ހިޔާ ފްލެޓްގެ މެއިންޓެނަންސް ފީ އިން އަހަރަކު 80 މިލިއަން ރުފިޔާ!

ރާއްޖޭގައި މިހާތަނަށް ހިންގި ސޯޝަލް ހައުސިން ސްކީމްގެ އެންމެ ބޮޑު މަޝްރޫއު މިހާރު އޮތީ އެންމެ ފަހު މަރުހަލާގަ އެވެ. ރައީސް އަބްދުﷲ ޔާމީންގެ ސަރުކާރުން ހުޅުމާލޭގައި އެޅި 25 ބުރީގެ އިމާރާތްތަކުގައި ހެދި ފްލެޓްތަކުގެ އަގު ކަނޑައަޅައި، ފްލެޓްތައް ދޭނެ މީހުން ވެސް މިހާރު ވަނީ ނިންމައިފަ އެވެ. އަދި ފްލެޓްތައް ލިބޭ ތަންތަން ގުރުއަތުން މިހާރު އަންނަނީ ނަގަމުންނެވެ. ދެ ކޮޓަރީގެ އެޕާޓްމަންޓެއްގެ އަގަކީ، 25 އަހަރުން ދައްކާ ގޮތަށް މަހަކަށްް 7500ރ. އެވެ. ޑައުންޕޭމަންޓެއް ނެތި ވަދެވޭގޮތަށް ހަމަޖެއްސި އިރު، ކޮންމެ އެޕާޓްމަންޓަކުން މަހަކު 1000ރ. ގެ ސާވިސް/ މެނޭޖްމަންޓް ފީއެއް ދައްކަން ޖެހެ އެވެ. އެހެންވެ، ބައެއް މީހުން ގަބޫލުކުރާ ގޮތުން، ކުއްޔަކީ މަހަކު 8500ރ. އެވެ. އަދި ދެ ކޮޓަރީގެ ފްލެޓެއްގެ އަގު އެ ޖެހެނީ 2.5 މިލިއަން ރުފިޔާ އަށެވެ.

މިއީ، އެތައް ބަޔަކު ކުރިމަތިލި ފްލެޓްތަކެކެވެ. ފްލެޓްތައް ދިނީ ސަރުކާރުން ބުނާ ގޮތުން މާލޭގައި އެންމެ ހާލުގައި ދިރިއުޅޭ މީހުންނަށެވެ.

ހުޅުމާލޭ ދެވަނަ ފިޔަވަހީގައި ހަދާފައިވާ 6،720 ފްލެޓްގެ ތަޅުދަނޑި ލިބުނަސް، އެތަން އޮތީ ވަގުތުން ގޮސް ދިރިއުޅެވޭ ހާލަތެއްގައެއް ނޫނެވެ. އެތަނަށް ވަންނަ ކޮންމެ އާއިލާ އަކުން ވެސް ވަރަށް ބޮޑު ހޭދައެއް ކުރަން ޖެހެ އެވެ. ފާހާނާގައި ދޮރުފަތް ހުރީ ހަރުނުކޮށެވެ. ސިޓިންރޫމާއި ކޮޓަރިތަކުގައި ތަށިމުށި ވެސް ހުރީ ނުޖަހަ އެވެ. ފަންކާ އާއި ލައިޓުތައް ހަރުކޮށް، ފްލެޓުގައި ކުލަ ލާން ޖެހެނީ ވެސް ފްލެޓު ލިބޭ މީހުން އަމިއްލައަށެވެ.

ބައެއް މީހުން ބުނާ ގޮތުން އެތަނަށް ވަންނަން ކުރަން ޖެހޭ ހޭދަ ވެސް މަދުވެގެން ދޮޅު ލައްކަ ނުވަތަ ދެ ލައްކަ ރުފިޔާ ހޭދަވެ އެވެ.

ބޮޑު ހޭދައެއްކޮށްގެން ވަދެ، އަދި ކުޑަކުޑަ ތަނަކަށް މަހަކު 7500ރ. ދައްކަމުން، ސާވިސް ފީ އަށް 1000ރ. ދެއްކުމަކީ ވަރަށް ގިނަ މީހުން އިއްތިފާގުވާ ގޮތުގައި ބޮޑު އަގެކެވެ. އަދި އެއީ ސޯޝަލް ހައުސިން ސްކީމްތޯ ވެސް ބައެއް މީހުން ސުވާލު އުފައްދަނީ އެ އަގުތަކާ ހެދި އެވެ. ހާއްސަކޮށް، މަހުން މަހުން ނަގާ ސާވިސް ފީގެ ގޮތުގައި 1000ރ. އަކީ މާ ބޮޑު އަގެއް ކަމަށް ވަރަށް ގިނަ މީހުން ބުނެ އެވެ. ސަބަބަކީ، ހުޅުމާލޭގެ ލަގްޒަރީ އެޕާޓްމަންޓްތަކުގެ ސާވިސް ފީގެ ގޮތުގައި ވެސް ނަގަމުން އަންނަނީ ގިނަވެގެން ދެހާހެއްހާ ރުފިޔާ ކަމަށް ވާތީ އެވެ.

މަހަކު 1000ރ. ގެ ފީއެއް ކޮންމެ އެޕާޓްމަންޓަކުން ނަގާ ނަމަ އެއީ އަހަރެއްގެ މައްޗަށް ހަމައެކަނި ސާވިސް ފީގެ ގޮތުގައި 80.64 މިލިއަން ރުފިޔާ އެވެ.

މީގެ ކުރިން ސޯޝަލް ހައުސިންގެ ދަށުން، ހުޅުމާލެއިން ދޫކޮށްފައިވާ ތިން ކޮޓަރީގެ ފްލެޓްތަކަކުން ކުލީގެ ގޮތުގައި ނަގާފައި ވަނީ މަހަކަށް 6000ރ. އެވެ. މެއިންޓެއިނަންސް ފީގެ ގޮތުގައި އެތަންތަނުން ވެސް ދައްކަން ޖެހެނީ 1000ރ. އެވެ. ޖުމްލަ މަހެއްގެ މައްޗަށް ދައްކަން ޖެހެނީ 7000ރ. އެވެ. އެކަމަކު އެ ފްލެޓްތަކަކީ ހިޔާ ފްލެޓްތަކަށް ވުރެ ޖާގަ ތަނަވަސް ތަންތަނެވެ. ކޮންމެ ކޮޓަރިއެއްގައި ފާހާނާ ހުރެ އެވެ.

ހުޅުމާލޭގައި ހުރި ބައެއް އަމިއްލަ ކުންފުނިތަކުގެ ފްލެޓްތަކުގެ މެއިންޓެއިނެންސް ފީއަށް ބަލާއިރު އަމީން އެވެނިއުގެ ތިން ކޮޓަރީގެ ފްލެޓްތަކުން 2173ރ. ދަމާސްގެ ވަން އެވެނިއުގެ ތިން ކޮޓަރީގެ އެޕާޓްމަންޓްތަކުން 2331ރ. ފީގެ ގޮތުގައި ދައްކަން ޖެހެ އެވެ. އެކަމަކު ރެއިން ކްރެސްޓް ރެޒިޑެންސްގެ އެއް ކޮޓަރީގެ އެޕާޓްމަންޓްތަކުން މި ފީގެ ގޮތުގައި ނަގަނީ 1164ރ. އެވެ.

ސޯޝަލް ހައުސިން ސްކީމެއްގައި ސާވިސްއެއް ނުލިބޭ!

ބައެއް މީހުން ބުނާ ގޮތުން މަހަކު 1000ރ. ގެ ފީއެއް ނަގައިގެން ވެސް އެވަރަށް ސާވިސް ދޭ ނަމަ މައްސަލައެއް ނެތެވެ. އެހެން ނަމަވެސް، މައްސަލައަކީ، ސަރުކާރުން އިމާރާތްކޮށް ދޫކޮށްފަައިވާ ފްލެޓްތަކުން ސާވިސް ފީ ނަގައި، އެވަރަށް އެތަންތަން ނުބެލެހެއްޓޭތީ އެވެ. ކަރަންޓު، ނުވަތަ ފެނުގެ މައްސަލައެއް ކުރިމަތިވި ވިޔަސް، އެކަންކަން ކުރަން ޖެހެނީ އަމިއްލަ އަށެވެ. ފްލެޓް އިމާރާތުގައި ކުލަކޮޅެއްހާ ހިސާބު ވެސް އާކޮށް ނުލަ އެވެ. ކުނި ކަހައި ތަން ސާފުކޮށް ބަލަހައްޓާނީ، ގިނަ ފަހަރަށް އެތަންތަނުގައި އުޅޭ މީހުން ހަޅޭއްލަވައިގަތީމަ އެވެ.

ހިޔާ ފްލެޓް ޔޫނިއަނުން "މިހާރު" އަށް ވާހަކަ ދެއްކެވި މެމްބަރަކު ވެސް ވަނީ މި ފީއާ މެދު ކަންބޮޑުވެ ވާހަކަ ދައްކަވައިފަ އެވެ. އޭނާ ވިދާޅުވި ގޮތުގައި މިއީ ނަގަން ވެސް ޖެހޭ ފީއެއް ނޫނެވެ.

"މިހާރު މީހުން އުޅޭ ފްލެޓްތަކުން ވެސް މެނޭޖްމަންޓް ފީއަކަށް 1000ރ. އެބަ ނަގާ. އެކަމަކު ކޮން ހިދުމަތެއްތޯ އެއަށް ލިބެނީ. މަސް ދުވަސްވާއިރު ވެސް ސާފުކުރަން މީހުން ނާދޭ އިނގޭތޯ. ސާފުކުރަން ފޮނުވައިފައި ހުންނާނެ ބިދޭސީއަކު. އެ މީހުން ސިޑިމަތީ ތިބެ ސިނގިރޭޓް ބޮއެ، ފިހިކަނޑު ހާކާލައިފައި ދާއިރު ކުޑަދޮރުގައި ހުންނަ މަކުނުވާތަކެއް ނުފޮޅާނެ. ކުނި ކޮތަޅު ބާލައިރު ސިނޑި މައްޗަށް އެ ވެރޭ ހަޑި އެއްޗެހި ސާފުކުރަން މޮޕެއް ނުލާނެ. ކުނި އެކަނި ކަހާލަނީ. އެހެންވީމަ، 1000ރ. ވޯތެއް ނޫން ކުނި ކަހާކަށް،" ހިޔާ ފްލެޓް ޔޫނިއަންގެ މެމްބަރަކު ވިދާޅުވި އެވެ.

އޭނާ ވިދާޅުވީ ކުއްޔަކީ އެންމެ އާދައިގެ މީހާ އަށް ވެސް ދެއްކޭނެ ވަރުގެ އެއްޗަކަށް ވާންޖެހޭއިރު، ހިޔާ ފްލެޓްތަކުގެ މަސައްކަތް ވެސް ނުނިންމާ އެތަންތަން ހަވާލުކުރާ ނަމަ، އެތަންތަނަށް ވަނުމަށް ވެސް ބޮޑު ހަރަދެއް ކުރަން ޖެހޭނެ ކަމަށެވެ.

ހިޔާ ފްލެޓްތަކުން 1000ރ. ފީއެއް ނަގަން އެޗްޑީސީން ނިންމީ ކީއްވެ ކަމެއް ސާފެއް ނުވެ އެވެ. އެކަމަކު މިހާރު ވެސް ހުޅުމާލޭގައި ހުރި ފްލެޓްތަކުން، މެއިންޓެއިނެންސް ފީއެއް ނެގިޔަސް، އެ ފީ ނަގައި މަގްސަދު ހާސިލެއް ނުވާ ކަމުގެ ޝަކުވާ އެތަންތަނުގައި އުޅޭ މީހުން ކުރެ އެވެ.

"ކުޑަކުޑަ ސްކީމެއް ވިޔަސް މައްސަލައެއް ނެތް އެތަނުގައި ހުރި މަދު ފްލެޓްކޮޅަކުން އެވަރުގެ އަދަދެއް ނަގަން. އެކަމަކު މި ދައްކަނީ އަހަރަކަށް 80 މިލިއަން ރުފިޔާގެ ވާހަކަ. އަޅުގަނޑުގެ ސުވާލަކީ މަހަކު އެޕާޓްމަންޓަކުން 300 ވަރަކަށް ރުފިޔާ ނަގައިގެން އެތަން ސާފުތާހިރުކޮށް ބަލަހައްޓައި ހިދުމަތް ނުދެވޭނެތޯ،" ރިއަލްއެސްޓޭޓް ވިޔަފާރީގައި އުޅުއްވާ ބޭފުޅަކު ވިދާޅުވި އެވެ.

ސޯޝަލް ހައުސިން ސްކީމެއްގެ އެންމެ އަސާސީ ސިފައަކީ ވެސް، ހުރިހާ ކަމެއް އަގުހެޔޮވުމެވެ. އެކަމަކު ކުއްޔާއި ދެން ހުރި ފީތައް ބޮޑު ނަމަ، ނިކަމތި މީހާގެ ދިރިއުޅުން ދުވަހަކު ވެސް ކުރިއަކަށް ނުދާނެ އެވެ. މި ސްކީމްގައި ވެސް ފެންނާނީ ހަމަ އެ މަންޒަރެވެ.