ޕެޓްރޯލާއި ޑީސަލްގެ އަގު ހެޔޮކޮށްފި

އެސްޓީއޯ އިން ވިއްކާ ޕެޓްރޯލާއި ޑީސަލްގެ އަގު މިއަދުން ފެށިގެން ހެޔޮކޮށްފި އެވެ.

މި ދެ ބާވަތުގެ އަގު ހެޔޮކޮށްފައި މި ވަނީ މި މަހުގެ ތިން ވަނަ ދުވަހު އަގު ބޮޑުކުރުމަށް ފަހުގަ އެވެ.

އެސްޓީއޯ އިން ބުނީ މިއަދުން ފެށިގެން ޑީސަލް ލިޓަރެއް ވިއްކާނީ 11.97ރ. އަށް ކަމަށެވެ. ޕެޓްރޯލް ލިޓަރެއްގެ އަގު ވަނީ 11.39ރ. އަށް ހެޔޮކޮށްފަ އެވެ.

މިއީ އެންމެ ފަހުން މި ދެ ބާވަތުގެ އަގަށް ގެނައި ބަދަލަށް ބަލާއިރު ޑީސަލް ލިޓަރަކުން 14 ލާރީގެ ހެޔޮވުމެކެވެ. އަދި ޕެޓްރޯލުން 10 ލާރީގެ ހެޔޮވުމެކެވެ.

އެންމެ ފަހުން ތެލުގެ އަގު ބޮޑުކުރި އިރު ޕެޓްރޯލް ލިޓަރެއްގެ އަގަކީ 11.49ރ. އެވެ. މިއީ ކުރިން ހުރި އަގާ އަޅާބަލާއިރު 70 ލާރީގެ ބޮޑުވުމެކެވެ. އަދި ޑީސަލް ލިޓަރެއް 12.11ރ. އަށް ބޮޑުކުރި އިރު އެއީ 50 ލާރީގެ ބޮޑުވުމެކެވެ.

ބައިނަލްއަގުވާމީ ބާޒާރުގައި އިއްޔެ ވަނީ ތެލުގެ އަގު ވަރަށް ބޮޑަށް ދަށަށް ގޮސްފަ އެވެ. ދުނިޔޭގެ މަސްރަހަށް އަންނަމުންދާ ބަދަލުތަކާ ހެދި ތެލުގެ ޑިމާންޑް ދަށްވާނެ ކަމަށް ލަފާކުރެވި އިއްޔެ ވަނީ ފަސް ޕަސެންޓް އަގު ވެއްޓިފަ އެވެ. މިއީ އެއް ދުވަހަކާ އަދި އެއް ހަފުތާގެ ތެރޭގައި ވެސް މި އަހަރު ތެލުގެ އަގު އެންމެ ބޮޑަށް ދަށްވި ފަހަރެވެ.