ޓްވިޓާގައި އެންމެ ގިނަ ބަޔަކު ފޮލޯ ކުރަނީ ކެޓީ ޕެރީ

އެމެރިކާގެ ރައީސް ބަރަކް އޮބާމާ ވެސް ފަހަތަށް ޖައްސައިލުމަށް ފަހު ޓްވިޓާގައި އެންމެ ގިނަ ބަޔަކު ފޮލޯކުރާ ސެލެބްރިޓީގެ މަގާމު އެމެރިކާގެ ލަވަ ކިއުންތެރިިޔާ ކެޓީ ޕެރީ ހޯދައިފި އެވެ.

އިނގިރޭސި ކޮމެޑިއަން/އެކްޓަރު ރަސަލް ބްރޭންޑާ ކައިވެނިކޮށްގެން އުޅޭ އުމުރުން 31 އަހަރުގެ ކެޓީ ފޮލޯކުރާ މީހުންގެ އަދަދު މިހާރު މި ވަނީ ޓްވިޓާގައި 90 މިލިއަނަށް އަރައިފަ އެވެ. އޭނާ މި ހެދި ރެކޯޑާ އެކު އެތައް ބަޔަކު އަންނަނީ ޓްވިޓާ އިން ތަހުނިޔާގެ މެސެޖްތައް ވެސް ފޮނުވަމުންނެވެ.

މަޝްހޫރު އަދި ނުފުޒޫ ގަދަ މީހުންނަށް ބަލާ އިރު ރައީސް އޮބާމާ އޮތީ ލިސްޓްގެ ހަތަރު ވަނައިގަ އެވެ. އޮބާމާ ފޮލޯ ކުރަނީ 75.7 މިލިއަން މީހުންނެވެ.

ކެޓީ އަށް ފަހު، ޓްވިޓާގައި ދެން އެންމެ ގިނަ ބަޔަކު ފޮލޯ ކުރާ ސެލެބްރިޓީއަކީ ޒުވާން ލަވަ ކިއުންތެރިޔާ ޖަސްޓިން ބީބާ އެވެ. އޭނާ ދެވަނަ އަށް ދިޔައީ 83.8 މިލިއަން ފޮލޯވަރުންނާ އެކުގަ އެވެ.

ތިން ވަނާގައި އޮތީ އެމެރިކާގެ ޒުވާން ލަވަ ކިއުންތެރިޔާ އަދި މިހާރު އިނގިރޭސި އެކްޓަރު ޓޮމް ހިޑެލްސްޓަން އާ ޑޭޓް ކުރަމުން އަންނަ ޓޭލާ ސްވިފްޓެވެ. އޭނާ ފޮލޯ ކުރާ މީހުންގެ އަދަދަކީ 78.9 މިލިއަން މީހުންނެވެ.

މި ލިސްޓްގެ ގަދަ 10 އަށް ބަލާ އިރު އޭގެ ތެރޭގައި ލަވަ ކިއުންތެރިޔާ ރިހާނާ، ލޭޑީ ގާގާ، މަޝްހޫރު ޓީވީ ހޯސްޓް އެލެން ޑެޖެނެރެސް އަދި ލަވަ ކިއުންތެރިޔާ/އެކްޓަރު ޖަސްޓިން ޓިމްބަލޭކް ހިމެނެ އެވެ.

ޓްވިޓާގައި އެންމެ ގިނަ ބަޔަކު ފޮލޯ ކުރާ މަޝްހޫރު އިތުރު ސެލެބްރީންނަށް ބަލާ އިރު، ބީބާގެ ކުރީގެ ލޯބިވެރިޔާ އަދި ޓޭލާ ދާދި ފަހުން ރުޅިވި ޑީޖޭ ކަލްވިން ހެރިސް އާ މިހާރު ރައްޓެހިވެގެން އުޅޭ ކަމަށް އަޑު އަރާފައިވާ ލަވަ ކިއުންތެރިޔާ ސެލެނާ ގޮމޭޒް އޮތީ ލިސްޓްގެ 14 ވަނައިގަ އެވެ.

ޓްވިޓާ އިން އޭނާ ފޮލޯ ކުރަނީ 43.7 މީހުންނެވެ. އެކަމަކު އިސްޓަގްރާމްގައި އެންމެ ގިނަ ބަޔަކު ފޮލޯ ކުރާ ފަންނަނީ ސެލެނާކަން ފާހަގަކޮށްލަން ޖެހެ އެވެ. އެއީ 87 މިލިއަން ފޮލޯވަރުންނާ އެކުގަ އެވެ.

އިސްޓަގްރާމްގައި ކެޓީ އުޅެނީ 51.4 މިލިއަން ފޮލޮވަރުންނާ އެކު ލިސްޓްގެ 17 ވަނައިގަ އެވެ.