ލަންކާއަށް ދާ މީހުން 14 ދުވަހަށް ކަރަންޓީން ވާންޖެހޭ ގޮތަށް ހަދައިފި

ސްރީލަންކާއަށް ދަތުރުކުރާ މީހުން އެ ގައުމުގައި 14 ދުވަހަށް ކަރަންޓީން ވާންޖެހޭ ގޮތަށް އެ ގައުމުން ހަމަޖައްސައިފި އެވެ.

ކޮވިޑް-19 ގެ ހާލަތު އަނެއްކާވެސް ގޯސްވާން ފެށުމުން ގިނަ ގައުމުތަކުން ދަނީ ރައްކާތެރިކަމުގެ ފިޔަވަޅުތައް ވަރުގަދަ ކުރަމުންނެވެ.

ރާއްޖޭގެ ފޮރިން މިނިސްޓްރީން ނެރުނު ބަޔާނެއްގައިވަނީ މި މަސް ނިމެންދެން ސްރީލަންކާއަށް ދާ މީހުން އެ ގައުމުގެ ސަރުކާރުން ކަނޑައަޅާ ހޮޓަލެއްގައި 14 ދުވަހަށް ކަރަންޓީން ވާންޖެހޭ ކަމަށް އެ ގައުމުން ނިންމާފައިވާ ކަމަށެވެ. އަދި ކަރަންޓީން ފުރިހަމަ ކުރިޔަސް، ކަރަންޓީނުން ދޫކުރެވޭނީ އެ ގައުމަށް އެތެރެވާ ދުވަހު ހަދާ ޕީސީއާރު ޓެސްޓާއި ކަރަންޓީނުގެ 11 ވަނަ ދުވަހު އަދި 14 ވަނަ ދުވަހު ހަދާ އެގްޒިޓް ޕީސީއާރު ޓެސްޓުގެ ނަތީޖާ ނެގެޓިވުމުން ކަމަށް އެ ބަޔާނުގައިވެ އެވެ. އެހެން ނަމަވެސް ދެ އަހަރުން ދަށުގެ ކުދިން ކަރަންޓީނުން ދޫކުރުމުގައި ޕީސީއާރު ޓެސްޓް ހަދަން ނުޖެހޭނެ ކަމަށް ވެސް އެ ބަޔާނުގައިވެ އެވެ.

އެ ބަޔާނުގައިވާ ގޮތުން އެގޮތަށް ހަމަޖެއްސިޔަސް، އިމަޖެންސީ ފަރުވާތަކަށް ދާ މީހުންގެ ތެރެއިން ހޮސްޕިޓަލްގައި ކަރަންޓީން ވާން ބޭނުންވާ މީހުންނަށް ހާއްސަ ހުއްދައެއްގެ ދަށުން އެ ފުރުސަތު އޮންނާނެ އެވެ. އެހެންކަމުން ލަންކާއަށް ދަތުރުކުރާ ދިވެހިން އެކަމަށް ސަމާލުވާން އެދޭ ކަމަށް އެ ބަޔާނުގައިވެ އެވެ.

ކޮވިޑް-19 އަށް ޕޮޒިޓިވްވާ މީހުންގެ އަދަދު އަނެއްކާވެސް އިތުރުވާން ފެށުމުން ރާއްޖޭގައި ވެސް ދަނީ ރައްކާތެރިކަމުގެ ފިޔަވަޅުތައް ވަރުގަދަ ކުރަމުންނެވެ.