އަލީބާބާގެ ފައުންޑަރު، ޖެކް މާ އެހީވާ ގައުމުތަކުގެ ލިސްޓަށް ރާއްޖެ

އޭޝިއާގެ އެންމެ މުއްސަނދި މީހާ އަދި މަޝްހޫރު އޮންލައިން ބިޒްނަސް ޗެއިން އަލީބާބާގެ ފައުންޑާ ޖެކް މާ، ކޮވިޑް-19އާ ގުޅިގެން ޜާއްޖެ އަށް ވެސް އެހީތެރިކަން ފޯރުކޮށްދޭން ނިންމައިފި އެވެ.

ރާއްޖޭގެ އިތުރުން އޭޝިއާގެ ބައެއް އެހެން ގައުމުތަކަށް ވެސް އެހީވުމަށް އޭނާ ވަނީ ކަނޑައަޅުއްވައިފަ އެވެ.

ޖެކް މާ ކުރެއްވި ޓުވީޓެއްގައި ވިދާޅުވީ، ރާއްޖޭގެ އިތުރުން އަފްގާނިސްތާން، ބަންގްލަދޭޝް، ކެމްބޯޑިއާ، ލާއޯސް، މޮންގޯލިއާ، މިޔަންމާ، ނޭޕާލް ޕާކިސްތާން އަދި ސްރީ ލަންކާ އަށް ވެސް އެހީވާން ނިންމަވާފައިވާ ކަމަށެވެ.

އެގޮތުން 1.8 މިލިއަން މާސްކާއި 210،000 ޓެސްޓު ކިޓާއި 36،000 ހަޒްމަޓް ސޫޓާއި ވެންޓިލޭޓަރާއި ތާމޯމީޓަރު ވެސް ދެއްވާނެ ކަމަށް ޖެކް މާ ވިދާޅުވި އެވެ.

ޖެކް މާ ވަނީ މީގެ ކުރިން ވެސް އެހެން ގައުމުތަކަށް އެހީތެރިކަން ފޯރުކޮށް ދެއްވައިފަ އެވެ. އޭގެ ތެރޭގައި، މެލޭޝިއާ، އިންޑޮނޭޝިއާ، ޖަޕާން އަދި ތައިލެންޑުގެ އިތުރުން ޔޫރަޕުގެ ބައެއް ގައުމުތައް ކަމަށްވާ، އިޓަލީ އާއި ސްޕެއިނަށް އޭނާ ވަނީ މެޑިކަލް އެހީގެ އިތުރަށް ކާބޯތަކެތި ވެސް ފޯރުކޮށްދީފަ އެވެ.

އަދި، އެފްރިކާ އާއި އެމެރިކާ އަށް ވެސް ޖެކް މާގެ އެހީތެރިކަން ލިބިފައިވެ އެވެ.

ޗައިނާގެ މަޝްހޫރު ވިޔަފާރިވެރިޔާ ޖެކް މާ، ގިނަ ގައުމުތަކަކަށް އެހީތެރިކަން ފޯރުކޮށް ދެއްވަމުން އަންނައިރު، ކޮވިޑް ބަލީގެ އެންމެ ބޮޑު އަސަރެއް ކުރީ އެ ގައުމަށެވެ. ނަމަވެސް ޗައިނާ އިން އެޅި ހަރުދަނާ ފިޔަވަޅުތަކާ އެކު، އެ ގައުމު މިހާރު ވަނީ މި ބަލިން ގާތްގަނޑަކަށް ސަލާމާތް ވެފަ އެވެ.

މުޅި ދުނިޔެއަށް ބަލާއިރު މިހާރު މި ވައިރަހުން އެންމެ ބޮޑަށް ގެއްލުންވެފައިވާ ގައުމުތަކަކުގެ ތެރޭގައި، އިޓަލީ، ސްޕެއިން އަދި މެލޭޝިއާ ހިމެނެ އެވެ. ޗައިނާ އިން މަރުވި މީހުންނަށް ވުރެ ގިނަ މީހުން އިޓަލީން މިހާރު ވެސް ވަނީ މަރުވެ ފައެވެ. އިޓަލީން މިހާތަނަށް ވަނީ 4،032 މީހުން މަރުވެފަ އެވެ. ސްޕެއިނުން މަރުވީ 1،093 މީހެކެވެ.

ރާއްޖެ އަށް ވެސް ކޮރޯނާވައިރަސް އައިސްފައިވާއިރު، މިހާތަނަށް ޕޮޒިޓިވްވެފައި ވަނީ 13 މީހުންނެވެ. އޭގެ ތެރެއިން ދެ މީހަކު ވަނީ ރަނގަޅުވެފަ އެވެ. ބަތަލާގެ އެ ޓޫރިސްޓް ދެމަފިރިގެންގެ ތެރެއިން ހާލު ބޮޑުވީ އުމުރުން 72 އަހަރުގެ ފިރިހެންމީހާ އެވެ. އިޓަލީގެ އެ ދެ މީހުން ފަރުވާ އަށް ފަހު، އައިސޮލޭޝަން ފެސިލިޓީ އަކަށް ބަދަލު ކުރަން ސަރުކާރުން ވަނީ ނިންމައިފަ އެެވެ.

ރާއްޖެ އިން ކޮވިޑް ބަލީގެ އެއްވެސް ދިވެއްސަކު ނުފެނެ އެވެ.

މި ބަލި ރާއްޖެ އައިސްފައިވަނީ، ކުރެއްދޫ އައިލެންޑް ރިސޯޓަށް އައި އިޓަލީގެ ޓޫރިސްޓެއްގެ ފަރާތުންނެވެ. އެކަމަކު، އޭނާ ކޮވިޑް ބައްޔަށް ޕޮޒިޓިވްވިކަން އެނގުނީ އަނބުރާ ގައުމަށް ދިއުމުންނެވެ.