މައްސަލައެއް ދިމާވެއްޖެ ނަމަ އަގު ނުނަގައި ފްލެޓް ނިންމަން އިތުރު މުއްދަތެއް ދޭނެ

ހުޅުމާލޭގެ ދެ ވަނަ ފިޔަވަހީގައި އިމާރާތްކޮށްފައިވާ ހިޔާ މަޝްރޫއުގެ ފްލެޓްތަކުގައި ފިނިޝިން މަސައްކަތް ކުރަމުންދަނިކޮށް ކަރަންޓުގެ މައްސަލަ ފަދަ ކަމެއް ދިމާވެއްޖެ ނަމަ، އެ މަސައްކަތް ނިންމަން އިތުރު މުއްދަތެއް ދޭނެ ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް މިއަދު ވިދާޅުވެއްޖެ އެވެ.

ކުރީގެ ސަރުކާރުގައި އެ ފްލެޓްތައް ދޫކުރަން އެއްބަސްވެފައިވާ ގޮތަށް ފިނިޝިން ނުނިންމައި ދޭތީ އެ މަސައްކަތް ކުރަން ޖެހޭނީ ފްލެޓް ލިބުނު މީހުންގެ އަމިއްލަ ހަރަދުގަ އެވެ. އެއީ މުއްދަތެއް ހޭދަވާނެ ކަމަކަށް ވާތީ އެކަމަށް ސަރުކާރުން ކަނޑައެޅީ ތިން މަހެވެ. އެ މުއްދަތުގައި ފްލެޓް ލިބުނު މީހުންގެ އަތުން އެއްވެސް ވަރަކަށް ފައިސާއެއް ނުނަގާނެ އެވެ.

ރައީސް އޮފީހާއި އެޗްޑީސީ ގުޅިގެން މިއަދު މެންދުރު ފަހު ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ، އެއްވެސް މައްސަލައެއް ދިމާވެއްޖެ ނަމަ، ފިނިޝިންއަށް ދިން މުއްދަތު އިތުރުކޮށްދޭނެ ކަމަށެވެ.

"އެ މުއްދަތުގެ ތެރޭގައި އަޅުގަނޑުމެންނަށް ދިމާވެދާނެ އެއް ދަތީގެ ގޮތުގައި އެބަ އޮތް ކަރަންޓުގެ މައްސަލައެއް ދިމާވެ، މިކަހަލަ ކަމެއް މުއްދަތަށް ނުކުރެވިއްޖެއްޔާ އެ މުއްދަތު އެކްސްޓެންޑް ވެސް ކޮށްދޭ ގޮތަށް،" މަބްރޫކް ވިދާޅުވި އެވެ.

ފްލެޓްގައި އެފަދަ މައްސަލައެއް ދިމާވެގެން މުއްދަތު އިތުރުކޮށްދޭއިރު އެ މުއްދަތަށް ވެސް ފައިސާއެއް ދައްކާކަށް ނުޖެހޭނެ އެވެ.

އިއްޔެ ބޭއްވި ނޫސްވެރިންގެ ބައްދަލުވުމުގައި ވެސް ހައުސިން މިނިސްޓަރު މުހައްމަދު އަސްލަމް ވަނީ ފްލެޓްތަކަށް ކަރަންޓު ދިނުމުގެ މަސައްކަތް މިހާތަނަށް ނިމިފައި ނުވާ ކަމަށް ވިދާޅުވެފަ އެވެ.

މިނިސްޓަރު ވިދާޅުވި ގޮތުގައި ފްލެޓް އެޅުމުގެ މަސައްކަތް ކުރާ ޗައިނާ ކުންފުނިން، ކަރަންޓު ދިނުމަށް ބޭނުންވާ ޓްރާންސްފޯމާ ރާއްޖެއަށް ގެނެސްފި އެވެ. އެކަމަކު ކޮވިޑް-19 ގެ ސަބަބުން، ރާއްޖެ އާއި ޗައިނާއާ ދެމެދު ދަތުރުކުރުން ހުއްޓާލާފައިވާތީ ޓްރާންސްފޯމާ އިންސްޓޯލްކުރަން ޗައިނާ އިން އަންނަ މީހުންނަށް ނާދެވުނު ކަމަށް އަސްލަމް ވިދާޅުވި އެވެ.

"އެމީހުން އަންނަން ޗައިނާ ސަރުކާރަކުން ހުއްދައެއް ނުދޭ. އެމީހުން އެހެން ބަޔަކު ލައްވާ އެކަން ކުރަންޏާ މީގެ ވޮރެންޓީ އެބަ ގެއްލޭ. ސްޓެލްކޯ އިން އޮތީ މިކަން ކޮށްދޭ ގޮތަށް. އެކަމަކު އޭރުން ވޮރެންޓީ ގެއްލުނީ. އެހެންވީމަ ކޮންޓްރެކްޓްގައި ކުރަން އޮތް ގޮތަކަށް ނުގެންދެވޭނެ. މި މައްސަލަ ހައްލުކުރެވޭނެ ގޮތެއް އެބަ ހޯދަން،" އަސްލަމް ވިދާޅުވި އެވެ.

އެމްޑަބްލިއުއެސްސީއާ ހަވާލުކޮށްގެން ފްލެޓްތަކުގެ ފެނުގެ މަސައްކަތް ކުރިއަށް ގެންދިޔައިރު އެ މަސައްކަތް މިހާރު ވަނީ ނިމިފަ އެވެ.

ޗައިނާގެ ކުންފުންޏާ އެކު ކުރީގެ ސަރުކާރުން އެއްބަސްވެފައި ވަނީ ފްލެޓް ލިބޭ މީހުން އަމިއްލައަށް ފިނިޝިން ނިންމާ ގޮތަށެވެ. އެހެންވެ ދެ ކޮޓަރީގެ އެ ފްލެޓްތައް ދޭނީ ފާހާނާގައި ދޮރުފަތް ހަރުނުކޮށެވެ. އަދި ސިޓިންރޫމާއި ކޮޓަރިތަކުގައި ތަށިމުށި ވެސް ނުޖަހަ އެވެ. ފަންކާ އާއި ލައިޓުތަކާއި ފްލެޓުގައި ކުލަ ލުމަކީ ވެސް ފްލެޓް ލިބޭ މީހާގެ ޒިންމާއެކެވެ.

މިހާރު ސަރުކާރުން އެތަންތަނަށް ކަނޑައަޅާފައިވާ އަގަކީ 7500 ރުފިޔާ އެވެ. އޭގެ އިތުރުން، ކޮންމެ މަހަކު ސާވިސް ފީގެ ގޮތުގައި 1000 ރުފިޔާ ދައްކަން ޖެހޭނެ އެވެ. ބޮޑު ލޯނެއް ނަގައިގެން ތަރައްގީކުރި ހިޔާ ފްލެޓެއްގެ އަގަކީ މަހަކު 5600 ރުފިޔާ ކަމަށް ކުރީ ސަރުކާރުން ކަނޑައަޅާފައި ވަނީ ނުބައި ގޮތަކަށް ހިސާބު ޖަހައިގެން ކަމަށް ވެސް ސަރުކާރުން ބުނެ އެވެ. އެކަމަކު