އާ ވައިރަހާ ގުޅިގެން ޔޫކޭގެ ދަތުރުވެރިން ލަންކާ އަށް ދިއުން މަނާކޮށްފި

ކޮލަމްބޯ (ޑިސެމްބަރު 23) - އިނގިރޭސި ވިލާތުން ފެނިގެން އުޅޭ ކޮރޯނާވައިރަހުގެ އާ ވޭރިއަންޓާ ގުޅިގެން އެ ގައުމުން ދަތުރުކުރާ މީހުން ސްރީ ލަންކާ އަށް އެތެރެވުން މަނާކޮށްފި އެވެ.

ސްރީ ލަންކާގެ ކޮވިޑް ކޮމިޓީގެ އިއްޔެގެ ބައްދަލުވުމުގައި ނިންމާފައި ވަނީ އިނގިރޭސި ވިލާތުން ދަތުރު ކުރާ މީހުން ލަންކާ އަށް އެތެރެވުން ވަގުތުން މަނާކުރުމަށެވެ. އިނގިރޭސި ވިލާތުން އިއްޔެ ލަންކާ އަށް ދިޔަ މީހުން ވަނީ ޕީސީއާރް ޓެސްޓް ހަދައި، ވަކި ހޮޓާތަކެއްގައި 14 ދުވަހަށް ކަރަންޓީން ކޮށްފަ އެވެ. އަދި އިތުރު 14 ދުވަހު އެ މީހުން ގޭގައި ކަރަންޓީނު ވާން ޖެހޭނެ އެވެ.

ލަންޑަނުން ދަތުރު ކުރާ ކާގޯ ބޯޓުތަކުގެ ކްރޫން ވެސް ލަންކާގައި 14 ދުވަހު ކަރަންޓީނުވާން ޖެހެ އެވެ.

އެއާޕޯޓް އެންޑް އޭވިއޭޝަން ސާވިސަސް ޗެއާމަން މޭޖާ ޖެނެރަލް ޖީއޭ ޗަންދުރަސިރީ ވިދާޅުވީ ޔޫކޭ ފްލައިޓްތައް މަނާކުރުމުގެ އިތުރުން ޔޫކޭ އިން އަންނަ މީހުން ޓްރާންސިޓް ކުރުން ވެސް މަނާވާނެ ކަމަށެވެ.

ކޮވިޑް ކޮމިޓީގެ ބައްދަލުވުމުގައި ރައީސް ގޯޓާބޭ ރާޖަޕަކްސާ ވަނީ ކޮރޯނާވައިރަހުގެ ވެކްސިން ލަންކާ އަށް ވީހާވެސް އަވަހަކަށް ގެނައުމާ ގުޅޭ ގޮތުން މަޝްވަރާ ކުރައްވައިފަ އެވެ.

ސްރީ ލަންކާ ސަރުކާރުން ވަނީ މި މަހު 26 އިން ފެށިގެން ޓޫރިސްޓުންނަށް އެ ގައުމުގެ އެއާޕޯޓްތައް ހުޅުވާލާ ގޮތަށް ނިންމައިފަ އެވެ.

ލަންކާ ކެބިނެޓުގެ ތަރުޖަމާން ރަމޭޝް ޕަތިރަނަ ވިދާޅުވީ ޔޫކޭ އާއި ޔޫރަޕުގެ ބައެއް ގައުމުތަކުން ފެނިގެން އުޅޭ އާ ވައިރަހާ ގުޅިގެން ލަންކާގައި ސިއްހީ ގައިޑްލައިންތައް ވަރުގަދަކުރަމުން އަންނަ ކަމަށެވެ.

ސްރީ ލަންކާ އިން މިހާތަނަށް ވަނީ 38,059 މީހުން ކޮރޯނާވައިރަހަށް ޕޮޒިޓިވްވެ 183 މީހުން މަރުވެފަ އެވެ.