ޔޫއޭއީ މެޗުތަކުން ގައުމީ އަންހެން ޓީމަށް ކުރިއެރުން

އަންނަ އަންގާރަ ދުވަހު ނޭޕާލުގައި ފަށާ ސާފް ވިމެންސް ޗެމްޕިއަންޝިޕުގައި ވާދަކުރާ ގައުމީ އަންހެން ފުޓްބޯޅަ ޓީމަށް ޔޫއޭއީއާ ދެކޮޅަށް ކުޅުނު މެޗުތަކުން ރަނގަޅު ކުރިއެރުންތަކެއް ލިބިފައިވާ ކަމަށް ޓީމުން ބުނެފި އެވެ.

ފަހަަކަށް އައިސް ބައިނަލްއަގްވާމީ މުބާރާތްތަކުގައި ރަނގަޅު ނަތީޖާތަކެއް ނެރެމުން އަންނަ ގައުމީ އަންހެން ޓީމުން މި މަހުގެ ކުރީކޮޅުން ފެށިގެން ވަނީ ޔޫއޭއީގައި ރަނގަޅު ޓްރެއިނިން ކޭމްޕެއް ފުރިހަމަ ކޮށްފަ އެވެ. ޓްރެއިނިން ކޭމްޕްގެ ތެރެއިން ދެ މެޗެއް ވަނީ ޔޫއޭއީގެ ގައުމީ ޓީމާ ދެކޮޅަށް ކުޅެފަ އެވެ.

ފުރަތަމަ މެޗުގައި މި މަހު ވަނަ ދުވަހު ޔޫއޭއީ އަތުން ރާއްޖެ ވަނީ 2-0 އިން ބަލިވެފަ އެވެ. އެކަމަކު އޭގެ ތިން ދުވަސް ފަހުން ވަނީ ޔޫއޭއީއާ 1-1 އިން އެއްވަރުކޮށްފަ އެވެ. އެ މެޗުގައި ރާއްޖޭގެ ޓީމުން ވަނީ ފުރަތަމަ މެޗުގައި ހެދުނު ގޯސްތައް ރަނގަޅުކޮށް މޮޅު ކުޅުމެއް ދައްކައިފަ އެވެ. ޔޫއޭއީ ކޮޅަށް ރާއްޖޭގެ ލަނޑު ޖެހީ މަރިޔަމް ރިފާ އެވެ.

ގައުމީ ޓީމުގެ ކޯޗު މުހައްމަދު އާތިފް (އާތީ) ބުނީ މި ދެ މެޗުން ހާސިލްކުރެވުނު ކަންތައްތަކާ އެކު މުބާރާތަށް ޓީމު ދާނީ ރަނގަޅު ރޫހެއްގައި ކަމަށެވެ.

"ފުރަތަމަ މެޗަށް ވުރެން ދެ ވަނަ މެޗުގައި ހުރިހާ ގޮތަކުން ކުޅުންތެރިން މޮޅަށް ކުޅުނު. އިތުރަށް ކުރިއަށް ދިއުމަށް ހުރިހާ ކުޅުންތެރިންނަށް ހިތްވަރު ލިބިއްޖެ. ގޯލު ޖަހަން ވެސް ގިނަ ފުރުސަތުތަކެއް ތަނަވަސްކުރެވުނު. ކޮންފިޑެންސް ލެވެލް ވެސް މަތިކުރެވިއްޖެ. އިންޝާﷲ އަމާޒާ ހަމައަށް ވާސިލްވެވޭނެ،" އޭނާ ބުންޏެވެ.

ޔޫއޭއީއާ ދެކޮޅަށް ކުޅުނު ފުރަތަމަ މެޗުގައި ގައުމީ ޓީމުގެ ޑިފެންޑަރު ސަންފާ އިބްރާހިމްގެ ލިގަމެންޓް ވަނީ ހަލާކުވެފަ އެވެ. މުބާރާތުގައި ސަންފާ އަށް ނުކުޅެވޭއިރު، ގައުމީ ޓީމުގެ އަނެއް ޑިފެންޑަރު އައިމިނަތު ޒާހިޔާ (ޒެޑޭ) ވެސް ހުރީ ބަހްރޭނާ ދެކޮޅަށް ކުޅުނު މެޗެއްގައި ލިބުނު އަނިޔާއަކާ ގުޅިގެން ކުޅުމާ ދުރުގަ އެވެ.

މީގެ ކުރިން "މިހާރަ"ށް ދިން އިންޓަވިއުއެއްގައި ގައުމީ ޓީމުގެ ކޯޗު އާތީ ބުނީ މި މުބާރާތުގެ އަމާޒަކީ އެންމެ ކުޑަމިނުން ފައިނަލުގައި ކުޅެލުން ކަމަށެވެ. އެންމެ ފަހުން އޮތް ސާފް މުބާރާތުގައި ރާއްޖޭގެ އަންހެން ޓީމު ވަނީ ސެމީ ފައިނަލުގައި ކުޅެފަ އެވެ. ފަހަކަށް އައިސް ޓީމު ހޯދަމުން އަންނަ ކުރިއެރުމަށް ބަލާއިރު މި ފަހަރުގެ ސާފްގައި ރަނގަޅު ހިސާބަކަށް ދެވޭނެ ކަމަށް އުއްމީދުކުރާ ކަމަށް އާތީ ވަނީ ބުނެފަ އެވެ.

މި ފަހަރުގެ ސާފަށް ފަހު އާތީ އަންހެން ޓީމުގެ މަގާމު ދޫކޮށް އެންމެ ފަހުގެ ލީގު ޗެމްޕިއަން ޓީސީ ސްޕޯޓްސް ކްލަބްގެ ކޯޗުކަމާ ހަވާލުވާނެ އެވެ. އޭނާގެ އަމާޒަކީ އަންހެން ޓީމާ އެކު ރަނގަޅު ކާމިޔާބަކަށް ފަހު އެ ޓީމާ ވަކިވުން ކަމަށާއި އަބަދުވެސް އެންމެ އިސްކަމެއްދޭނީ އެ ވަގުތެއްގައި ކުރަން ހުންނަ މަސައްކަތަށް ކަމަށް ބުންޏެވެ.

ސާފްގައި މި ފަހަރު ރާއްޖެ ހިމެނެނީ އިންޑިއާ އާއި ސްރީލަންކާއާ އެއް ގްރޫޕެއްގަ އެވެ. އަންނަ ބުދަ ދުވަހު ރާއްޖެ ފުރަތަމަ މެޗުގައި ކުޅޭނީ އިންޑިއާއާ އެވެ. ދެ ވަނަ މެޗުގައި ހުކުރު ދުވަހު ސްރީލަންކާއާ ބައްދަލުކުރާނެ އެވެ.