އެޑް ޝީރަން އަށް އަނެއްކާވެސް އަންހެން ކުއްޖަކު ލިބިއްޖެ

އިނގިރޭސިވިލާތުގެ މަޝްހޫރު ލަވަކިޔުންތެރިޔާ އެޑް ޝީރަން އަށް ދެ ވަނަ ދަރިއަކު ލިބިއްޖެ އެވެ.

ޝީރަން އާއި އޭނާގެ އަންހެނުން ޝެރީ ޝިއާބްރޮން އަށް މި ހަފުތާ ބަންދުގައި ކުއްޖެއް ލިބިފައިވާ ކަމަށް އެ ދެމަފިރިން އިއުލާންކޮށްފައި ވަނީ ސޯޝަލް މީޑިއާގަ އެވެ.

އެ ދެމަފިރިންނަށް މިފަހަރު ވެސް ލިބުނީ އަންހެން ކުއްޖެކެވެ.

ދަރިފުޅާއި މަންމަގެ ސިއްހަތު ރަނގަޅު ކަމަށާއި މި ވަގުތު ވަރަށް އުފަލުން ހުރި ކަމަށް ޝީޒަން ބުންޏެވެ.

"އަހަރެމެންގެ އާއިލާ މިހާރު މި ވަނީ ހަތަރު މެމްބަރުންނަށް ބޮޑުވެފައި. ކުރެވޭ އިހުސާސްތައް ބުނަން ވަރަށް ދަތި،" ޝީރަން ބުންޏެވެ.

ޝީރަން އާއި ޝެރީ އަށް ފުރަތަމަ ދަރިފުޅު ލިބުނީ 2020 ގަ އެވެ.

އެ ދެ މީހުން އެންމެ ފުރަތަމަ ދިމާވީ، އުމުރުން އެންމެ 11 އަހަރުގަ އެވެ. އެ ދެ މީހުން ކިޔެވީ ވެސް އެއް ސްކޫލަކުންނެވެ. ނަމަވެސް، އެ ދެ މީހުންގެ މެދުގައި ލޯބީގެ ގުޅުން އުފެދުނީ ވަރަށް ފަހުންނެވެ.