މަސް ދުވަހުގެ މެދުކެނޑުމަކަށް ފަހު، ހިޔާ ފްލެޓްތަކުގެ ގުރު ނަގަނީ

ހުޅުމާލޭގައި އިމާރާތްކޮށްފައިވާ ހިޔާ ފްލެޓްތައް ލިބުނު މީހުންގެ މެދުގައި ނަގަމުން އައި ގުރު ނެގުން، މާލޭ ސަރަހައްދުގައި ކޮވިޑް-19 ގެ ހާލަތު ގޯސްވުމުން ހުއްޓާލުމަށް ފަހު އަލުން އެ މަސައްކަތް ފަށަން ނިންމާފައިވާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ބުނެފި އެވެ.

ކުރީގެ ރައީސް އަބްދުﷲ ޔާމީންގެ ސަރުކާރުން ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ 25 ބުރީގެ 16 ޓަވަރުން މީހުންނަށް ލިބޭ އެޕާޓްމަންޓްތައް ކަށަވަރު ކުރުމަށް ގުރު ނެގުން ފެށީ އޭޕްރީލް މަހުގެ ކުރީކޮޅު އެވެ. އެކަމަކު މާލޭ ސަރަހައްދުގެ ކޮވިޑްގެ ހާލަތު ވަރަށް ބޮޑަށް ގޯސްވެ، މެއި މަހުގެ 12 ވަނަ ދުވަހު ގުރުނެގުން މެދުކަނޑާލި އެވެ.

އެޗްޑީސީން ކުރި އިއުލާނެއްގައި ބުނި ގޮތުގައި އަލުން ގުރު ނެގުން ފަށާނީ މިއަދު މެންދުރު 1:00 ގަ އެވެ. އެޗްޑީސީގެ ވެބްސައިޓުގައި މިއަދު ގުރު ނަގާނެ މީހުން އާންމުކޮށްފައިވާއިރު އެ ލިސްޓުގައި ހިމެނެނީ 514 މީހެކެވެ.

ގުރު ނެގުމަށް ހަމަޖެހިފައިވާ ކެޓަގަރީތަކަކީ ހާއްސަ އެހީއަށް ބޭނުންވާ މީހުންނަށް ހާއްސަ ކެޓަގަރީ (އެޗް10) އާއި ސިވިލް ސާވިސް މުވައްޒަފުންގެ ކެޓަގަރީ އާއި އެކަނިވެރި މައިންނާއި ބަފައިންގެ ކެޓަގަރީ (އެޗް6) އަދި 18 އަހަރާއި 40 އަހަރާ ދެމެދުގެ ކައިވެނިކޮށްގެން އުޅޭ މީހުންނަށް ހާއްސަ (އެޗް7) އާއި މާލޭ ރަށްވެހިންނަށް ހާއްސަ (އެޗް8) އާއި މާލޭ މުނިސިޕަލްޓީގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ހާއްސަ (އެޗް9) ގެ އިތުރުން ފުލުހުނނަށް ހާއްސަ ފްލެޓްތަކެވެ.

އޭގެ ތެރެއިން ފުލުހުންނަށް ހާއްސަ ލިސްޓު ފިޔަވައި، ދެން ހުރި ކެޓަގަރީތަކަކީ ޕްލޭނިން އެންޑް ހައުސިން މިނިސްޓްރީން ވެރިފައިކުރުމަށް ފަހު، އިތުރަށް ފޮނުވާފައިވާ ލިސްޓުތައް ކަމަށް އެޗްޑީސީން ވަނީ ބުނެފަ އެވެ. އަދި އެ ލިސްޓުގެ ގުރުނެގުން ކުރިއަށް ގެންދާނީ ކުރިއެކޭ އެއްގޮތަށް އައިޑީކާޑު ނަމްބަރު ތަރުތީބުންނެވެ.

އަލުން ގުރުނެގުމުގެ މަސައްކަތް ކުރިއަށްދާނީ އެޗްޕީއޭ އިން ނެރެފައިވާ އެންގުންތަކާ އެއްގޮތަށް ވީހާ ވެސް މަދު ބަޔަކު ބައިވެރިކޮށްގެން ކަމަށް ވެސް އެޗްޑީސީން ބުނެފައިވެ އެވެ.

ފްލެޓް ލިބޭ ތަން ކަނޑައަޅައި އިއުލާނުކުރަން އެޗްޑީސީން ބާއްވާ އިވެންޓް ބައެއް ޓީވީ ޗެނަލްތަކުން ލައިވް ވެސް ކުރެ އެވެ. ގުރުނަގައި ނިމުމުން އެ މީހަކަށް ލިބުނު ފްލެޓުގެ ތަފުސީލް އެޗްޑީސީން މެސެޖަކުން އަންގައިދޭނެ އެވެ.

އަންނަ މަހުގެ މެދުތެރޭގައި ފްލެޓް އެގްރީމެންޓްގައި ސޮއިކުރަން ނިންމާފައިވާއިރު އަންނަ މަހުގެ ފަހުކޮޅު އެތަންތަނުގެ ފިނިޝިން މަސައްކަތް މީހުން ފަށާނެ ކަމަށް ބެލެވެ އެވެ. ފްލެޓްގެ މަހު ކުލީގެ ގޮތުގައި 7،500ރ. އަދި ސާވިސް ފީގެ ގޮތުގައި 1،000ރ. ނަގާނެ އެވެ. އެކަމަކު ފިނިޝިން މަސައްކަތް ނިންމަން ދޭ ތިން މަހުގައި އެތަންތަނުން އެއްވެސް ކުއްޔެއް ނުނަގާނެ ކަމަށް ވެސް ސަރުކާރުން ވަނީ ބުނެފަ އެވެ.