އިންތިހާބަށް ވަގުތު އޮއްވާ ހައި ކޯޓުން ޔާމީން މިނިވަން ވާނެ: ވަކީލުން

މި އަހަރުގެ ރިޔާސީ އިންތިހާބަށް ވަގުތު އޮއްވައި ހައި ކޯޓުން ކުރީގެ ރައީސް އަބްދުﷲ ޔާމީން މިނިވަން ކުރާނެ ކަމުގެ ޔަގީންކަން އެބައޮތް ކަމަށް އެ މަނިކުފާނުގެ ގާނޫނީ ވަކީލުންގެ ޓީމުން މިއަދު ބުނެފި އެވެ.

ވ. އާރަށް މައްސަލާގައި ރިޝްވަތާއި މަނީ ލޯންޑްރިންގެ ކުށުގައި ޔާމީން 11 އަހަރަށް ޖަލަށްލައި، ފަސް މިލިއަން ޑޮލަރުން ޖޫރިމަނާ ކުރަން ކްރިމިނަލް ކޯޓުން މިދިޔަ އަހަރުގެ ޑިސެމްބަރު މަހު ވަނީ ހުކުމްކޮށްފަ އެވެ. އެ ދުވަހު އެ މަނިކުފާނު ޖަލަށް ލާފައިވާއިރު، އެ ހުކުމް އިސްތިއުނާފު ކުރަން ޔާމީންގެ ފަރާތްޕުޅުން އިއްޔެ ވަނީ ހައި ކޯޓަށް ހުށަހަޅުއްވައިފަ އެވެ.

ޔާމީންގެ ވަކީލުންގެ ޓީމުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޓީމުގައި އިސްކޮށް ހަރަކާތްތެރިވާ ކުރީގެ ނައިބު ރައީސް ޑރ. މުހައްމަދު ޖަމީލް ވިދާޅުވީ ގާނޫނީ ގޮތުން ބޮޑެތި ގޯސްތަކެއް ހަދާފައިވާ ކަމަށާއި ކުރި ދައުވާ އާއި ލިބުނު ހެކިތަކާ ދިމާނުވާ ކަމަށެވެ. އަދި މަތީ ކޯޓުތަކުގައި ނަޒާހަތްތެރި ފަނޑިޔާރުން އެބަ ތިއްބެވި ކަމަށާއި އެހެންވެ، ރިޔާސީ އިންތިހާބަށް ވަގުތު އޮއްވައި އެ ކޯޓުން ޖަލު ހުކުމް ބާތިލް ކުރުމުގެ އުއްމީދު އެބައޮތް ޖަމީލް ވިދާޅުވި އެވެ.

"ވަރަށް ޔަގީންކަން އެބައޮތް މިހާރު މި އޮތް އިިންތިހާބުގައި އެކަށީގެންވާ ވަގުތު އޮއްވައި އަޅުގަނޑުމެންނަށް މިކަން ކާމިޔާބު ކުރެވޭނެ. ހައި ކޯޓުން މައްސަލަ ކާމިޔާބު ކުރެވޭނެ. ރައީސް ޔާމީންގެ ޒައާމަތެއް 2023 ވަނަ އަހަރުގެ އިންތިހާބަށް ފަހު ފެށިގެން ދާނެ،" މި އަހަރުގެ ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ވަގުތު އޮއްވައި ހައި ކޯޓުން ޔާމީން މިނިވަން ކުރާނެ ކަމުގެ ފުރިހަމަ ޔަގީންކަން ދެއްވަމުން ޖަމީލް ވިދާޅުވި އެވެ.

އެ މަނިކުފާނު ވިދާޅުވިގޮތުގައި، އިސްތިއުނާފގެ މައްސަލަ ނިމެންދެން ކަފާލާތުގެ ދަށުން ޔާމީން މިނިވަން ކުރަން ހައި ކޯޓުގައި އެދޭނެ އެވެ. ޔާމީން ކުރިން ޖަލަށްލި މައްސަލާގައި ކަފާލާތު ނުދިނަސް، މިހާރު އޮތް މައްސަލާގައި ހަދާފައިވާ ގޯސްތަކުގެ ސަބަބުން ކަފާލާތު ލިބޭނެ ކަމަށް އުއްމީދު އެބައޮތް ކަމަށް ޖަމީލް ވިދާޅުވި އެވެ.

"އަޅުގަނޑުމެން އެދޭނަން. އަދި އަޅުގަނޑުމެންނަށް އުއްމީދުކުރަން އެ ހުކުމް ދެއްވާނެ ކަމަށް. އެއީ މިހާ ބޮޑެތި ގޯސްތަކެއް ހަދާފައި ހުރުމުން،" ޖަމީލް ވިދާޅުވި އެވެ.

އެ މަނިކުފާނު ވިދާޅުވީ އެންމެ ބޮޑު ކަންބޮޑުވުމަކީ ގާނޫނު ތަތުބީގު ކުރުމުގައި ބޮޑެތި ގޯސްތަކެއް ދަށު ކޯޓުތަކުން ހަދަމުންދާތީ ކަމަށެވެ. އެކަން އެގޮތަށް ދިމާވަނީ ފަނޑިޔާރުންނަށް އެކަށީގެންވާ ތަމްރީނު ނުލިބުމާއި ފަނޑިޔާރުން އައްޔަން ކުރުމުގައި ގޯސްތަކެއް އުޅޭތީ ކަމަށް ވިދާޅުވި އެވެ.

"އޭގެ މާނައަކީ ފަނޑިޔާރުންގެ ފެންވަރުގެ މައްސަލަތަކެއް އެބަހުއްޓޭ،" ޖަމީލް ވިދާޅުވި އެވެ.

ޔާމީންގެ ވެރިކަމުގައި ފުރަތަމަ ނައިބު ރައީސް ޖަމީލް ވިދާޅުވި ގޮތުގައި ޔާމީންގެ މައްސަލަ ބައްލަވާ ކޮންމެ ފަނޑިޔާރަކު މަތީ ކޯޓުތަކަށް ޕްރޮމޯޓް ކުރުމަކީ ކަންބޮޑުވާ ކަމެކެވެ. އެ ކަމާ ދެކޮޅަށް ކޯޓުތަކުގެ އިސް ބޭފުޅުން މަސައްކަތް ކުރަންޖެހޭ ކަމަށާއި އެހެން ނޫން ނަމަ ގާނޫނުގެ ހުކުމް ދެމި ނޯންނާނެ ކަމަށް ޖަމީލް ވިދާޅުވި އެވެ.

ޔާމީންގެ މައްޗަށް ކުރި ހުކުމާ އެކު، ރިޔާސީ އިންތިހާބުގައި ވާދަކުރުމުގެ ފުރުސަތު އެ މަނިކުފާނަށް ވަނީ ގެއްލިފަ އެވެ. އެކަމަކު ސެޕްޓެމްބަރު މަހު އިންތިޚާބަށް ކުރިމަތިލުމުގެ ވަގުތު ހަމަވުމުގެ ކުރިން ހުކުމް ބާތިލްކޮށްފި ނަމަ އެ ފުރުސަތު ލިބިވަޑައިގަންނަވާނެ އެވެ.