ހިޔާ ފްލެޓްތަކުގައި އިތުރަށް ހަރުކުރާ 32 ލިފްޓަށް 278 މިލިއަން ހަރަދުވޭ

ހުޅުމާލެ 2 ގައި އިމާރާތް ކޮށްފައިވާ ހިޔާ ފްލެޓްތަކުގައި އަލަށް ހަރުކުރާ 32 ލިފްޓަށް 18 މިލިއަން ޑޮލަރު (278 މިލިއަން ރުފިޔާ) ހަރަދުވާ ކަމަށް އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން ފަޒުލް ވިދާޅުވީ ލިފްޓް ހަރުކުރުމުގެ ޕްރޮޖްކެޓް މިހާރު ކުރިއަށް ގެންދާއިރު، ކޮންމެ ޓަވަރަކު ދެ ލިފްޓް ހަރުކުރަންޖެހޭ ކަމަށެވެ.

އެ މަސައްކަތް ކުރުމަށް މި އަހަރުގެ ބަޖެޓުގައި 200 މިލިއަން ރުފިޔާ ހިމެނި ނަމަވެސް ފަހުން އެ އަދަދު ވަނީ 100 މިލިއަން ރުފިޔާ އަށް ކުޑަކޮށްފަ އެވެ.

ލިފްޓު ހަރުކުރުމުގެ ޕްރޮޖެކްޓް މި އަހަރުގެ ފެބްރުއަރީ މަހު ހަވާލުކުރީ ޗައިނާގެ ޝެންޔެންގް ޔުއަންޑާ އިންޓެލެކްޗުއަލް އިންޑަސްޓްރީ ގްރޫޕް ކޯ ލިމިޓެޑާ އެވެ. ހިޔާ ޓަވަރުތަކުގައި އަލަށް ހަރުކުރާ ލިފްޓްތަކުގެ ތެރެއިން އެއް ލިފްޓަކީ ސްޓްރެޗާ އުފުލޭ ވަރުގެ ބޮޑު ލިފްޓެކެވެ. ދެން ހުރީ ގާތްގަނޑަކަށް 14 މީހުންގެ ކެޕޭސިޓީގެ ލިފްޓެކެވެ.

ހިޔާ ފްލެޓްގެ 25 ބުރީގެ 16 ޓަވަރުގެ ތެރެއިން ބައެއް ޓަވަރުގައި ހަތަރެއް އަދި ބައެއް ތަންތަނުގައި ތިން ލިފްޓު ހުރެ އެވެ. ނަމަވެސް، ލިފްޓު މަދުވުމުގެ ސަބަބުން އަރައި ފޭބުމަށް ދަތި ވާތީ އެތަނުގައި ދިރިއުޅޭ މީހުންގެ ޝަކުވާ ބޮޑެވެ. ހިޔާގެ ޓަވަރުތަކުގައި 50،000 އެއްހާ މީހުން މިހާރު އަންނަނީ ދިރިއުޅެމުންނެވެ.

ލިފްޓު ހަރުކުރުމަށް ހޭދަވާ އަދަދު ހޯދުމަށް އެޗްޑީސީ އަށް ކުރިން އާރްޓީއައި ހުށަހެޅުމުން އެ މައުލޫމާތު ހާމަނުކުރެވޭނެ ކަމަށް އެޗްޑީސީން ކުރިން އަންގާފައިވެ އެވެ. އެކަމަކު، އޭރު ވެސް އެއީ ބަޖެޓުގައި ޖަހާފައިވާ އަދަދެކެވެ.