އެޗްޑީސީގެ ސެލިއުލާ ޓަވަރުތައް ބޭނުންކޮށްގެން ހިދުމަތް ދޭން ދިރާގާ ހަވާލުކޮށްފި

ހުޅުމާލޭގެ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓްތައް ސަރަހައްދުގެ މޮބައިލް ކަވަރޭޖު ރަނގަޅު ކުރުމަށް އެޗްޑީސީން ދިރާގާއެކު މިއަދު އެއްބަސްވެއްޖެ އެވެ.

ހުޅުމާލެ ބަލަހައްޓާ ކުންފުނިން ބުނީ މި އެއްބަސްވުމުގެ ދަށުން، ހުޅުމާލޭގެ ދެވަނަ ފިޔަވައި އަދި ވަކިން ހާއްސަކޮށް ހިޔާ ފްލެޓް ސަރަހައްދުގެ މުވާސަލާތީ ގުޅުމާއި މޮބައިލް ކަވަރޭޖް ރަނގަޅުވާނެ ކަމަށެވެ.

އެޗްޑީސީން ބުނިގޮތުގައި ފޭސް ދޭއްގެ ޕްލޭނާ އެއްގޮތަށް އިތުރު ޓަވަރުތަކެއް ވެސް ހަރުކުރާނެ އެވެ. އެ ޓަވަރުތައް މެދުވެރިކޮށް، މުވާސަލާތީ ހިިދުމަތް ފޯރުކޮށްދޭން އެ ދާއިރާގައި މަސައްކުރާ އިތުރު ކުންފުނިތަކާ އެކު ކުރިމަގުގައި އެއްބަސްވުންތައް ހަދާނެ ކަމަށް އެޗްޑީސީން ބުނެ އެވެ.

އެ ޓަވަރުތަކުގެ ބޭނުމަކީ އެ ކުންފުނިން ބުނިގޮތުގައި، ވަކިވަކިން ގިނަ ޓަވަރުތަކެއް އެކި ކުންފުނިތަކުން ހަރުކުރުމުގެ ބަދަލުގައި ހުޅުމާލޭ ފޭސް ދޭއްގެ ތަރައްގީގެ ޕްލޭނާ އެއްގޮތަށް އެކަށީގެންވާ ވަރަށް ޓަވަރު ހަރުކޮށް، ހުރިހާ ފަރާތްތަކުން ވެސް ބައިވެރިވެގެން ހިދުމަތް ފޯރުކޮށްދިނުމެވެ.

"މި ގޮތަށް ޓަވަރުތައް ބޭނުން ކުރުމުން މުވާސަލާތީ ހިދުމަތްތައް ފޯރުކޮށްދެމުންދާ ކުންފުނިތަކުން ކުރަން ޖެހޭ އިންވެސްޓްމަންޓް ހަރަދު ކުޑަވެގެންދާނެ އެވެ،" އެޗްޑީސީން ބުންޏެވެ.

މިގޮތަށް އެކި ސަރަހައްދުތަކުގައި ޓަވަރުތައް ހަރުކުރުމުން ބިމުން ބޮޑު ބައެއް ސަލާމަތް ކުރެވޭނެ ކަން އެ ކުންފުނިން ފާހަގަކުރެ އެވެ. އަދި ހިދުމަތްތައް ފޯރުކޮށްދިނުމަށް ހޭދަވާ ވަގުތު ކުޑަވުމާއި އާންމުންނަށް އަވަހަށް ހިދުމަތް ލިބޭނެ ކަމަށް ބުންޏެވެ.

އެޗްޑީސީން ބުނާގޮތުގައި އެ ކުންފުނިން އަންނަނީ ހުޅުމާލޭގައި ފުރިހަމަ ޑިޖިޓަލް އިންފްރާސްޓްރަކްޗާއެއް ގާއިމުކޮށް، މުވާސަލާތީ ހިދުމަތްތަކުން ގުޅައިލުމަށް ގިނަ މަސައްކަތްތަކެއް ކުރަމުންނެވެ. އެގޮތުން ކުރިމަގުގައި މޮބައިލް ކަވަރޭޖް ރަނގަޅު ކުރުމަށް ރޫފްޓޮޕް ޕޯލްސް އާއި ސްޓްރީޓް ޕޯލްސް ހަރުކުރާނެ އެވެ. މި ހުރިހާ ޓަވަރުތަކާއި ޕޯލްތަކަކީ ވެސް މުވާސަލާތީ ހިދުމަތްތައް ފޯރުކޮށްދޭ ކުންފުނިތަކަށް ބޭނުން ކުރެވޭނެ ގޮތަށް ހަރުކުރާނެ ވަސީލަތްތަކެއް ކަމަށް އެ ކުންފުނިން ބުނެ އެވެ.