ބަދަލުދިނުމުގެ ކަންކަމުގައި އަހުމަދުގެ މަސްލަހަތު އެބައޮތް: ކޮމިޓީ

އެކި ފަރާތްތަކާއެކު، ސަރުކާރުން ހަދާފައިވާ އެއްބަސްވުންތައް ސަރުކާރުން އުވައިލުމުން ލިބޭ ގެއްލުމުގެ ބަދަލުދިނުމުގެ ކަންކަމުގައި ލީގަލް ކައުންސެލް ޓު ދަ ޕްރެޒިޑެންޓް އަހުމަދު އަބްދުﷲ އަފީފްގެ މަސްލަހަތު އޮންނަ ކަމަށް ވިދާޅުވެ، ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ މުގައްރިރު، އިމްތިޔާޒު ފަހުމީ (އިންތި) މިއަދު ފާޑުވިދާޅުވެއްޖެ އެވެ.

ރައީސް އޮފީހުން ރޭ ބޭއްވި ނޫސްވެރިންގެ ބަދަލުވުމެއްގައި އަހުމަދު ވިދާޅުވެފައި ވަނީ ދައުލަތުން ބަދަލު ދިނުން ލަސްވާ އަދި އިންސާފު ހޯދުން ވެސް ލަސްވާ އެއް ސަބަބަކީ ސިވިލް ޕްރޮސީޖާ ކޯޑް ނުވަތަ މަދަނީ އިޖުރާއަތުގެ ބިލް ރައްޔިތުންގެ މަޖިލީހުގައި އޮންނަތާ ގިނަ ދުވަސްތަކެއް ވުން ކަމަށެވެ.

އޭނާ ވިދާޅުވީ، ކޯޓުން ބޭރުން މައްސަލަ ހައްލު ކުރުމުން ދައުލަތަށް ވެސް މިހާތަނަށް ފައިދާވެފައިވާ މައްސަލަތައް އެބަހުރި ކަމަށެވެ. އެގޮތުން ބައެއް މައްސަލަތަކުގައި ދައުލަތަށް ބޮޑު ބުރައަކަށް ނުވާ ގޮތަށް ބަދަލު ދީފައިވާ ކަމަށް އޭނާ ވިދާޅުވި އެވެ.

ބަދަލު ދިނުމުގެ ކަންކަމާ ގުޅިގެން އަހުމަދު ވާހަކަ ދެއްކެވިއިރު މަންދު ކޮލެޖު ހިންގާ މާލޭ ހައި ޕްރައިވެޓް ލިމިޓެޑަށް، އޮޑިޓާ ޖެނެރަލް ހަސަން ޒިޔަތު ވިދާޅުވާ އަދަދަށް ވުރެ ބޮޑު އަދަދެއް ދިނުމަށް ސަރުކާރުން އެއްބަސްވެފައިވާ މައްސަލަ އޮތީ ހޫނުވެފަ އެވެ.

އަހުމަދަކީ މަންދު ކޮލެޖްގެ ޗެއާމަން އިބްރާޙީމް އިސްމާއިލް (އިބްރާ) ގެ ޅިޔަނެކެވެ. މަންދު ކޮލެޖް ތަމްސީލުކުރާ ލީގަލް ފާމުގައި ވެސް އަހުމަދު ހިމެނިވަޑައިގަންނަވަ އެވެ. އަހުމަދަކީ ދައުލަތުން އެކި ފަރާތްތަކަށް ބަދަލު ދިނުމާ ގުޅޭ ކަންކަން ނިންމުމަށް ސަރުކާރުން އުފައްދާފައިވާ ސެޓްލްމަންޓް ކޮމިޓީގެ މެމްބަރެއް ވެސް މެ އެވެ.

އޭނާގެ ވާހަކަތަކާ ގުޅިގެން ޖުޑިޝަރީ ކޮމިޓީން ބޭއްވި ނޫސްވެރިންގެ ބައްދަލުވުމުގައި އިންތި ވިދާޅުވީ "އެހެން ބައެއްގެ ބޮލަށް" ކަންކަން ކަނޑާލި ސަބަބު ސާފު ކަމަށެވެ.

"އެހެންވީމާ އެހެން ބައެއްގެ ބޮލުގައި އެ އިލްތިޒާމު އަޅުވަން އެ ނިއުސް ކޮންފަރެންސުން (ރައީސް އޮފީހުގެ ޕްރެސް ކޮންފަރެންސް) އެހާ ބޮޑަށް އެ ޝައުގުވެރިކަމާ އެކީގައި އެ ގެންދެވީ ކީއްވެކަން ]ސާފު[، އެ ވާހަކަފުޅު ދެއްކެވި ބޭފުޅާގެ އިންޓެގްރިޓީއާ މެދު ސުވާލު އުފައްދަން،" އިންތި ވިދާޅުވި އެވެ.

އޭނާ ވިދާޅުވީ، އޮޑިޓާ ޖެނަރަލް ހަސަން ޒިޔަތު އެސެސްމަންޓް ހެއްދެވުމަށް ފަހު، މަންދަށް އެންމެ ބޮޑު އެއްޗެއްގެ ގޮތުގައި ވެސް ނަގައިދޭން ޖެހެނީ މިލިއަނެއްހާ ރުފިޔާ ކަމަށް އެބަ އޮތް ކަމަށެވެ. މިކަމުގައި ބަންޑާރަ ނައިބްގެ އޮފީހާއި އެޑިއުކޭޝަން މިނިސްޓްރީން ދައްކާ ވާހަކަތައް ދިމާ ނުވާތީ އިންތި ވަނީ ކަންބޮޑުވުން ފާޅުކުރައްވައިފަ އެވެ.

ސިވިލް ޕްރޮސީޖާ ކޯޑް ނުވަތަ މަދަނީ އިޖުރާއަތުގެ ބިލެއް މިދިޔަ އަހަރުގެ ފެބްރުއަރީގައި ސަރުކާރުން މަޖިލީހަށް ފޮނުވި ނަމަވެސް އެ ބިލް އަދިވެސް އޮތީ މަޖިލީހުގެ ކޮމިޓީގައި ކަމަށް ރޭ އަހުމަދު ވިދާޅުވި އެވެ. އެކަމަކު، މަދަނީ އިޖުރާއަތުގެ ބިލުގެ ކަންކަން ދިޔަ ގޮތް އިންތި ސާފުކޮށްދެއްވި އެވެ.

އޭނާ ވިދާޅުވި ގޮތުގައި، ފެބްރުއަރީ 12، 2020 ގައި ބިލު އެންމެ ފުރަތަމަ މަޖިލީހުގެ ކޮމިޓީ އަށް ލިބި، ދިރާސާ ކުރަން ފަށާފައިވަނިކޮށް، ބަންޑާރަ ނައިބްގެ އޮފީހުން ވަނީ ފޮނުވުނީ ނުބައި ވާޝަނެއްކަން އަންގައިފަ އެވެ. އޭގެ ފަހުން، ޖުލައި 14، 2020 ގައި އެ ބިލުގެ ފުރަތަމަ ބަޔާއި ދެވަނަ ބައި އިސްލާހުކޮށް، ކޮމިޓީ އަށް ފޮނުވާފައިވާ ކަމަށް އޭނާ ވިދާޅުވި އެވެ.

އިމްތިޔާޒު ވިދާޅުވީ ޖުލައި 20 ގައި އެންމެ ފަހުން ކޮމިޓީން އާންމުންގެ ހިޔާލާއި ކޮމެންޓް ހޯދަން ހުޅުވާލި ކަމަށާއި މިދިޔަ އަހަރުގެ އޮގަސްޓް 6 ގެ ނިޔަލަށް އެ ފުރުސަތު ދިން ކަމަށެވެ. ނަމަވެސް އޮކްޓޫބަރު 13، 2020 ގައި ބިލުގެ މައްސަލަ އެއްކޮށް ނިންމައި، އޮކްޓޫބަރު 18، 2020 ގައި ފޮނުވާނެ ކަމަށް ސަރުކާރުން މަޖިލީހަށް އެންގި ކަމަށް އޭނާ ވިދާޅުވި އެވެ.

"18 އޮކްޓޫބަރުގައި މި ދެންނެވި ރަނގަޅު ވާޝަން ފޮނުއްވާނެ ކަމުގެ ޔަގީންްކަން ދެއްވި. އެކަން އެގޮތަށް ނުކުރުމުގެ ސަބަބުން މަޖިލީހުގެ ޖުޑީޝަރީ ކޮމިޓީން ވަރަށް ބޮޑަށް ކަންބޮޑުވި. އެއް ދުވަހެއްގެ ރަސްމީ ނިންމުމަކުން ކޮމިޓީން ނިންމީ މި ބިލުގެ މަސައްކަތް ކުރެވޭކަށް ނެތޭ ބަންޑާރަ ނައިބުގެ އޮފީހުން މި ބިލުގެ ރަނގަޅު ވާޝަން ނުފޮނުވުމުގެ ސަބަބުން،" ބިލު ކޮމިޓީން ބޭރުކޮށްލުމަށް ނިންމުމެއް ނިންމަން މަޖުބޫރުވި ކަމަށް އިންތި ވިދާޅުވެ އެވެ.

އޭނާ ވިދާޅުވީ، ކޮމިޓީން ބިލު ބޭރުކޮށްލުމުންް މަޖިލީހުގެ ތަޅުމަށް އަނބުރާ ފޮނުވައި، ބިލާ ގުޅޭ ބަހުސް އަލުން ފެށީ ސަރުކާރު ބަދުނާމުވެދާތީ އެގޮތަށް ކަންތައް ކުރައްވަން ބޭނުން ނުވުމުން ކަމަށެވެ.

އޭގެ ފަހުން، ވެސް ބަންޑާރަ ނައިބުގެ އޮފީހުން ބިލުގެ ރަނގަޅު ވާޝަން ފޮނުވުމަށް މަސައްކަތް ކުރަމުންދާ ކަމަށް އެ އޮފީހުން އެންގި ކަމަށް އިންތި ވިދާޅުވި އެވެ. އެންމެ ފަހުން ބިލު ލިބުނީ ނޮވެމްބަރު 4، 2020 ގައި ކަމަށާއި އޭރު މަޖިލީހުން ކުރަމުން ދިޔައީ ބަޖެޓްގެ މަސައްކަތް ކަމަށާއި އެއީ ރިސެސްއަށް ވެސް ދާ ދުވަސްވަރު ކަމަށް އިންތި ވިދާޅުވި އެވެ.

އޭނާ ވިދާޅުވީ، ބިލު މަޖިލީހަށް ފޮނުވަން އަހަރެއްހާ ދުވަސް ބޭކާރު ކޮށްލުމަށް ފަހު، ރޭގެ ނިއުސް ބްރީފިންގައި ރައީސް އޮފީހުން ދެއްކި ވާހަކަތައް ބަލައިނުގަނެވޭ ކަމަށެވެ.

ބަދަލު ދިނުމުގެ ކަންކަން ލަސްވެ، އިންސާފު ލަސްވަނީ ކޮމިޓީގެ ސަބަބުން ކަމަށް ދޭހަވާ ގޮތަށް ވާހަކަ ދެއްކެވިޔަސް އެކަމުގެ ޒިންމާ ކޮމިޓީން ނަގަން ނުޖެހޭނެ ކަމަށް ވެސް އިންތި ވިދާޅުވެ އެވެ. އަދި ބިލުގެ އަސްލު ވާޝަން ލިބުން ފަހުން، މަސައްކަތް ލަސްވި ކަމަށް ގަބޫލުނުކުރައްވާ ކަމަށް ވިދާޅުވި އެވެ.

އޭނާ ވިދާޅުވިގޮތުގައި، އެ ބިލްގެ މަސައްކަތް ކުރާނެ ގޮތުގެ ތާވަލެއް ވެސް މިހާރު ވަނީ ތައްޔާރުކޮށްފަ އެވެ.

މި އަހަރުގެ ފުރަތަމަ ދައުރަށް 33 ބިލެއް ސަރުކާރުން ފޮނުވާނެ ކަމަށް ބުނި ނަމަވެސް ލިބުނީ އެންމެ ހަތް ބިލު ކަމަށް އިންތި ވިދާޅުވި އެވެ. އޭގެ ތެރޭގައި ސަރުކާރުގެ ވައުދުގައި ހިމެނޭ، ކޯޓުތަކުގެ ގާނޫނަށް އިސްލާހު ގެނައުމުގެ ބިލާއި ފަނޑިޔާރުންގެ ގާނޫނަށް އިސްލާހު ގެނައުމުގެ ބިލް ނުހިމެނޭ ކަމަށް އޭނާ ވިދާޅުވި އެވެ.