ކޭސްތައް އިތުރުވުމުން ލަންކާގެ ކަރަންޓީން ސެންޓަރެއް ހޮސްޕިޓަލަކަށް

ކޮލަމްބޯ (ޖުލައި 12) - ސްރީ ލަންކާގައި ކޮރޯނާވައިރަހުގެ ކޭސްތައް އިތުރުވާން ފެށުމުން ކަރަންޓީނު ސެންޓަރެއްގެ ގޮތުގައި ބޭނުންކުރި ފެސިލިޓީއެއް 500 އެނދުގެ ހޮސްޕިޓަލަކަށް ބަދަލުކޮށްފައިވާ ކަމަށް އަސްކަރިއްޔާ އިން ބުނެފި އެވެ.

ސިފައިންގެ ވެރިޔާ ޝަވެންދުރަ ސިލްވާ ވިދާޅުވީ ލަންކާގެ އިރުމަތީގައި ސިފައިން ހިންގާ ކަންޑަކަޑު ފެސިލިޓީ ހޮސްޕިޓަލަކަށް ބަަދަލުކުރީ ބުރާސްފަތި ދުވަހުން ފެށިގެން ޕޮޒިޓިވް ކޭސްތައް އިތުރުވާން ފެށުމުން ކަމަށެވެ.

"ކަރަންޓީން ސެންޓަރު ވަނީ 500 އެނދުގެ ފީލްޑް ހޮސްޕިޓަލަކަށް ބަދަލުކޮށްފައި،" ސިލްވާ ނެރުއްވި ބަޔާނެއްގައި ވިދާޅުވެފައިވެ އެވެ.

އޭނާ ވިދާޅުވީ ވެރިރަށް ކޮލަމްބޯގެ އިރުން 157 މޭލު ދުރުގައިވާ ކަންޑަކަޑު ޑްރަގު ރިހެބިލިޓޭޝަން ސެންޓަރުން ޕޮޒިޓިވްވި 253 މީހުން ވަނީ ބުރާސްފަތި ދުވަހު ފީލްޑް ހޮސްޕިޓަލަށް ބަދަލުކޮށްފައި ކަމަށެވެ.

ހުކުރު ދުވަހު ވެސް ވަނީ އިތުރު 97 މީހުން ޕޮޒިޓިވްވެފަ އެވެ. އޭގެ ތެރޭން 87 މީހުން ޕޮޒިޓިވްވީ ރިހެބް ސެންޓަރުންނެވެ. އެހެންކަމުން ހެލްތު އޮފިޝަލުން ބުނެފައި ވަނީ ލަންކާގައި ދެ ވަނަ ރާޅެއްގެ ބިރު މިހާރު ބޮޑު ކަމަށެވެ.

ރިހެބް ސެންޓަރުން ވެލިކަޑަ ޖަލަށް ބަދަލުކުރި ގައިދީއަކު އަންގާރަ ދުވަހު ޕޮޒިޓިވްވުމާ ގުޅިގެން ކަންޑަކަޑު ސެންޓަރުގެ އެންމެން ޓެސްޓް ކުރުމުގެ މަސައްކަތް ވަނީ ފަށައިފަ އެވެ.

ލަންކާގައި ޕޮޒިޓިވް ކޭސްތައް އިތުރުވާން ފަށާފައި ވަނީ ކޮމިއުނިޓީ ސްޕްރެޑެއް އެ ގައުމުގައި ނެތް ކަމަށް ބުނެ ލޮކްޑައުން އުވާލާފައި ވަނިކޮށެވެ. ލަންކާ އިން ބުނެފައި ވަނީ އެޕްރީލް މަހު ފަހުކޮޅުން ފެށިގެން އެ ގައުމުގައި ކޮމިއުނިޓީ ސްޕްރެޑެއް ނެތް ކަމަށެވެ. ބުރާސްފަތި ދުވަހުގެ ކުރިން ލަންކާ އިން ފެންނަމުންދިޔަ ޕޮޒިޓިވް ކޭސްތައް ގުޅިފައި ވަނީ ބޭރު ގައުމުތަކުން އެ ގައުމަށް ގެންނަ މީހުންނާ އެވެ.

ކޮރޯނާވައިރަހުގެ ފުރަތަމަ ޕޮޒިޓިވް ކޭސް ޖެނުއަރީ 27 ގައި ލަންކާ އިން ފެނުނު ފަހުން މިހާތަނަށް ވަނީ 2,511 މީހުން ޕޮޒިޓިވްވެ 11 މީހުން މަރުވެފަ އެވެ.