ލަންކާ ހަމަނުޖެހުމުން އަންހެން ޓީމު އިންޑިއާއާ ދެކޮޅަށް

ގައުމީ އަންހެން ފުޓްބޯޅަ ޓީމުން އިންޑިއާއާ އެކު ބައިނަލްއަގްވާމީ އެކުވެރިކަމުގެ ދެ މެޗު ކުޅޭ ގޮތަށް ހަމަޖެހިއްޖެ އެވެ.

މި ދެ މެޗު އޮންނާނީ މި މަހުގެ 30 ވަނަ ދުވަހާއި، އަންނަ ޖެނުއަރީ މަހުގެ 2 ވަނަ ދުވަހު އިންޑިއާގެ ބެންގަލޫރުގަ އެވެ.

އެފްއޭއެމުން އެންމެ ފުރަތަމަ ރޭވީ ސްރީ ލަންކާއާ ދެކޮޅަށް ކުޅޭށެވެ. އެކަމަކު އެކަން ހަމަޖެހޭ ގޮތް ނުވުމުން އިންޑިއާއާ ކުޅޭ ގޮތަށް ބަދަލުކުރީ އެވެ.

ކޯޗު މުހައްމަދު ނިޒާމް (ނިޒާމްބެ) ބުނީ ލަންކާއާ އެކު ކުޅެން ބޭނުންވީ ވާދަވެރިކޮށް ކުޅެ ރަނގަޅު ފައިޓެއް ދެވޭނެތީ ކަމަށެވެ. އެކަމަކު އިންޑިއާ އަކީ ރާއްޖެއާ ބަލާއިރު މާބޮޑަށް ވެސް ވަރުގަދަ ގައުމަކަށްވާތީ އެ ޓީމާ ދެކޮޅަށް އެގޮތަށް ކުޅުމަކީ އުނދަގޫ ކަމަކަށްވާނެ އެވެ.

"އެހެންވެ މުޅި ޕްލޭން ބަދަލުކުރަން ޖެހިފައި މިއޮތީ. ޓީމު ތައްޔާރުވަމުން އައީ ލަންކާއާ ދެކޮޅަށް ކުޅެން،" ނިޒާމްބެ ބުންޏެވެ.

ފީފާގެ އުސޫލުގެ ދަށުން އަންހެން ޓީމު އަހަރަކު މަދުވެގެން ބައިނަލްއަގްވާމީ ހަތަރު މެޗު ކުޅެން ޖެހެ އެވެ. އެހެންވެ ހަމަޖެހެން އޮތް ކޮންމެ ގައުމަކާ ދެކޮޅަށް ވިޔަސް މެޗު ރާވަން އެފްއޭއެމް އަށް މަޖުބޫރެވެ.

އަންހެން ޓީމު އަންނަނީ މިދިޔަ އޮކްޓޫބަރު މަހު ނޭޕާލުގައި އޮތް ސާފް ޗެމްޕިއަންޝިޕަށް ފަހު ގަވާއިދުން ޕްރެކްޓިސްކުރަމުންނެވެ. އެ މުބާރާތުގެ ގްރޫޕް ސްޓޭޖުގައި ރާއްޖެ ވަނީ ލަންކާ އާއި ނޭޕާލާއި، ބޫޓާން އަތުން ބަލިވެ ގްރޫޕް ސްޓޭޖުން ކަޓައިފަ އެވެ.

އަންހެން ފުޓްބޯޅައިގައި ރާއްޖެ އަންނަނީ ލަންކާ އަށް ރަނގަޅު ފައިޓެއް ދެމުންނެވެ. އެގޮތުން މި އަހަރުގެ ސާފް ޗެމްޕިއަންޝިޕުގައި ބަލިވީ 1-0 އިންނެވެ. އޭގެ ކުރިން 2019 ވަނަ އަހަރު ބަލިވީ 2-0 އިންނެވެ. އެކަމަކު އިންޑިއާއާ ވާދަކުރުމަކީ އަދި އުނދަގޫ ކަމެކެވެ. އެގޮތުން 2022 ގައި 9-0 އިން ބަލިވިއިރު 2019 ގައި ބަލިވީ 5-0 އިންނެވެ.