ޗައިނާގެ ހާލަތު މޮނީޓާކުރަނީ؛ އުމްރާއިން މީހުން އައުމާ ދިމާކޮށް ވެސް ބަލި އިތުރުވެދާނެ: އެޗްޕީއޭ

ޗައިނާގައި ފެތުރެމުންދާ ނޭވާލާ ނިޒާމަށް ޖެހޭ ބަލިތަކުގެ ހާލަތު މޮނީޓާކުރަމުން އަންނަ ކަމަށާއި އުމްރާގެ އަޅުކަމަށް ފަހު ގިނަ ބަޔަކު ރާއްޖެ އަންނާތީ ވެސް މި ދުވަސްވަރު ބަލިތައް އިތުރުވާނެ ކަމަށް ލަފާކުރެވޭ ކަމަށް އެޗްޕީއޭއިން މިއަދު ބުނެފި އެވެ.

ހެލްތު މިނިސްޓްރީގެ މީޑިއާ ގްރޫޕުގައި ނޫސްވެރިން ކުރަމުންދިޔަ ސުވާލުތަކާ ގުޅިގެން މީޑިއާ އޮފިޝަލް ވިދާޅުވީ ޗައިނާގައި ފެތުރޭ ރޯގާގެ ހާލަތު ބަލަމުން އަންނަ ކަމަށެވެ.

މިއީ ވަރަށް ގިނަ ބަޔަކު އުމްރާއިންނާއި އެކި ސަރަހައްދުތަކަށް ދަތުރުކުރުމަށް ފަހު އެނބުރި އަންނަ ދުވަސްވަރަށް ވުމުން، ނޭވާލާ ނިޒާމުގެ ބަލިތައް މި ދުވަސްކޮޅު އިތުރުވާނެ ކަމަށް ލަފާކުރެވޭ ކަމަށް އޮފިޝަލް ވިދާޅުވި އެވެ.

އެހެންވެ، އެޗްޕީއޭއިން ވަނީ ރޯގާ އަދި ކެއްސުން ފަދަ އަލާމާތްތައް ހުންނަ ނަމަ އާއްމު ތަންތަނަށް ނުކުންނައިރު މާސްކް އަޅައިގެން އުޅުމާއި އުމުރުން ދުވަސްވީ މީހުންނާއި ކުޑަކުދިންނަށް ޒިޔާރަތް ނުކުރަން އެދިފަ އެވެ.

ނޭވާލަން އުނދަގޫވާ ނަމަ ނުވަތަ މޭގައި ރިއްސައި އާދަޔާ ހިލާފަށް ވަރުބަލިވުން ފަދަ ކަމެއް ދިމާވާ ނަމަ ޑޮކްޓަރެއްގެ ލަފާ ހޯދަން ވެސް އިލްތިމާސްކޮށްފައިވެ އެވެ. އެކަމަކު، ބަލިޖެހި، ބޮޑުވަރުވެދާނެ ކަމަށް ބެލެވޭ މީހުން، ބަލީގައި ބޮޑުވަރު ނުވިއަސް އަވަހަށް ސިއްހީ ފަރުވާ ހޯދުން މުހިއްމު ކަމަށް ބުންޏެވެ.

ޗައިނާގެ ސީޑީސީއާ ހަވާލައިދީ ޑަބްލިއުއެޗްއޯއިން ބުނީ މިދިޔަ ނޮވެމްބަރު ދެ ވަނަ ހަފުތާއިން ފެށިގެން، ނޭވާލާ ނިޒާމުގެ ބަލިތައް އިތުރުވަމުންދާކަން ފާހަގަކުރެވިފައިވާ ކަމަށެވެ. ނަމަވެސް، އެ ގައުމުގައި ފެތުރެނީ އާއްމުކޮށް ވެސް ދައުރުވާ ނޭވާލާ ނިޒާމުގެ ބަލިތަކެއް ކަމަށް ބުންޏެވެ.

އޭގެ ތެރޭގައި އެންމެ ގިނައީ އިންފްލުއެންޒާ އެވެ. އާރްއެސްވީ، ރައިނޯވައިރަސް، އެޑިނޯވައިރަސް، މައިކޯޕްލާސްމާ ނިމުއޯނިއާ އަދި ހިއުމަން މެޓަނިއުމޯވައިރަސް އަކީ ވެސް ޗައިނާއިން ފެންނަމުންދާ އާއްމު ބަލިތަކެވެ.

އެ ހާލަތާ ގުޅިގެން ޗައިނާގައި އިމަޖެންސީއެއް އިއުލާނެއް ނުކުރެ އެވެ.

ފިނި މޫސުމުގެ މި ދުވަސްވަރާ ދިމާކޮށް ޗައިނާ އަދި އެހެން ގައުމުތަކުގައި އާއްމުކޮށް ނޭވާލާ ނިޒާމުގެ ބަލިތައް އިތުރުވެ އެވެ. ޗައިނާއިން ބުނީ އެ ގައުމުގައި ވެސް ފެތުރެމުން ދަނީ ފިނި މޫސުމުގެ އާންމު ރޯގާތައް ކަމަށާއި އެކަމަކު މިދިޔަ އަހަރާ އަޅާބަލާއިރު ޗައިނާގައި މި ފަހަރު އެ ބަލިތައް ޖެހޭ މީހުންނާއި ބަލީގައި ބޮޑުވަރުވާ މީހުންގެ ނިސްބަތް މަދު ކަމަށެވެ.