ޝާހީ ހަފްލާގައި ކޭޓީ އުޅުނު ގޮތް މީމް އަކަށް

މިދިޔަ ހޮނިހިރު ދުވަހު އިނގިރޭސިވިލާތުގެ ރަސްގެފާނު ޗާލްސް ތަހުތުގައި ވެޑުވުމުގެ ރަސްމިއްޔާތުގައި ލަވަކިޔުންތެރިޔާ ކޭޓީ ޕެރީ އިށީންނާނެ ގޮނޑިއެއް ނުފެނިގެން އުޅޭ މަންޒަރު ފެންނަ ވީޑިއޯއެއް ވައިރަލްވެ، އޭނާ މީމްއަކަށް ވެއްޖެ އެވެ.

ޓްވިޓާގައި ވައިރަލްވެފައިވާ އެ ވީޑިއޯގައި ރަސްމިއްޔާތުގެ ތެރެއިން މީހުން އިށީނދެ ތިބި ތަނުގައި އެކި ކޭޓީ ކޮޅުކޮޅަށް ބަލައި ހޯދައި، ވާނުވާ ނޭނގިގެން އުޅޭ މަންޒަރު ފެނެ އެވެ. އަދި އެތަނަށް ގޮސް ހުރި މީހެއް ގާތު ގޮނޑި ހުސްތޯ ވެސް އަހަ އެވެ.

އެ މަންޒަރާއެކު ކޭޓީ ވަނީ ޓްވިޓާގައި މީމް އަކަށްވެ ގިނަބައެއްގެ ޖޯކުތައް އަމާޒުވެފަ އެވެ.

"ގޮނޑި ނުފެނިގެން އެއުޅެނީ އަޅާފައި ހުރި ތޮތްޕާ ހެދި،" ކޭޓީ ރަސްމިއްޔާތަށް ދާން އަޅާފައި ހުރި ބޮޑު ތޮތްޕަށް ނިސްބަތްކޮށް މީހަކު ބުނެފައިވެ އެވެ. އޭގެ އިތުރުން، އެ ވީޑިއޯއަށް ފަހު ގިނަބަޔަކު އަންނަނީ ޓްވިޓާގައި އެކިކަހަލަ މީމްތައް ހަދައި ޝެއާ ކުރަމުންނެވެ.

އެ ހުރިހާ އެންމެނަށް ސަމާސާގޮތަކަށް ރައްދުދީ ކޭޓީ ޕެރީ ވަނީ މިހާރު ގޮނޑި ފެނިއްޖެ ކަމަށް ބުނެ ޓްވީޓުކޮށްފަ އެވެ. އަދި ރަސްމިއްޔާތުގެ ފަހުން އިންސްޓަގްރާމުގައި ޝެއާ ކުރި ފޮޓޯތަކެއްގެ ކެޕްޝަންގައި އޭނާ ޖަހާފައި ވަނީ "ލަވެންޑާލޯސްޓްގާލް" އެވެ.

ޗާލްސްގެ ރަސްމިއްޔާތުގެ ގޮނޑި ނުފެނިގެން ލަދެއްގައި ބެދި އުޅެނިކޮށް އޭނާ އަށް ދެން ކުރިމަތިވީ ވެސް ހަމަ ލަދުގަންނަ ފަަދަ ހާދިސާއެކެވެ. ރަސްމިއްޔާތު ނިންމުމަށް ފަހު ނިކުތުމުގެ ތެރެއިން އޭނާ އަރައިގެން ހުރި ހުދު ހީލް ފުރޮޅާލައި ވެއްޓެން ދަމުން، ކައިރީ ހުރި މީހެއްގެ ގައިގާ ހިފަހައްޓައިގެން އޮތް މަންޒަރު ފެންނަ ފޮޓޯއެއް ވެސް މިހާރު ދަނީ ސޯޝަލް މީޑިއާގައި ދައުރުވަމުންނެވެ.

ރަސްގެފާނު ޗާލްސް ތަހުތުގައި ވެޑުވުން ފާހަގަކުރާ މި ހަފްތާ ބަންދުގައި ކޭޓީ މުހިންމު ރޯލެއް އަދާކުރި އެވެ. އެއީ ޗާލްސްގެ ރަސްމިއްޔާތާ ގުޅުވައިގެން ބާއްވާ ކޮންސަޓުގައި ޕަފޯމްކުރާ އާޓިސްޓުންގެ ތެރޭގައި ހިމެނުމެވެ.