"ހެޔޮއެދޭ ފަރާތަކުން" ސިނޯފާމް ކޮވިޑް ވެކްސިންގެ އިތުރު 5،000 ޑޯޒް

ޗައިނާގެ ސިނޯފާމުން ކޮވިޑް-19 އާ ދެކޮޅަށް އުފެއްދި ވެކްސިންގެ އިތުރު 5،000 ޑޯޒް ރާއްޖެއަށް ލިބިފައިވާ ކަމަށާއި މިއީ ވެސް ހެޔޮ އެދޭ ފަރާތަކުން ހަދިޔާކުރި އެއްޗެއް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.

ކޮވިޑް ވެކްސިންގެ އިތުރު 5،000 ޑޯޒް އިއްޔެ ލިބިފައިވާ ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް އިއްޔެ ވިދާޅުވި އެވެ. އެކަމަކު އެ ވެކްސިންގެ ތަފްސީލެއް ނުދެއްވަ އެވެ.

އެޗްޕީއޭއިން ބުނީ މިހާރު ޖަހަމުންދާ ކޮވިޝީލްޑް ވެކްސިނެކޭ އެއްގޮތަށް މި ވެކްސިން ވެސް ޖަހަން ފަށާނީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ހުއްދަ ދިނުމުން ކަމަށެވެ.

މީގެ ކުރިން ވެސް "ހެޔޮ އެދޭ ފަރާތަކުން" ޗައިނާ ވެކްސިންގެ 5،000 ޑޯޒް ހަދިޔާކުރި ކަމަށް އެޗްޕީއޭއިން ބުނެފައިވެ އެވެ. މިފަހަރު ވެސް ވެކްސިން ހަދިޔާކުރީ ނަން ހާމަކުރަން ބޭނުން ނުވާ ފަރާތަކުން ކަމަށް އެޗްޕީއޭ އިން ބުންޏެވެ.

އަލަށް ލިބުނު 5،000 ޑޯޒް ވެކްސިނާ އެކު ސިނޯފާމްގެ 10،000 ޑޯޒް ވެކްސިން ރާއްޖެއަށް ލިބުނީ އެވެ.

ޗައިނާ ސަރުކާރުން ރާއްޖެއަށް 100،000 ޑޯޒް ވެކްސިން ހަދިޔާ ކުރަން ނިންމާފައިވާ ކަމަށް، އެ ގައުމުން ފަރާތުން ރާއްޖެއަށް ކަނޑައަޅާފައިވާ ސަފީރު ޒަންގް ލިއޮން ވަނީ ވިދާޅުވެފަ އެވެ. އަދި އެ ތަކެތި ރާއްޖެއަށް އަވަހަށް ގެނެވޭ ގޮތެއް ހަމަޖައްސަން މަޝްވަރާތައް ކުރިއަށް ގެންދާ ކަމަށް ވެސް ސަފީރު ވިދާޅުވި އެވެ.

ޗައިނާގެ ސިނޯފާމް ވެކްސިނަށް ބައެއް ގައުމުތަކުން ހުއްދަދީ ބޭނުން ކުރަން ވަނީ ފަށައިފަ އެވެ. ރާއްޖޭގައި މިވަގުތު ޖަހަމުން އަންނަނީ އިންޑިއާއިން ހަދިޔާކުރި ކޮވިޝީލްޑް ވެކްސިނެވެ. އިންޑިއާ އިން ވެސް ރާއްޖެ އަށް 100،000 ޑޯޒް ހަދިޔާކުރި އެވެ. މި ވެކްސިން މިހާތަނަށް 20،000 އަށް ވުރެ ގިނަ މީހުން ވަނީ ޖަހައިފަ އެވެ.