ދިވެހިންނަށް ކުރިއެކޭ އެއްގޮތަށް ވިސާ ލިބޭނެ ކަމުގެ ޔަގީންކަން ލަންކާ ސަރުކާރުން ދީފި

ސްރީ ލަންކާ އަށް ދަތުރުކުރާ ދިވެހިންނަށް މިހާރު ވެސް އޮތް ގޮތަށް އެއްވެސް ދަތިކަމެއް ނެތި ވިސާ ލިބޭނެ ކަމުގެ ޔަގީންކަން އެ ގައުމުގެ ފޮރިން މިނިސްޓްރީން މިއަދު ދީފި އެވެ.

ރާއްޖޭގެ ފޮރިން މިނިސްޓްރީން މިރޭ ނެރުނު ނޫސްބަޔާނެއްގައި ބުނީ މިނިސްޓަރު މޫސާ ޒަމީރު ލަންކާ އަށް މިހާރު ކުރައްވާ ދަތުރުގައި މިއަދު އެ ގައުމުގެ ޕަބްލިކް ސެކިޔުރިޓީ މިނިސްޓަރު ޓިރަން އަލެސްއާ ބައްދަލުކުރައްވާފައިވާ ކަމަށެވެ.

އެ ބައްދަލުކުރެއްވުމުގައި، ލަންކާގައި ދިރިއުޅޭ އަދި އެ ގައުމަށް ދަތުރުކުރާ ދިވެހިންނަށް ވިސާ ހޯދުމުގައި ދިމާވެފައިވާ ދަތިތައް ހައްލުކުރުމާ ގުޅޭ ގޮތުން މަޝްވަރާ ކުރެއްވި ކަމަށް އެ ބަޔާނުގައި ބުންޏެވެ.

މިނިސްޓްރީން ބުނީ ލަންކާގައި އޮން އެރައިވަލް ވިސާ ދިނުމުގެ އުސޫލަށް ދާދި ފަހުން ގެނައި ބަދަލާ ގުޅިގެން ދިވެހިންނަށް ކުރިމަތިވެފައިވާ ދަތިތައް ޒަމީރު ހިއްސާކުރައްވައި އެކަމަށް އަވަސް ހައްލެއް ހޯދައި ދެއްވުމަށް އެދިވަޑައިގެންނެވި ކަމަށެވެ.

"އެ ކަންބޮޑުވުންތަކާ ގުޅިގެން މިނިސްޓަ އޮފް ޕަބްލިކް ސެކިޔުރިޓީ ޓިރަން އަލެސް ވަނީ ދެ ގައުމުން ސޮއިކޮށްފައިވާ ވިސާ ފެސިލިޓޭޝަން އެއްބަސްވުމާ އެއްގޮތަށް، އިތުރު ތަކުލީފަކާ ނުލައި، ދިވެހިންނަށް 90 ދުވަހުގެ އޮން އެރައިވަލް ވިސާ ލިބޭނެ މަގުފަހިކޮށްދެއްވައި، އެކަން ލިޔުމުން ޔަގީން ކޮށްދެއްވައިފަ އެވެ،" އެ ބަޔާނުގައިވެ އެވެ.

ލަންކާގައި ކިޔަވަން ތިބި ދިވެހި ދަރިވަރުން ކޮންމެ އަހަރަކު ދައްކަން ޖެހޭ ވިސާ ފީ އަށް އެކަށީގެންވާ ހައްލެއް ހޯދައިދެއްވާނެ ކަމުގެ ޔަގީންކަން ވެސް ލަންކާ ސަރުކާރުން ދިން ކަމަށް ފޮރިން މިނިސްޓްރީން ބުންޏެވެ.

ލަންކާގެ ފޮރިން މިނިސްޓަރު އެމްޔޫއެމް އަލީ ސަބްރީގެ ދައުވަތަކަށް ތިން ދުވަހަށް ކުރައްވާ ދަތުރު ނިންމާލެއްވުމަށް ޒަމީރު މިރޭ މާލެ ވަޑައިގަންނަވާނެ އެވެ.

ޒަމީރުގެ މި ދަތުރުގައި ވަނީ ލަންކާގެ ރައީސް ރަނިލް ވިކްރަމަސިންހާ އާއި ބޮޑުވަޒީރު ދިނޭޝް ގުނަވަރުދަނާއާ ވެސް ބައްދަލުކުރައްވައި، ދެ ގައުމުގެ ޒަމާންވީ ގުޅުން އިތުރަށް ބަދަހިކުރުމަށް މަޝްވަރާކުރައްވައިފަ އެވެ. ލަންކާ ސަރުކާރުގެ އެހެން ބައެއް އިސް ބޭފުޅުންނާއި ވިޔަފާރިވެރިން އަދި އެ ގައުމުގައި ދިރިއުޅޭ ދިވެހިންނާ ވެސް ޒަމީރު ބައްދަލުކުރެއްވި އެވެ.