ކޭޓީ އާއި ޑުއާ އެކުގައި ލަވައެއް ނެރެނީ

އެމެރިކާގައި މި ވަގުތުގެ އެންމެ މަޝްހޫރު ލަވަކިޔުންތެރިންގެ ތެރޭގައި ހިމެނޭ ކޭޓީ ޕެރީ އާއި ޑުއާ ލީޕާ އެކީގައި ލަވައެއް ނެރުމުގެ މަސައްކަތް ކުރަމުން އަންނަ ކަމަށް ބުނެފި އެވެ.

އެކުގައި މަސައްކަތް ކުރަން ވަރަށް ބޭނުންވާ ކަމަށް މީގެ ކުރިން އެ ދެ އާޓިސްޓުން ވެސް އިންޓަވިއުތަކުގައި ބުނެފައިވެ އެވެ. އެހެންވެ، މިހާރު އެ އިންތިޒާރަށް ނިމުމެއް އައީ އެވެ.

އެ ލަވައިގެ މަސައްކަތް ފަށާފައިވާ ކަން ހާމަކޮށް، އެ ދެ ލަވަކިޔުންތެރިން ބުނީ މިހާރު ލިރިކްސް ލިޔުމުގެ މަސައްކަތް ކުރަމުން އަންނަ ކަމަށެވެ. އަދި އެކަމުގައި ދެމީހުން ވެސް ހިއްސާވާ ކަމަށް ބުންޏެވެ.

ސޯޝަލް މީޑިއާގައި މީހަކު ކުރި ސުވާލަކަށް ޖަވާބު ދެމުން ޑުއާ ބުނީ، ކޭޓީ އާ އެކު ލަވައެއް ކިޔާލަން ލިބުމަކީ ހުވަފެނެއް ހަގީގަތަކަށް ވުން ކަހަލަ ކަމެއް ކަމަށެވެ.

ރިޕޯޓްތައް ބުނާ ގޮތުގައި، އެ ލަވައަކީ ޑުއާގެ އާ އަލްބަމްގައިވެސް ހިމެނޭނެ ލަވައެކެވެ.

ޑުއާގެ ތިންވަނަ ސްޓޫޑިއޯ އަލްބަމްގެ މަސައްކަތް ކުރަމުން އަންނަ ކަމަށް އޭނާ ބުނީ މިދިޔަ ޖެނުއަރީ މަހު އެވެ. އެ އަލްބަމްގެ ގާތްގަނޑަކަށް ދެބައިކުޅަ އެއްބައި މަސައްކަތް ވަނީ ނިމިފަ އެވެ. ވަކި ތާރީހެއް ނުބުނެ، އެ އަލްބަމް ވަރަށް އަވަހަށް ނެރޭނެ ކަމަށް ޑުއާ ބުންޏެވެ.