ރިހެބަށް ކޮވިޑް ވަނީ އަޅުގަނޑުމެންގެ އަޑު ނޭހުމުން: ހިންމަފުށީ ކައުންސިލް

ކ. ހިންމަފުށީގައި ހުންނަ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރަށް ކޮވިޑް-19 ފެތުރެން މެދުވެރިވި ކަމަށް ބެލެވޭ މީހާ އެ ތަނަށް ގެންދިޔައިރު، ރިހެބަށް މާލޭން މީހުން ގެންދިއުން ހުއްޓާލުމަށް ވާނީ އެދިފައި ކަމަަށް ހިންމަފުށީ ކައުންސިލުން މިއަދު ބުނެފި އެވެ.

އެކަމަކު، އެ މީހާ ރިހެބަށް ގެންދިއުމާ ހަަމައަށް ވެސް އެ އެދުމަށް ނެޝަނަލް ޑްރަގް އެޖެންސީ (އެންޑީއޭ) އިން އޭރު އިޖާބައެއް ނުދިން ކަމަށް ހިންމަފުށީ ކައުންސިލުން ބުނެ އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ލަފާކުރާ ގޮތުގައި ރިހެބަށް ކޮވިޑް-19 ފެތުރުނީ މިދިޔަ މަހުގެ 13 ވަނަ ދުވަހު އެ ތަނަށް ފަރުވާއަށް ގެންދިޔަ ހަތަރު މީހުންގެ ތެރެއިން މީހެއްގެ ފަރާތުންނެވެ. ކޮވިޑް-19 އަށް ރިހެބުން ޕޮޒިޓިވްވި ތިން މީހުންގެ ތެރޭގައި އެ ހަތަރު މީހުންގެ ތެރެއިން އެކަކު ހިމެނެ އެވެ. އެ މީހާ މާލޭގައި އުޅުނުއިރު ދިޔަ ގެއެއްގެ ބިދޭސީއަކު ވަނީ އެ ބައްޔަށް ޕޮޒިޓިވް ވެފަ އެވެ.

ފަރުވާ ހޯދަމުން އައި އަންހެނަކާއި ދެ ފިރިހެނަކު ކޮވިޑް-19 އަށް ޕޮޒިޓިވް ވުމަކީ އެންޑީއޭގެ ވެސް ކަންބޮޑުވުމެކެވެ. އެ ތަނުން ބުނިގޮތުގައި މާލެ އިން އެ ބައްޔަށް މީހަކު ޕޮޒިޓިވްވުމުގެ ކުރިން، ރިހެބުން ފަރުވާ ހޯދާ މީހުންނާއި އެ މީހުންނާ ބައްދަލުވާ މުވައްޒަފުން އެ ސެންޓަރުން ވަދެ ނުކުތުން ވަނީ ހުއްޓާލައިފަ އެވެ. އެވަރުގެ ފިޔަވަޅުތަކެއް އަޅާފައި ވަނިކޮށް، އެ ސެންޓަރަށް ކޮވިޑް-19 ވަންގޮތެއް ނޭނގޭ ކަމަށް އެންޑީއޭ އިން ބުނެ އެވެ.

ހިންމަފުށީ ކައުންސިލްގެ ރައީސް ޝާން އިބްރާހީމް "މިހާރު" އަށް މިއަދު ވިދާޅުވީ، ރިހެބަށް ފަރުވާ އަށް ގެންދާ މީހުންގެ ފަރާތުން އެ ރަށަށް އެ ބަލި ފެތުރިދާނެ ކަމުގެ ބިރަށް، އެ ސެންޓަރަށް މީހުން ގެންދިއުން ވަގުތީ ގޮތުން ހުއްޓައިލުމަށް ކައުންސިލުން މިދިޔަ މަހުގެ ކުރީކޮޅު އެންޑީއޭގައި އެދިފައިވާނެ ކަމަށެވެ. ކުޑަދުވަސްކޮޅަކަށް ހުއްޓާލުމަށް ފަހު، އެޗްޕީއޭގެ ހުއްދަ ލިބުނީ ކަމަށް ބުނެ އަނެއްކާ ވެސް މީހުން ގެންދަން ފެށީ ކަމަށް ޝާން ވިދާޅުވި އެވެ.

ޕޮޒިޓިވްވި މީހުންގެ ތެރެއިން އެކަކު މިދިޔަ މަހުގެ 13 ވަނަ ދުވަހަށް އެ ސެންޓަރަށް ގެންދިޔައިރު ވެސް އެ މީހާގެ ފަރާތުން ބަލީގެ އަލާމާތްތައް ފެންނަ ކަމުގެ މައުލޫމާތު ކައުންސިލަށް ލިބިގެން އެ ކަމުގެ ކަންބޮޑުވުން އެންޑީއޭ އަށް ހުށަހެޅި ކަމަށް ޝާން ވިދާޅުވި އެވެ.

"މިދިޔަ މަހުގެ 11 ވަނަ ދުވަހު ނައިބު ރައީސް [ފައިސަލް ނަސީމް] އަށް ވެސް އެ މައްސަލަ ހުށަހެޅިން. ރިހެބަށް މި ގެންނަ މީހުންނަކީ މާލެތެރޭ އެކި ތަންތަނުން ގެންނަން މީހުން ކަމަށް ވާތީ ބަލި ފެތުރިދާނެ ކަމަށް އޭރު ވެސް އަޅުގަނޑުމެން ދެންނެވިން،" ޝާން ވިދާޅުވި އެވެ.

އޭނާ ވިދާޅުވި ގޮތުގައި، މިދިޔަ މަހުގެ ފަހުކޮޅުން ފެށިގެން ރިހެބް ލޮކްޑައުން ކޮށްފައިވާ ކަމަށް އެންޑީއޭ އިން ބުނި ނަމަވެސް އެ ތަނުގެ މުވައްޒަފުން ރަށު ތެރެއަށް ގޮސް އުޅުނެވެ. އެ ސެންޓަރުގައި މަސައްކަތް ކުރާ އެ ރަށުގެ ތިން މުވައްޒަފަކު، ރިހެބުން ޕޮޒިޓިވްވި މީހުންނާ ކޮންޓެކްޓްވި ވުމުން ކަރަންޓީން ކޮށްފައިވާ ކަމަށް ޝާން ވިދާޅުވި އެވެ. އެ މުވައްޒަފުންނަކީ ޑިއުޓީ އަށް ފަހު ގެއަށް ގޮސް އުޅުނު ބައެއް ކަމަށް ޝާން ވިދާޅުވެ އެވެ.

"އެހެންވީމާ ރަށު ތެރޭގައި ވެސް ބަލި އުޅެފާނެ ކަމުގެ ބިރު އެބައޮތް. ކަންކަން މިހެން ހުރުމުން އެކޮޅުން [ރިހެބް] ރަށު ތެރެއަށް ބަލި އައުމުގެ ފުރުސަތު ވެސް އަދި ރަށު ތެރެއިން އެ ތަނަށް ބަލި ދިއުމުގެ ފުރުސަތު ވެސް އެބައޮތް،" ޝާން ވިދާޅުވި އެވެ.

ރިހެބުން ތިން މީހަކު ޕޮޒިޓިވްވުމުން ހިންމަފުށިން މިއަދު އިތުރު 156 ސާމްޕަލް ވަނީ ނަގައިފަ އެވެ އޭގެ ތެރޭގައި ހިމެނެނީ ރިހެބުން 37 ސާމްޕަލް، އައްސޭރި ޖަލުން 37 ސާމްޕަލް، އިންޑަސްޓްރިއަލް ވިލެޖުން 45 ސާމްޕަލް، ރަށުތެރެއިން ރެންޑަމްކޮށް ނެގި 38 ސާމްޕަލެކެވެ. އެ ސާމްޕަލްތަކުގެ ނަތީޖާ އަދިއެއް ނުލިބެ އެވެ.

ރިހެބުން ތިން މީހަކު ޕޮޒިޓިވްވުމުން އެ ރަށް އެޗްޕީއޭ އިން ވަނީ މޮނީޓަރިންގެ ހާލަތަށް ގެނެސްފަ އެވެ.