ކޮޕީ ނުކުރާކަން ސާބިތުކޮށްދޭން އެޑް ޝީރަން ކޯޓުގައި ގިޓާ ކުޅެ ލަވަ ކިޔައިފި

ލަވަކިޔުންތެރިޔާ އެޑް ޝީރަންގެ މަގްބޫލު ހިޓް "ތިންކިން އައުޓް ލައުޑް" އަކީ ކުރީގެ ލަވަކިޔުންތެރިޔާ މާވިން ގޭގެ "ލެޓްސް ގެޓް އިޓް އޮން" ގެ ކޮޕީއެއް ކަމަށް ބުނެ ކޮށްފައިވާ ދައުވާގެ އަޑުއެހުމުގައި ޝީރަން ގިޓާ ކުޅެ ލަވަކިޔައިފި އެވެ.

އެމެރިކާގެ ނިއު ޔޯކުގައި ކުރިއަށްދިޔަ އެ އަޑުއެހުމުގައި އެޑް ޝީރަން ވަނީ ގަޑިއެއްހާއިރު ވަންދެން އޭނާގެ މުޅި މިއުޒިކީ ކެރިއާ އެއްކޮށް ކިޔައިދީފަ އެވެ. އަދި ޖޫރީންނަށް ވަނީ "ތިންކިން އައުޓް ލައުޑް" ގެ ތަންކޮޅުކޮޅު ޖޫރީންނަށް ކިޔައިދީފަ އެވެ.

މާވިންއާ އެކު "ލެޓްސް ގެޓް އިޓް އޮން" ލަވަ ލިޔުނު އެޑް ޓޯސެންޑުގެ ދަރިން ބުނާ ގޮތުގައި، ޝީރަން ވަނީ އެ ހިޓުލަވައިން ބައެއް ކޮޕީކޮށްފަ އެވެ. ޝީރަން އެކަމަށް އިންކާރުކޮށް ބުނީ، އޭނާގެ ލަވަތައް ލިޔަނީ ދިރިއުޅުމާއި އާއިލާގެ ވަރަށް ގިނަކަންކަމުން އިންސްޕަޔާވެގެން ކަމަށެވެ.

އެ އަޑުއެހުމުގައި ޝީރަން ބުނީ "ތިންކިން އައުޓް ލައުޑް" ލިޔެފައިވަނީ 2014 ވަނަ އަހަރު އިނގިރޭސިވިލާތުގައި ހުރި އޭނާގެ ގޭގައި ހުރެ، އެކުވެރި އޭމީ ވެޖްއާ އެކު ކަމަށެވެ.

އޭނާ ބުނި ގޮތުގައި، "ތިންކިން އައުޓް ލައުޑް" ލަވަ އިންސްޕަޔާވެފައި ވަނީ އޭނާގެ ކާފަ އާއި މާމަ އެކަކު އަނެކަކަށް އޮންނަ ލޯތްބާއި، ކާފަގެ ހިތާމަވެރި ވަކިވުމާއި އޭރު ޝީރަން ފެށި ލޯބީގެ ގުޅުމަކުން ކަމަށެވެ.

ދައުވާއުފުލާ ފަރާތުން އަޑުއެހުން ފަށަމުން ދައްކާފައިވަނީ ޝީރަންގެ ކޮންސަޓެއްގައި އޭނާ "ތިންކިން އައުޓް ލަވަ" ކިޔަމުން ގޮސް، މާވިންގެ ހިޓު ލަވަޔަށް ބަދަލުކޮށްލާ ވީޑިއޯއެކެވެ. އެ މީހުން އެ ވީޑިއޯ ސިފަކުރަނީ ޝީރަންގެ އަމިއްލަ އިއުތިރާފެއްގެ ގޮތުގަ އެވެ.

ޓޯސެންޑުގެ ދަރިން ވަނީ ޝީރަން އާއި ވާނާ މިއުޒިކް ގްރޫޕް އަދި ސޮނީ މިއުޒިކުން އެ ލަވަ ވަގަށްނެގިކަމަށް ތުހުމަތުކޮށް، އޭގެ ބަދަލަށް ފައިސާ ދޭން އެދިފަ އެވެ.

ކޮޕީރައިޓްގެ ދައުވާއެއް ޝީރަންއާ ދެކޮޅަށް އުފުލާފައި މިވަނީ މީގެ ކުރިން، އޭނާގެ ލަވަ "ޝޭޕް އޮފް ޔޫ" އަކީ ކޮޕީއެއް ކަމަށް ބުނެ އުފުލި ދައުވާ ޝީރަން ކާމިޔާބު ކުރިތާ އެއް އަހަރު ފަހުންނެވެ.