އެޑް ޝީރަން އަންނަ އަހަރު އިންޑިއާގައި ހަ ޝޯ ބާއްވަނީ

މަޝްހޫރު އިނގިރޭސި ލަވަކިޔުންތެރިޔާ އެޑް ޝީރަން އޭނާގެ މިއުޒިކް ޓުއާގެ ދަށުން އަންނަ އަހަރު އިންޑިއާގެ ހަ ސިޓީއެއްގައި ޝޯތައް ބާއްވަން ތާވަލުކޮށްފި އެވެ.

އެޑްގެ އިންސްޓަގްރާމް މެދުވެރިކޮށް މިދިޔަ ހުކުރު ދުވަހު ވަނީ މި ޝޯތަކުގެ ތާވަލު އާންމުކޮށްފަ އެވެ. މިއީ އޭނާގެ (+ - = ÷ x ވޯލްޑް ޓުއާ)ގެ ދަށުން ބާއްވާ ޝޯތަކެކެވެ. އަދި އިންޑިއާގައި މިހާ ގިނަ ޝޯތައް ބާއްވާ ފުރަތަމަ ފަހަރެވެ.

އޭނާ ވަނީ މި އަހަރުގެ މާޗު މަހުގައި ވެސް އިންޑިއާގެ މުމްބާއީގައި ޝޯއެއް ބާއްވައިފަ އެވެ. އެ ޝޯއަށް ބޮޑު ތަރުހީބެއް ލިބުނެވެ.

އަންނަ އަހަރު އިންޑިއާގެ އިތުރުން ބޫޓާން އާއި ގަތަރާއި ބަހުރެއިންގައި ވެސް އޭނާގެ ޝޯތައް ބާއްވަން ވަނީ ތަވާލުކޮށްފަ އެވެ. މިއީ، އެޑް ބޫޓާންގައި ޕާފޯމްކުރާނެ ފުރަތަމަ ފަހަރެވެ.

އިންޑިއާގައި ބާއްވާ ޝޯތައް

• ޖެނުއަރީ 30 ގައި ޕޫނޭގައި

• ފެބްރުއަރީ 2 ގައި ހެއިދަރާބާދުގައި

• ފެބްރުއަރީ 5 ގައި ޗެންނާއީގައި

• ފެބްރުއަރީ 8 ގައި ބެންގަލޫރުގައި

• ފެބްރުއަރީ 12 ގައި ޝިލޯންގުގައި

• ފެބްރުއަރީ 15 ގައި ދިއްލީގައި

މި ޝޯތަކަށް މި މަހު ނުވަޔަކުން ފެށިގެން އޮންލައިކޮށް ޓިކެޓް ވިއްކަން ފަށަން ވަނީ ނިންމައިފަ އެވެ.