޯދި މީހުން އުޅުނީ އެމެރިކާގެ އިންޓާނަލް ރެވެނިއު ސާވިސްގެ މެންބަރުން ކަމަށް ހެދިގެން ކަމަށް ވެސް ފުލުހުން ބުންޏެވެ. އޮޅުވާލުމުގެ ބޮޑު ސްކީމް ހިންގި މީހުން ވަނީ ޓެކްސް ނުދައްކާ އެމެރިކާ މީހުން ލައްވާ ގިފްޓް ވައުޗާ ގަނުވާ އޭގައިވާ އައިޑީ ނަމްބަރު ހޯދުމަށް ފަހު އެ ނަމްބަރު ބޭނުންކޮށްގެން ވިޔަފާރި ވެސް ކޮށްފަ އެވެ.

ފުލުހުން ބުނީ އޮޅުވާލުމުގެ ސްކީމް ހިންގައިގެން ލިބުނު ފައިސާގެ 70 ޕަސެންޓް ލިބިފައިވަނީ އިންޑިއާގައި ތިބި މީހުންނަށް ކަމަށެވެ. އަދި އަނެއް 30 ޕަސެންޓް ލިބިފައިވަނީ މި ވައްކަން ކުރުމުގައި އެމެރިކާގައި ތިބި މީހުންނަށެވެ.

ތޭން ފުލުހުންގެ ކޮމިޝަނާ ޕަރަވީރު ސިންގް ނޫސްވެރިންނަށް ވިދާޅުވީ ހައްޔަރުކުރި މީހުންގެ އަތުން 851 ހާޑް ޑިސްކާއި ހައި-އެންޑް ސާވަރާއި އެހެން އިލެކްޓްރޯނިކް ސާމާނު ފެނިފައިވާ ކަމަށެވެ. އަދި މި އޮޕަރޭޝަނުގައި 200 ފުލުހުން ބައިވެރިވި ކަމަށް ވެސް އޭނާ ވިދާޅުވި އެވެ.

އެމެރިކާގެ ސްޓޭޓް ޑިޕާޓްމަންޓުގެ އޮފިޝަލަކު ވިދާޅުވީ އޮޅުވާލައިގެން ފައިސާ ހޯދި ބަޔަކާ ބެހޭ މައުލޫމާތު ލިބިފައިވާ ކަމަށާއި އެ ނެޓްވޯކުގައި އެމެރިކާ މީހުންގެ ބައިވެރިވުން ބަލަމުންދާ ކަމަށެވެ.