ޓްރެއަލްއިން ފެއިލްވި ކުޅުންތެރިންގެ ބަދަލުގައި ވެލެންސިއާއިން ބިދޭސީންގެ ޖާގަތަށް ފުރިހަމަކޮށްފި

ވެލެންސިއާގެ ޓްރެއަލްގައި ބައިވެރިވާން އަމިއްލަ ހަރަދުގައި ރާއްޖެ އައި ކުޅުންތެރިންގެ ފެންވަރު ނެތުމުން ސޮއި ނުކުރުވައި ދޫކޮށްލި ނައިޖީރިއާގެ ދެ ކުޅުންތެރިންގެ ބަދަލުގައި ގެނައި ކުޅުންތެރިންނާ އެކު ވެލެންސިއާގެ ބިދޭސީ ކުޅުންތެރިންގެ ޖާގަތައް ފުރިހަމަކޮށްފި އެވެ.

މި ސީޒަނުގައި ކޮންމެ ކްލަބެއްގައި ޖެހޭނީ ބިދޭސީ ހަތަރު ކުޅުންތެރިންނެވެ. އޭގެ ތެރެއިން އެއް ކުޅުންތެރިޔަކީ އޭޝިއާގެ ގައުމަކަށް ނިސްބަތްވާ ކުޅުންތެރިޔަކަށް ވާން ޖެހޭނެ އެވެ.

އޭޝިއާގެ ކުޅުންތެރިޔާގެ ޖާގަ އަށް ވެލެންސިއާއިން ގެނައީ ކިރިގިސްތާނުގެ ޑިފެންޑަރެއް ކަމަށްވާ ދަވްރޯންބެކް އަބްދުވަކޯލްޕޯވް އެވެ.

އަނެއް ތިން ޖާގަ އަށް އެ ކްލަބުން ސޮއި ކުރުވީ ސްޕެއިންގެ ފޯވާޑަކާއި މޯލްޑޯވާގެ ގޯލް ކީޕަރަކާއި މިސްރުގެ ޑިފެންޑަރެކެވެ.

ވެލެންސިއާގެ ޓްރެއަލް އަށް އައި ނައިޖީރިއާގެ ދެ ކުޅުންތެރިންގެ މައްސަލައެއް ފެންމަތިވީ ކްލަބަށް އޮޅުވާލައިގެން ފިލުމުންނެވެ.

އަމިއްލަ އަށް ޓްރެއަލް އަށް އަންނަ ކުޅުންތެރިންގެ އެޖެންޓުންނާ އެކު ވެލެންސިއާގެ އިތުރުން ރާއްޖޭގެ އެހެން ކްލަބްތަކުން އަބަދުވެސް އެއްބަސް ވަނީ، އެ ކުޅުންތެރިޔާގެ ފެންވަރު ރަނގަޅުނަމަ، ރާއްޖެ އައުމަށް ކުރި ދަތުރުގެ ހަރަދަށް ހޭދަވި ފައިސާ ރީއިމްބާސް ކޮށްދޭ އުސޫލުންނެވެ.

ވެލެންސިއާއިން ބުނީ ނައިޖީރިއާގެ ކުޅުންތެރިންގެ ފެންވަރު ދަށްކަމުން އެ ކުޅުންތެރިން އަނބުރާ ގައުމަށް ދާން ހުރިހާ އިންތިޒާމެއް ކްލަބުން ހަމަޖައްސާފައި ވާނެ ކަމަށެވެ. އެކަމަކު ފުރަށް އެއާޕޯޓަށް ގޮސް ތިބި ކަމަށް ބުނެ ކްލަބަށް އޮޅުވާލައިގެން ފިލި މައްސަލަ އެ ކްލަބުން ވަނީ އިމިގްރޭޝަނަށް ހުށަހަޅައިފަ އެވެ.

އޭގެ ތެރެއިން އެއް ކުޅުންތެރިޔަކު ރަށުތެރެއިން މަސައްކަތަކެއް ހޯދައިގެން، މާލެ ދަތުރުކުރާ ބޯޓެއްގެ ފަޅުވެރިޔެއްގެ ގޮތުގައި މަސައްކަތްކުރަމުންދާކަމަށް "އަސްލު" ޓީވީން ރިޕޯޓް ކުރި އެވެ.

އެންމެ ފަހުގެ ސީޒަނުގައި ވެލެންސިއާ އޮތީ ފީފާގެ ޓްރާންސްފާ ބޭންއެއް ގަ އެވެ. އެއީ ކުރިން އެ ޓީމަށް ކުޅުނު ސްޕެއިންގެ ބޯހަސް މާޓިން އަށް ދޭން ޖެހޭ މުސާރަ ނުދީ އޮތުމުންނެވެ. އެ ކްލަބްގެ މިހާރުގެ ލީޑާޝިޕުން ވަނީ އެއް މިލިއަން ރުފިޔާގގެ ޓްރާންސެކްޝަނެއް ފީފާ މެދުވެރިކޮށް ހަދައި ބޯހަސްގެ މުސާރަ ހަލާސްކޮށްފަ އެވެ.

މި ސީޒަނުގައި ވެސް ވެލެންސިއާގައި އޮތީ ޒުވާން ސްކޮޑެކެވެ. އޭގެ ތެރޭގައި ސްކޫލު އުމުރުފުރާތަކުގެ ކުޅުންތެރިން ގިނަ އެވެ. މިހާރު ލަންކާގައި ކުރިއަށްދާ 17 އަހަރުންދަށުގެ ސާފް ޗެމްޕިއަންޝިޕަށް އެކުލަވާލި ރާއްޖޭގެ ކުޅުންތެރިންގެ ސްކޮޑްގައި ވެސް ހިމެނޭ މުހިންމު ކުޅުންތެރިންނަކީ ވެލެންސިއާގެ ސީނިއާ ޓީމުގައި ހިމެނޭ ކުޅުންތެރިންނެވެ.

ވެލެންސިއާއިން ލީގުގައި ކުޅޭ ފުރަތަމަ މެޗުގައި މާދަމާ ރޭ ނުކުންނާނީ ގްރީން ސްޓްރީޓްސްއާ ދެކޮޅަށެވެ.