ޑަބްލިއުއެޗްއޯގެ ލަފައާއެކު ވެކްސިންގެ ދެ ވަނަ ޑޯޒް ޖެހުމުގެ މުއްދަތާ ގުޅޭގޮތުން މަޝްވަރާކުރަނީ

ކޮވިޑުން ރައްކާތެރިވުމަށްޓަކައި ރާއްޖޭގައި މިހާރު ޖަހާ "ކޮވިޝީލްޑް" ވެކްސިންގެ ދެ ވަނަ ޑޯޒު ޖެހުމުގެ މުއްދަތު އިތުރުކުރުމާ ގުޅޭގޮތުން މަޝްވަރާ ކުރަމުން އަންނަ ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން މިއަދު ބުނެފި އެވެ.

އެ ސެންޓަރުގެ އިސް އޮފިޝަލު، ތަސްލީމާ އުސްމާން "މިހާރު" އަށް ވިދާޅުވީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ލަފައާ ގުޅިގެން ވެކްސިން ޖެހުމުގެ މުއްދަތާ ގުޅޭ ފަންނީ މަޝްވަރާތައް ކުރަމުން އަންނަ ކަމަށެވެ. މަޝްވަރާގައި އެ ލަފަޔަށް ރިއާޔަތް ކުރާނެ ކަމަށް ވިދާޅުވި އެވެ.

ރާއްޖޭގައި މިހާރު ބޭނުންކުރަމުން އަންނަނީ އޮކްސްފޯޑް ޔުނިވާސިޓީ އާއި އެސްޓްރެޒެނެކާ ކުންފުނީގެ ދިރާސާގެ މައްޗަށް އިންޑިއާގެ ސީރަމް އިންސްޓިޓިއުޓުން އުފައްދާފައިވާ ވެކްސިން "ކޮވިޝީލްޑް" އެވެ. އެ ގައުމުން ވަނީ ކޮވިޝީލްޑުގެ 100،000 ޑޯޒު ހަދިޔާކޮށްފަ އެވެ.

އޮކްސްފޯޑް ޔުނިވާސިޓީ އާއި އެސްޓްރެޒެނެކާ ކުންފުނިން އުފެއްދި ވެކްސިންގެ 700،000 ޑޯޒު ގަންނަން ވެސް ސިންގަޕޫރުގެ އެސްޓްރެޒެނެކާ ކުންފުންޏަކާ އެކު ވަނީ ސޮއިކޮށްފަ އެވެ.

ކޮވިޑުން ބަލިން ދިފާއުވުމަށް މި މަހުގެ އެއްވަނަ ދުވަހު ވެކްސިން ޖަހަން ފަށައިފައި ވެ އެވެ. ރާއްޖޭގައި ހަމަޖައްސާފައިވާ ގޮތުން ވެކްސިންގެ ދެ ވަނަ ޑޯޒު ޖަހާނީ، ފުރަތަމަ ޑޯޒު ޖަހާތާ ހަތަރު ހަފުތާ ފަހުންނެވެ.

އެކަމަކު ޑަބްލިއުއެޗްއޯ އިން މިިދިޔަ ބުދަ ދުވަހު ބޭއްވި ނިއުސް ކޮންފަރެންސްގައި ބުނީ އޮކްސްފޯޑް/އެސްޓްރަޒެނެކާ އިން އުފެއްދި ވެކްސިންގެ ދެ ވަނަ ޑޯޒު ޖަހަން އެންމެ ރަނގަޅީ ފުރަތަމަ ޑޯޒަށް ފަހު 8-12 ހަފުތާ ފަހުން ދޭ ގޮތަށް ކަމަށެވެ.

އެ ޖަމިއްޔާ އިން ވަނީ އުމުރުން 18 އަހަރުން މަތީގެ އެންމެން އޮކްސްފޯޑް ޔުނިވާސިޓީ އާއި އެސްޓްރެޒެނެކާގެ ވެކްސިން ޖެހުމަށް ލަފާ ވެސް ދީފަ އެވެ.

ރާއްޖޭގައި މިހާތަނަށް 33،106 މީހުންނަށް ވެކްސިން ދީފައި ވެ އެވެ.