ރަޝިއާ އިން ޔޫތު ވިމެންސް ސާފް ޗެމްޕިއަންޝިޕުގައި ވާދަކުރަނީ

ހަނގުރާމައިގެ ސަބަބުން ފީފާ އާއި ޔުއެފާ އިން ސަސްޕެންޑްކޮށްފައިވާ ރަޝިއާ އިން، ދެކުނު އޭޝިއާގެ 17 އަހަރުން ދަށުގެ އަންހެން ފުޓްބޯޅަ މުބާރާތުގައި ބައިވެރިވާން ނިންމާފައިވާ ކަމަށް ރޮއިޓާސް އިން ރިޕޯޓްކޮށްފި އެވެ.

ބަންގްލަދޭޝްގެ ވެރިރަށް ޑާކާގައި އަންނަ މާޗު 20-28 އަށް ބާއްވާ 17 އަހަރުން ދަށުގެ ވިމެންސް ސާފް ޗެމްޕިއަންޝިޕުގައި ރަޝިއާ އިން ބައިވެރިވާކަން އިއުލާންކޮށްފައިވަނީ ސޯޝަލް މީޑިއާގަ އެވެ.

މިކަމުގައި ސައުތު އޭޝިއަން ފުޓްބޯލް ފެޑެރޭޝަން (ސާފް) އާއި ފީފާގެ ބަހެއް އަދި ނުލިބޭ ކަމަށް ރޮއިޓާސް އިން ބުނެ އެވެ.

ފީފާ އާއި ޔުއެފާ އިން ރަޝިއާ ސަސްޕެންޑް ކުރީ މިދިޔަ އަހަރުގެ ފެބްރުއަރީ މަހު ޔޫކްރޭނާ ދެކޮޅަށް އެ ގައުމުން ހަނގުރާމަ ފެށުމުންނެވެ. އޭގެ ސަބަބުން މިދިޔަ އަހަރުގެ ވޯލްޑް ކަޕުގައި ވެސް ރަޝިއާ އަށް ބައިވެރިނުވެވުނެވެ.

ރަޝިއާގެ ގައުމީ ޓީމުތަކާއި ކްލަބްތަކަށް ބައިނަލްއަގްވާމީ ފުރުސަތުތައް ހޯދައިދިނުމުގެ ގޮތުން، މިވަގުތަށް އޭޝިއަން ފުޓްބޯލް ކޮންފެޑެރޭޝަން (އޭއެފްސީ) އަށް އަށް ބަދަލުވުމުގެ ވިސްނުން އެ ގައުމުގެ ފުޓްބޯޅަ އެސޯސިއޭޝަނުން ގެންގުޅެ އެވެ.

އެކަމަކު ރަޝިއާ އަށް ފުރުސަތު ދީފި ނަމަ އޭއެފްސީ އާއި ސާފްއާ ދެކޮޅަށް ފީފާ އިން ފިޔަވަޅު އެޅުމުގެ ފުރުސަތު އެބައޮތެވެ.

މި މުބާރާތުގައި ދެކުނު އޭޝިއާ އިން ބައިވެރިވަނީ އިންޑިއާ، ނޭޕާލް، ބޫޓާން އަދި ބަންގްލަދޭޝް އެވެ. ރާއްޖެ ބައިވެރިނުވެ އެވެ.