އޮލިމްޕިކްސް ކޮލިފައިންގައި ރާއްޖެ ވާދަކުރާނީ މިޔަންމާ، އީރާން އަދި ބަންގްލަދޭޝްއާ

އަންނަ އަހަރު ފްރާންސްގެ ޕެރިހުގައި ބާއްވާ އޮލިމްޕިކްސް އަށް ކޮލިފައިވުމަށް ކުޅޭ އޭޝިއާގެ ކޮލިފައިން މުބާރާތުގައި ރާއްޖޭގެ އަންހެން ގައުމީ ފުޓްބޯޅަ ޓީމު، މިޔަންމާ އާއި އީރާން އަދި ބަންގްލަދޭޝް އާ އެއް ގުރޫޕެއްގައި ހިމެނިއްޖެ އެވެ.

ފީފާ ރޭންކިން ގައި ރާއްޖެ އޮތީ 159 ވަނައިގަ އެވެ. ކޮލިފައިންގެ ފުރަތަމަ ބުރުގެ ގުރޫޕް ބީ ގައި ރާއްޖެ އެންމެ ފުރަތަމަ ނުކުންނާނީ މިޔަންމާއާ ދެކޮޅަށެވެ. މިޔަންމާ އަކީ މި ގުރޫޕުގައި ހިމެނޭ ގައުމުތަކުގެ ތެރެއިން ފީފާ ރޭންކިންގެ އެންމެ ކުރީގައި އޮތް ގައުމެވެ. އެޓީމު އޮތީ ރޭންކިންގެ 48 ވަނައިގަ އެވެ.

ދެ ވަނަ މެޗުގައި ރާއްޖެ ނުކުންނާނީ ރޭންކިންގެ 68 ވަނައިގައި އޮތް އީރާނާ ދެކޮޅަށެވެ. އަދި ފަހު މެޗުގައި ނުކުންނާނީ ބަންގްލަދޭޝްއާ ދެކޮޅަށެވެ.

ފީފާ ރޭންކިންގެ 140 ވަނައިގައި އޮތް ބަންގްލަދޭޝް އަކީ ހުރިހާ މެޗަކުން މޮޅުވެ މިދިޔަ އަހަރު ބޭއްވި އަންހެނުންގެ ސާފް ޗެމްޕިއަންޝިޕް ކާމިޔާބު ކުރި ގައުމެވެ. ބަންގްލަދޭޝް ވާދަކުރި ގުރޫޕުގައި ރާއްޖެ އާއި އިންޑިއާ ވެސް ހިމެނުނެވެ.

މި ގުރޫޕުގެ މެޗްތައް ހޯސްޓު ކުރާ ގައުމެއް އޭއެފްސީ އިން އަދި ނުނިންމަ އެވެ. ކުޅުން އޮންނާނީ އޭޕްރީލް 3 އިން 11 އަށެވެ.

ދެހާސް ވިހި ވަނަ އަހަރުގެ މުބާރާތަށް ކޮލިފައިވާން 2018 ވަނަ އަހަރު ވާދަކުރަން ޖެހުނު ގްރޫޕުގައި ހިމެނެނީ މުޅިން ވެސް ރޭންކިންގެ 100 އިން މަތީގެ ގައުމުތަކެވެ. ނަމަވެސް އެ އަހަރު ރާއްޖޭގެ ޓީމުން ރަނގަޅު ވާދައެއްކޮށް ކުރިއެރުން ހޯދި އެވެ.

އަންނަ އަހަރުގެ އޮލިމްޕިކްސް ގެ އަންހެން ފުޓްބޯޅަ މުބާރާތުން އޭޝިއާ އަށް ލިބެނީ ދެ ޖާގަ އެވެ. ކޮލިފައިން މުބާރާތް ތިން ބުރަކަށް ބެހޭ އިރު، ފީފާ ރޭންކިންގައި އޭޝިއާގެ އެންމެ ކުރީގައި އޮތް ފަސް ގައުމު ވާދަކުރާނީ ދެ ވަނަ ބުރުން ފެށިގެންނެވެ. ދެ ވަނަ ބުރަށް ދެން ހޮވޭނީ، ފުރަތަމަ ބުރުގެ ހަތް ގުރޫޕުން ވެސް އެއް ވަނަ ހޯދާ ގައުމުތަކެވެ.

ދެ ވަނަ ބުރުގައި ވާދަކުރާ ޓީމުތައް ތިން ގުރޫޕަކަށް ބަހާލެވޭނެ އެވެ. ތިން ގުރޫޕުން ވެސް އެއް ވަނަ ހޯދާ ގައުމުތަކުގެ އިތުރުން ގުރޫޕުގެ ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ގައުމަކަށް، ފަހު ބުރުން ޖާގަ ލިބޭނެ އެވެ. އޮލިމްޕިކް މުބާރާތަށް ކޮލިފައި ވާނީ ފައިނަލް ބުރުގައި ކުޅޭ ދެ ފައިނަލުން މޮޅުވާ ދެ ގައުމެކެވެ.