ލަންކާގެ ކުރީގެ ރައީސުންގެ އިމްތިޔާޒްތައް ކަނޑާލާ ބިލު ފާސްކުރުމާ އެކު ރާޖަޕަކްސާ "ގަނޑުވަރު" ހުސްކުރަނީ

ސްރީ ލަންކާގެ ކުރީގެ ރައީސުންގެ އިމްތިޔާޒްތަކުގެ ގާނޫނު އުވާލަން ހުށަހެޅި " ޕްރެޒިޑެންޓްސް އެންޓައިޓުލްމެންޓް ރިޕީލް ބިލް" ފާސްކުރުމާ އެކު ކުރީގެ ރައީސުންގެ ތެރެއިން އެންމެ ނުފޫޒު ގަދަ ލީޑަރު މަހިންދަ ރާޖަޕަކްސަގެ ރަސްމީ ގެކޮޅު ހުސްކުރަން ނިންމަވައިފި އެވެ.

ސްރީ ލަންކާގެ ނޫސްތަކުން ބުނީ ރަސްމީ ގެކޮޅު ހުސްކުރަން މަހިންދަ ތައްޔާރުވެވަޑައިގެންފައިވާކަން މައުލޫމާތު އެނގޭ މަސްދަރުތަކުން ކަށަވަރުކޮށްދީފައިވާ ކަމަށެވެ.

ކުރީގެ ރައީސުންގެ އިނާޔަތްތައް އުވާލާ ބިލު ލަންކާގެ ގާނޫނު ހަދާ މަޖިލީހުން މިއަދު ފާސްކުރީ 151 މެންބަރުންގެ ވޯޓުންނެވެ. އެ ބިލު ފާސްކުރުމާ ދެކޮޅަށް ވޯޓު ދެއްވީ އެންމެ މެމްބަރެކެވެ.

ލަންކާގެ މަޖިލިސް ރައީސް ސޮއިކުރެއްވުމާ އެކު އެ ބިލް ގާނޫނަކަށް ވުމުން ކުރީގެ ހުރިހާ ރައީސުން ވެސް އެ ބޭފުޅުން މިހާރު ދިރިއުޅުއްވާ ދައުލަތުގެ އިމާރާތްތަކުން ނުކުމެވަޑައިގަންނަވަން ޖެހޭނެ އެވެ.

އެ ބިލަށް ބަހުސްކުރި އިރު ގާތްގަނޑަކަށް މުޅި ބަހުސްގެ ވެސް އަމާޒަކަށް ވެފައި އޮތީ މަހިންދަ ދިރިއުޅުއްވާ ގެކޮޅަށެވެ. ލަންކާގެ މިހާރުގެ ރައީސް އަނޫރަ ކުމާރަ ޑިސަނަޔަކަ ވިދާޅުވަމުން ގެންދަވާ ގޮތުގައި އެ ގެކޮޅުގެ ކަންތައްތައް ބަލަހައްޓަން ދައުލަތުން ބޮޑު ހޭދައެއް ކުރަން ޖެހެ އެވެ. ހަމަ އެކަނި އެ ގެކޮޅުގެ ރެންޓަލް ވެލިއު (ކުއްޔަށް ދީފި ނަމަ ލިބޭނެ އާމްދަނީގެ އަގު) މަހަކު 4.6 މިލިޔަން ރުޕީސް އަށް އަރާ ކަމަށް ޑިސަނަޔަކަ ވިދާޅުވި އެވެ.

އެ ގެކޮޅުން ނުކުންނަވަން ރަސްމީކޮށް އަންގައިފި ނަމަ ނުކުންނަވާނެ ކަމަށް މަހިންދަ ވަނީ މީގެ ކުރިން ވެސް ވިދާޅުވެފަ އެވެ. ނަމަވެސް ރައީސުންގެ އިމްތިޔާޒުތަކުގެ ގާނޫނު އުވާލަން ހުށަހެޅީ ސިޔާސީ ގޮތުން ބަދަލުހިފުމުގެ ގޮތުން ކަމަށް އޭނާ ތުހުމަތުކުރެއްވި އެވެ.

ބިލު ގާނޫނަކަށް ވުމުން ކުރީގެ ދެ ރައީސުން ކަމަށްވާ މައިތިރިޕާލާ ސިރިސޭނާ އާއި ޗަންދުރިކާ ބަންޑާރަނައިކަ ކުމާރަތުންގަ ވެސް އެ ބޭފުޅުން މިހާރު ދިރިއުޅުއްވާ ގެކޮޅުތަކުން ނުކުމެވަޑައިގަންނަވަން ޖެހިވަޑައިގަންނަވާނެ އެވެ.