ފުރަތަމަ ހެލްތް އެކްސްޕޯ 16 ސްޓޯލާ އެކު ފަށައިިފި

އެމްވީ މެޑިކަލްސް އިން ބާއްވާ ފުރަތަމަ މެޑިކަލް އެކްސްޕޯ 16 ސްޓޯލާއެކު މިއަދު ފަށައިފި އެވެ.

މެއިން ސްޕޮންސާ އަކަށް އޭޑީކޭ ހަމަޖައްސާފައިވާ މި އެކްސްޕޯގައި ރާއްޖޭގައި ސިއްހީ ހިދުމަތްތައް ދޭ އެކި ސެންޓަރުތަކާއި އިންޑިއާ އާއި ސްރީ ލަންކާގެ ބޮޑެތި ހޮސްޕިޓަލްތައް ބައިވެރިވެ އެވެ.

މި އެކްސްޕޯ ފެށުމަށް އާޓް ގެލެރީގައި ބޭއްވި ރަސްމިއްޔާތުގައި ހެލްތް މިނިސްޓްރީގެ ސްޓޭޓް މިނިސްޓަރު ޑރ. މުހައްމަދު ހަބީބު ވިދާޅުވީ ރާއްޖޭގައި ވެސް ރަނގަޅު ސިއްހީ ހިދުމަތްް ދޭ ތަންތަން އެބަހުރި ކަމަށާއި އެކަމުގެ މައުލޫމާތު ރައްޔިތުންނާ ހަމައަށް ރަނގަޅަށް ފޯރުކޮށްދޭންޖެހޭ ކަމަށެވެ.

އޭނާ ވިދާޅުވީ ރާއްޖެއިން ދޭ ފަރުވާތަކަކީ ދުނިޔޭގެ އެހެން ހޮސްޕިޓަލްތަކުގައި ވެސް ދެމުން އަންނަ ފަރުވާތައް ކަމަށާއި ކުޑަ ދުވަސްކޮޅެއްގެ ތެރޭގައި ރާއްޖޭގެ ސިއްހީ ދާއިރާއިން ބޮޑު ކުރިއެރުމެއް ހޯދަމުން އަންނަ ކަމަން އޭނާ ފާހަގަކުރެއްވި އެވެ.

"އައިޖީއެމްއެޗާއި އޭޑިކޭ އަދި ރަށްރަށުގައި ހުންނަ ހޮސްޕިޓަލްތަކުން ވެސް މިދަނީ ކުރިން ނުދެވޭ ހިދުމަތްތައް ތައާރަފްކުރަމުން. އެކަން ރައްޔިތުން ބަލައިވެސް ގަނޭ. ނަމަވެސް އަދިވެސް އެބަހުރި ރައްޔިތުންނަށް ނޭނގޭ ކިތަންމެ ފަރުވާއެއް،" ހަބީބު ވިދާޅުވި އެވެ.

ހަބީބު ވިދާޅުވީ އައިޖީއެމްއެޗްގައި އޮޕަރޭޝަންކޮށްފައި އޭގެ ފަހުން ހަދާ ޓެސްޓުތަކާ މެދު ހިތްހަމަނުޖެހިގެން ފަރުވާ ހޯދުމަށް ގިނަ ބަޔަކު ރާއްޖެއިން ބޭރަށް ދާ ކަމަށެވެ. ނަމަވެސް ހަބީބު ވިދާޅުވި ގޮތުގައި، ސިންގަޕޫރު ފަދަ ހޮސްޕިޓަލުތަކަށް ފަރުވާ ހޯދަން ދިއުމުން، އެއީ ދުނިޔޭގެ ކޮންމެ ދިމާލަކަށް ދިޔަ ކަމުގައި ވިޔަސް ލިބޭނެ ފަރުވާކަމަށް ބުނެފައި އެބަހުއްޓެވެ.

"އައިޖީއެމްއެޗް އިން މީހަކު އޮޕަރޭޝަނެއް ކޮށްފައި އޭގެ ފޮލޯއަޕް އައިޖީއެމްއެޗް އިން ހަދަން ހިތްހަމަނުޖެހިގެން ސިންގަޕޫރުގެ މައުންޓް އެލިޒަބަތު ހޮސްޕިޓަލަށް މި ދިޔައީ. ދިޔަތަނާ އެ ހޮސްޕިޓަލުން މި ބުނަނީ އެއީ ދުނިޔޭގެ ކޮންމެ ހިސާބަކުން ވެސް ލިބޭނެ އެންމެ ރަނގަޅު ފަރުވާއޭ އެ ލިބުނީ،" ހަބީބު ވިދާޅުވި އެވެ.

އަންނަ ހޮނިހިރު ދުވަހާ ހަމައަށް ބާއްވާ މި އެކްސްޕޯގައި އެކި ހޮސްޕިޓަލްތަކުން ދޭ ފަރުވާތަކާ ބެހޭ މައުލޫމާތު ލިބިގެންދާނެ ކަމަށް އެމްވީ މެޑިކަލް އިން ބުންޏެވެ.