ކޮޕީކުރި ކަމަށް ބުނެ ކުރި ދައުވާގެ އިސްތިއުނާފު މައްސަލަ ކެޓީ ޕެރީ އަށް ކާމިޔާބުވެއްޖެ

އެމެރިކާގެ މަޝްހޫރު ލަވަކިޔުންތެރިޔާ ކޭޓީ ޕެރީ މީގެ ހަތް އަހަރު ކުރިން ނެރުނު ލަވަ "ޑާކް ހޯސް" އަކީ ކޮޕީކޮށްގެން ހަދާފައިވާ ލަވައެއް ކަމަށް ބުނެ ކުރި ދައުވާ ސާބިތުވެ، ބޮޑު ބަދަލެއް ދޭން ލޮސް އެންޖެލިސްގެ ކޯޓުން މިދިޔަ އަހަރު ކުރި ހުކުމް އިސްތިއުނާފު ކުރުމުން ކެޓީ އަށް އެ މައްސަލަ ކާމިޔާބުވެއްޖެ އެވެ.

ފްލޭމްގެ ނަމުން މަޝްހޫރު ރެޕް އާޓިސްޓް މާކަސް ދައުވާ ކުރީ ކޭޓީ 2013 ގައި ނެރުނު "ޑާކް ހޯސް" އަކީ އޭނާ "ޖޯއިފުލް ނޮއިސް" ގެ ނަމުގައި 2008 ގައި ނެރުނު ލަވައިގެ މިއުޒިކްގެ ބައިތައް ކޮފީކޮށްގެން ނެރެފައިވާ ލަވައެއް ކަމަށް ބުނެ އެވެ.

މި ދައުވާއާ ގުޅިގެން، ކެޓީ ކޮޕީކުރި ކަމަށް ސާބިތުވެ ލޮސް އެންޖެލިސް ކޯޓުން މިދިޔަ އަހަރުގެ އޮގަސްޓް މަހުގެ ކުރީކޮޅު ކުރި ހުކުމުގައި ވަނީ "ޑާކް ހޯސް" ގެ ޓީމުން 2.8 މިލިއަން ޑޮލަރު ދައްކަން އަމުރުކޮށްފަ އެވެ. އަދި އެ ލަވައިން ކޭޓީ ހޯދި ފައިދާގެ 22.5 ޕަސެންޓަކީ "ޖޯއިފުލް ނޮއިސް" ލަވަ ކޮޕީގެ ހިއްސާއާ އެކު ހޯދި ފައިދާ ކަމަށް ވެސް ބުންޏެވެ.

ނަމަވެސް އެ ހުކުމާ ދޭތެރޭ ހިތްހަމަނުޖެހިގެން ކެޓީގެ ގާނޫނީ ޓީމުން އެ މައްސަލަ ކެލިފޯނިއާގެ ސެންޓްރަލް ޑިސްްޓްރިކްޓް ކޯޓްގައި މިދިޔަ އަހަރުގެ އޮކްޓޯބަރު މަހުގެ ތެރޭގައި އިސްތިއުނާފު ކުރުމުން މިދިޔަ އަންގާރަ ދުވަހު ކޯޓުން ވަނީ ލޮސް އެންޖެލިސް ކޯޓްގެ ހުކުމް ބާތިލުކޮށް، ކެޓީ ލަވަ ކޮޕީކުރި ކަމަށް ސާބިތުނުވާ ކަމަށް ނިންމައިފަ އެވެ.

އެގޮތުން މާކަސް ކުރި ދައުވާގައި ބުނާ ގޮތަށް "ޑާކް ހޯސް" ލަވައިގައި "ޖޯއިފުލް ނައިޓްސް" ގެ 8 ނޯޓެއް ކޮޕީކުރި ކަމަށް ބެލޭނެ އެއްވެސް އަސްލެއް އަސާސެއް ނެތް ކަމަށް ބުންޏެވެ.

މި މައްސަލާގައި ހުކުމްކުރެއްވި ފަނޑިޔާރު ކްރިސްޓީނާ އޭ ސްނައިޑާ ވިދާޅުވީ "ޑާކް ހޯސް" އަށް ކުރި ދައުވާ ކޮޕީރައިޓްގެ ގާނޫނަށް ވެސް ނުފެތޭ ކަމަށާއި ކޮޕީކުރި ކަމަށް ބުނެ ކުރި ދައުވާގައ އެކަށީގެންވާ ހެކި ވެސް ދެއްކިފައި ނެތް ކަމަށެވެ.

ކެޓީ އަށް މި ލިބުނު ކާމިޔާބީއާ ގުޅިގެން އޭނާގެ ވަކީލުންގެ ޓީމްގައި އިސްކޮށް މަސައްކަތްކުރެއްވި ކްރިސްޓީން ލެޕީރާ ވަނީ އިންސާފު ކަށަވަރުކޮށް ދިނީތީ ފަނޑިޔާރާއި ކޯޓްގެ ބެންޗަށް ޝުކުރު އަދާކޮށް ތައުރީފު ވެސްކޮށް އެވެ.

ނަމަވެސް މާކަސް ވަނީ މި މައްސަލަ އިސްތިއުނާފުކުރާނެ ކަމަށް ބުނެފަ އެވެ.

ގާނޫނީ މައްސަލައަކުން ކެޓީ، 35، ސަލާމަތްވި އިރު އޭނާ މިހާރު ހުރީ އެންގޭޖްވެފައިވާ ލޯބިވެރިޔާ އަދި އެކްޓަރު އޯލަންޑޯ ބްލޫމްގެ ދަރިއަކަށް ބަލިވެ އެވެ.