ބަޣާވާތް ކުރި ރޭ އުރުދުޣާން ހައްޔަރު ކުރަން އުޅުނު ސިފައިން އަތުލައިގެންފި

އަންކާރާ (އޮގަސްޓް 1) - ތުރުކީގައި ބަޣާވާތް ކުރި ރޭ ރައީސް ރަޖަބު ތައްޔިބު އުރުދުޣާން ހައްޔަރު ކުރަން އުޅުނު ސިފައިންގެ ގްރޫޕް ހައްޔަރުކޮށްފި އެވެ.

ބަޣާވާތް ކުރި ރޭ ރައީސް އުރުދުޣާން ހުންނެވީ ތުރުކީގެ ހުޅަނގު ދެކުނުގެ ރިސޯޓެއްގައި ޗުއްޓީގަ އެވެ. ނަމަވެސް އުރުދުޣާން ހައްޔަރު ކުރަން ސިފައިން ދިއުމުގެ ކުރިން އެމަނިކުފާން ވަނީ އެ ރިސޯޓުން ވަޑައިގެންފަ އެވެ.

ރިޕޯޓްތައް ބުނި ގޮތުގައި، އުރުދުޣާން ހައްޔަރު ކުރަން އުޅުނު ސިފައިންގެ ގްރޫޕް ޖަންގަލީގެ ތެރޭން ފެނިފައި ވަނީ ޝިކާރަ ކުރަން އުޅުނު ބަޔަކަށެވެ. އުރުދުޣާން އުޅުނު މީހުން ހައްޔަރު ކުރަން އުޅުމުގެ ތެރޭގައި ވަނީ ބަޑީގެ ހަމަލާތަކެއް ވެސް ބަދަލުކޮށްފަ އެވެ. ނަމަވެސް އެއްވެސް މީހަކަށް ގެއްލުމެއް ނުލިބެ އެވެ. އުރުދުޣާން ހައްޔަރުކުރަން އުޅުނު ސިފައިން ހައްޔަރު ކުރީ ސިފައިންގެ ޚާއްސަ ޔުނިޓުގެ މީހުންނެވެ. އާދިއްތަ ދުވަހާއި ހޯމަ ދުވަހު ވަނީ 11 ވަރަކަށް ސިފައިން ހައްޔަރުކޮށްފަ އެވެ. ސިފައިންގެ އިސް މީހުންގެ ތެރޭން ވެސް ބަޣާވާތުގައި ބައިވެރިވި މީހުން ހައްޔަރުކޮށް ދައުވާ ކުރަން ވަނީ ނިންމައިފަ އެވެ.

ބަޣާވާތް ކުރި ރޭ އުރުދުޣާން ވަނީ މޯބައިލް ފޯނެއް މެދުވެރިކޮށް ވާހަކަ ދައްކަވައިފަ އެވެ. އުރުދުޣާން ވިދާޅުވެފައި ވަނީ އޭނާގެ ފުރާނަ ސަލާމަތްވީ ކިރިޔާ ކަމަށެވެ.

ބަޣާވާތުގައި ބައިވެރިވި މީހުން ހޯދުމަށް ތުރުކީގައި ވަނީ ވަރަށް ބޮޑު އޮޕަރޭޝަނެއް ފަށައިފަ އެވެ. ސިފައިންގެ ތެރޭން އެތައް ބަޔަކު ވަޒީފާ އިން ވަކިކޮށް އަދި ސަރުކާރުގެ އެހެން މުއައްސަސާތަކުން ވެސް ވަނީ ގިނަ އަދަދެއްގެ ބަޔަކު ކަނޑާލައިފަ އެވެ.