މިފްކޯއިން ވެސް ތެލުގެ އަގު ބޮޑު ކޮށްފި

މިފްކޯ އިން މަސްވެރިންނަށާއި އާއްމުންނަށް ވިއްކާ ޑީސަލުގެ އަގު ބޮޑުކޮށްފި އެވެ.

މި ބަދަލާއެކު، މިއަދުން ފެށިގެން މަސް ދޯނިތަކަށް އެ ކުންފުނިން ޑީސަލް ލިޓަރެއް ވިއްކާނީ 12.08ރ. އަށެވެ. އާއްމުންނަށް ޑީސަލް ލިޓަރެއް ވިއްކާނީ 14.26ރ. އަށެވެ.

މިދިޔަ އަހަރުގެ އޭޕްރިލް މަހު ގެނައި ބަދަލާއެކު، މަސްވެރިންނަށް މިފްކޯ އިން ޑީސަލް ލިޓަރެއް ވިއްކަމުން އައީ 9.03ރ. އަށެވެ. އަދި އާއްމުންނަށް ޑީސަލް ލީޓަރެއް ވިއްކީ 13.19ރ. އަށެވެ.

މިފްކޯ އިން ވިއްކާ ޑީސަލުގެ އަގު ބޮޑުކޮށްފައިވަނީ ދުނިޔޭގެ ބާޒާރުގައި ތެލުގެ އަގު ރެކޯޑު އަދަދަކަށް އުފުލުމާ ގުޅިގެންނެވެ. މިފްކޯގެ އިތުރުން އެސްޓީއޯގެ ސަބްސިޑަރީ ކުންފުނި އެފްއެސްއެމުން ވެސް ވަނީ ތެލުގެ އަގު އިއްޔެ އިން ފެށިގެން ބޮޑުކޮށްފަ އެވެ.

އެފްއެސްއެމުން ތެލުގެ އަގު ބޮޑުކުރުމާ ގުޅިގެން، މިހާރު ޕެޓްރޯލް ލިޓަރެއްގެ އަގަކީ 12.06ރ. އެވެ. ޑީސަލް ލީޓަރެއްގެ އަގު ބޮޑުކުރީ 12.44ރ. އަށެވެ.

ދުނިޔޭގެ ބާޒާރުގައި ތެލުގެ އަގު ހުރީ ފީފާއެއް 87.35 ޑޮލަރު (1،346ރ.) ގަ އެވެ. މިއީ މި އަހަރު ފެށުނު އިރު ހުރި އަގާ އަޅާ ބަލާއިރު 10 ޕަސެންޓުގެ އިތުރުވުމެކެވެ.