އެޑް ޝީރަން ލަވަޔަކީ ކޮޕީއެއް ނޫން

މަޝްހޫރު ލަވަކިޔުންތެރިޔާ އެޑް ޝީރަންގެ 2014 ވަނަ އަހަރުގެ ހިޓު ލަވަ "ތިންކިން އައުޓް ލައުޑް" އަކީ 1973 ވަނަ އަހަރު ނިކުތް މާވިން ގޭގެ ލަވަ "ލެޓްސް ގެޓް އިޓް އޮން"ގެ ކޮޕީއެއް ކަމަށް ބުނެ އުފުލި ދައުވާގެ ސާބިތު ނުވެ ނިމިއްޖެ އެވެ.

މާވިން ގޭއާ އެކު އެ ލަވަ ލިޔުނު އެޑް ޓޯސެންޑުގެ އާއިލާއިން ޝީރަންއާ ދެކޮޅަށް 2017 ވަނަ އަހަރު އުފުލި އެ ދައުވާގައި ބުނާގޮތުން، އޭނާގެ ލަވައިގައި ބޭނުންކޮށްފައި ހުރި މެލޮޑީ އާއި ހާމަނީ އަދި ރިދަމް ހުރީ "ލެޓްސް ގެޓް އިޓް އޮން" ލަވައިން ކޮޕީކޮށްފަ އެވެ.

ނަމަވެސް، ޝީރަން އައީ ތަކުރާރުކޮށް އެ ދައުވާއަށް އިންކާރު ކުރަމުންނެވެ. އަދި އެ މައްސަލަ ސާބިތުވެ، ޝީރަންގެ ލަވަޔަކީ ކޮޕީއެއް ކަމަށް ނިންމައިފި ނަމަ، މިއުޒިކް ކެރިއާ ހުއްޓާލާނެ ކަމަށް ވެސް ޝީރަން ބުނެފައިވެ އެވެ. މިދިޔަ ހަފްތާގައި އެމެރިކާގެ ކޯޓެއްގައި ބޭއްވި އަޑުއެހުމުގައި ޝީރަން ވަނީ އެ ލަވަ އަކީ އޭނާގެ ސައްތައިންސައްތަ އުފެއްދުމެއްކަން ޔަގީންކޮށްދޭން ކޯޓުގައި ގިޓާކުޅެ ލަވަ ވެސް ކިޔައިފަ އެވެ.

"މިހުރީ ވަރަށް އުފަލުން،" ކޯޓުގައި ލިބުނު ކާމިޔާބީއަށް ފަހު ޝީރަން ބުންޏެވެ.

"މަސައްކަތުން ރިޓަޔާކުރަން ޖެހޭނެހެންނެއް ހިއެއް ނުވޭ. މިކަހަކަ އެއްވެސް އަސްލެއް ނެތް ތުހުމަތުތައް ކޯޓާ ހަމައަށް ދާތީ ވެސް އުނދަގޫވޭ."

ޝީރަން ބުނި ގޮތުގައި، އެ މައްސަލަ އޭނާއާ ދެކޮޅަށް ނިމުނު ނަމަ، ލަވަ ލިޔުންތެރިންގެ އުފެއްދުންތެރި މިނިވަންކަން ގެއްލިދާނެ އެވެ.

މާވިންގެ ހިޓު ލަވަ ނުކުތުމުގެ ކުރިން ވެސް އެކިކަހަލަ ލަވަތަކުގައި ކޮޕީކުރި ކަމަށް ބުނާ ހަތަރު-ކޯޑުގެ ސީކުއެންސް ހުރި ކަމަށް ޝީރަންގެ ދިފާއީ ވަކީލުންގެ ޓީމުން ކޯޓުގައި ބުނެފައިވެ އެވެ.

ޝީރަންގެ 2017 ވަނަ އަހަރުގެ ހިޓު "ޝޭޕް އޮފް ޔޫ" އަކީ ކޮޕީއެއް ކަމަށް ތުހުމަތުކޮށް ކޯޓަށް ދިޔަ މައްސަލަ ވެސް އޭނާ ވަނީ މިދިޔަ އަހަރު ކާމިޔާބުކޮށްފަ އެވެ.

"ތިންކިން އައުޓް ލައުޑް" ލަވަޔަކީ ކޮޕީއެއް ކަމަށް ބުނެ، މާވިންގެ ލަވައިގެ ކޮޕީރައިޓްގެ ހިއްސާ އޮންނަ އިންވެސްޓްމެންޓް ބޭންކާ ޑޭވިޑް ޕުލްމަންގެ ކުންފުންޏަކުން އުފުލި ދައުވާގެ މައްސަލަ އަދި ނުނިމެ އެވެ.

އޭގެ އިތުރުން، 2015 ވަނަ އަހަރު ރިބިން ތިކް އާއި ފެރެލް ވިލިއަމްސްގެ ހިޓު "ބްލާޑް ލައިންސް" ލަވަޔަކީ މާވިންގެ "ގޮޓް ޓު ގިވް އިޓް އަޕް" ލަވައިގެ ކޮޕީއެއް ކަމަށް ބުނެ އުފުލި ދައުވާ ކާމިޔާބުކޮށް، މާވިންގެ ދަރިން ވަނީ 5.3 މިލިއަން ޑޮލަރު ހޯދައިފަ އެވެ.