ހަނގުރާމަ ވަރުގަދަ ކުރުމަށް ޕުޓިން އަމުރު ނެރުއްވައިފި

ޔޫކްރޭންގެ އިރުމަތީ ދޮންބާސް ސަރަހައްދުގެ މައި ސަހަރެއް ކަމަށްވާ ލީސީޗަންސްކް، ރަޝިޔާ ސިފައިންގެ ބާރުގެ ދަށަށް ދިޔުމާ ގުޅިގެން، ރަޝިޔާ ސިފައިންނަށް ހިތްވަރު ދެއްވައި، ހަނގުރާމަ އިތުރަށް ވަރުގަދަކުރުމަށް ރައީސް ލަޑިމިއާ ޕުޓިން އޭނާގެ ދިފާއީ ވަޒީރަށް އަންގަވައިފި އެވެ.

ވީޑިއޯ ލިންކް މެދުވެރި ކުރައްވައި، ދިފާއީ ވަޒީރު ސަރްގޭ ޝޮއިގޫ އާއި ސިފައިންގެ އިސް ޖެނެރަލުންނާ އެކުގައި އިއްޔެ ބޭއްވި ބައްދަލުވުމުގައި ރައީސް ޕުޓިން ވިދާޅުވީ، ގައުމީ ސަލާމަތާ ބެހޭ މަޖިލީހުން މިހާރު ފާސްކޮށްފައިވާ ރޭވުމާ އެއްގޮތަށް، ހަނގުރާމަ ކުރިއަށް ގެންދަން އެދޭ ކަމަށެވެ. ޕުޓިން ވިދާޅުވި ގޮތުގައި ލީސީޗަންސްކް ރަޝިޔާ ސިފައިންގެ ބާރުގެ ދަށަށް ގެނެވުމަކީ، މުޅި ލުހާންސްކް ސަރަހައްދު ރަޝިޔާގެ އަތް ދަށަށް އައުމެވެ.

ޕުޓިން ވިދާޅުވީ ލީސީޗަންސްކް ހިފުމަށް ހަނގުރާމަ ކުރި ރަޝިޔާ ސިފައިން ކުޑަކޮށް އަރާމު ކުރުމަށް ފަހު، އެމީހުންގެ ގާބިލުކަން އިތުރުކުރުމަށް ބޭނުންވާ ކަމަށެވެ. އޭގެ އިތުރުން ސިފައިންގެ އިރުމަތީ ގުރޫޕްތަކާއި ހުޅަނގު ގުރޫޕުތައް، އިތުރަށް ހަމަލާތައް ވަރުގަދަ ކުރުމަށް ޕުޓިން އެދިވަޑައިގަތެވެ. އަދި ލުހާންސްކްގައި ރަޝިޔާ ސިފައިން ހޯދި ފަދަ ކާމިޔާބެއް އެހެން ސަރަހައްދުތަކުގައި ތިބި ރަޝިޔާ ސިފައިން ހޯދާނެ ކަމަށް އުންމީދު ކުރައްވާ ކަމަށް ވެސް ޕުޓިން ވިދާޅުވި އެވެ.

ލުހާންސްކް އަކީ ޔޫކްރޭންގެ އިރުމަތީ ދޮންބާސް ސަރަހައްދުގައި ހިމެނޭ ކުދި ޖުމްހޫރިއްޔާތަކުގެ ތެރެއިން، މިދިޔަ ފެބްރުއަރީ މަހުގެ 23 ވަނަ ދުވަހު މިނިވަންކަން އިއުލާންކުރުމުން، ރަޝިޔާ އިން އެކަން ބަލައިގެންފައިވާ ޖުމްހޫރިއްޔާއެކެވެ. ލުހާންސްކް ޖުމްހޫރިއްޔާ ރަޝިޔާ ސިފައިންގެ ފުރިހަމަ ބާރުގެ ދަށަށް ދިއުމާ ގުޅިގެން، އެ ސަރަހައްދުގައި ކުރިން ހުންނެވި ޔޫކްރޭންގެ ގަވަރުނަރު ވިދާޅުވީ ހަނގުރާމައިގައި ޔޫކްރޭން ސިފައިން ބަލިވީ ނޫން ކަމަށާއި، ޔޫކްރޭން ސިފައިންނަށް ގެއްލުނީ ކުޑަ ސަރަހައްދެއް ކަމަށެވެ.

ރަޝިޔާ ސިފައިން ވައިގެ މަގުންނާއި އެއްގަމު މަގުން ދިން ވަރުގަދަ ހަމަލާތަކުގެ ކުރިމަތީގައި ދިފާއީ ހަމަލާތައް ކާމިޔާބު ނުކުރެވުމުން، ޔޫކްރޭން ސިފައިން މިހާރު ވަނީ ލީސީޗަންސްކް ދޫކޮށް ކައިރީގައިވާ އެހެން ސަރަހައްދުތަކަށް ބަދަލުވެފަ އެވެ. ޔޫކްރޭން ސަރުކާރުން ބުނާ ގޮތުގައި ރަޝިޔާ ސިފައިންގެ ބާރުގެ ދަށަށް ލީސީޗަންސްކް ދިޔައީ، އެކަށީގެންވާ މިންވަރަށް، ހުޅަނގުގެ ގައުމުތަކުން ބަރު ހަތިޔާރު ނުދިނުމުންނެވެ.

އެހެން ނަމަވެސް، ހުޅަނގުން ދޭން ވައުދުވެފައިވާ އިތުރު ހަތިޔާރުތައް ލިބުމާ އެކު، ލީސީޗަންސްކް އަލުން ހިފުމުގެ މަސައްކަތް ޔޫކްރޭން ސިފައިން ފަށާނެ ކަމަށް، ޔޫކްރޭންގެ ރައީސް ވޮލޮޑިމީރް ޒެލެންސްކީ އިއްޔެ ވިދާޅުވި އެވެ.

ލީސީޗަންސްކް، ރަޝިޔާގެ ބާރުގެ ދަށަށް ދިއުމާ ގުޅިގެން އެ ސަހަރުގެ އެތެރެ އަށް ހަމަލާ ދިނުން ހުއްޓާލައި، ރަޝިޔާ ސިފައިންގެ ހަމަލާތައް މިހާރު އަމާޒުކުރަމުން ދަނީ، ދޮންބާސް ސަރަހައްދުން މިނިވަންކަން އިއުލާންކުރި ޑޮނެޓްސްކް ޖުމްހޫރިއްޔާގައި ޔޫކްރޭން ސިފައިން ތިބި ތަންތަނަށެވެ.

މިދިޔަ ފެބްރުއަރީ މަހުގެ 24 ވަނަ ދުވަހު ފަތިހު ރަޝިޔާ ސިފައިން ޔޫކްރޭނާ ދެކޮޅަށް ހަނގުރާމަ ފެށީ، އޭގެ ކުރީ ދުވަހު މިނިވަންކަން އިއުލާން ކުރި ލުހާންސްކް ޖުމްހޫރިއްޔާ އާއި ޑޮނެޓްސްކް ޖުމްހޫރިއްޔާގެ މިނިވަންކަން، ރަޝިޔާގެ ރައީސް ޕުޓިން ގަބޫލުކުރެއްވިތާ މާ ގިނައިރުތަކެއް ނުވަނީހެވެ.

މިހާރު ޔޫކްރޭންގައި ކުރަމުންދާ ހަނގުރާމައިގައި، ރަޝިޔާ ސިފައިންގެ ބާރުގެ ދަށަށް ގެންދެވޭ ޔޫކްރޭންގެ ކޮންމެ ސަރަހައްދެއް ރަޝިޔާގެ ބާރުގެ ދަށަށް ދަނީ، ދެ ފަރާތުގެ މެދުގައި ގިނަ ދުވަސްތަކެއް ވަންދެން ހަމަލާތައް ބަދަލުކޮށް، އެ ސަރަހައްދެއް އެކުގައިހެން ސުންނާފަތިވާ ފަހުންނެވެ.