އެމީ: "ދަ ސްޓޫޑިއޯ"އަށް ރެކޯޑެއް، 15 އަހަރުގެ އޯވެން ކޫޕާ ތާރީހުގެ ތެރެއަށް!

މި އަހަރުގެ އެމީ އެވޯޑްސްގައި އެޕަލް ޓީވީ ޕްލަސްގެ "ދަ ސްޓޫޑިއޯ" އިން 13 އެވޯޑް ކާމިޔާބުކޮށް ރެކޯޑެއް ހަދައިފި އެވެ.

އިއްޔެ ބޭއްވި އެމީ އެވޯޑްސްގައި "ދަ ސްޓޫޑިއޯ" އަށް 13 އެވޯޑް ލިބުނުއިރު، ކޮމެޑީ ސީރީޒްގެ ކެޓަގަރީން އެ އެވޯޑުގައި މީގެ ކުރީ އަހަރުތަކުގައި ވާދަކުރި އެއްވެސް ސީރީޒަކަށް އެއް ފަހަރާ އެ އަދަދަށް އެވޯޑް ލިބިފައި ނުވެ އެވެ.

ފިލްމު އުފެއްދުމުގެ މަސައްކަތްކުރާ ސްޓޫޑިއޯއަކަށް ދިމާވާ ތަފާތު ކަންތައްތަކެއް ދައްކާ "ދަ ސްޓޫޑިއޯ"އަށް ވަނީ ކޮމެޑީ ސީރީޒްގެ ކެޓަގަރީން އެންމެ މޮޅު ސީރީޒްގެ އެވޯޑު ވެސް ލިބިފަ އެވެ. އެއީ މި އަހަރުގެ އެމީގައި ތިންވަނައަށް އެންމެ ގިނަ ނޮމިނޭޝަންތައް ވެސް ލިބުނު ސީރީޒެވެ. އެ ސީރީޒަށް 23 ނޮމިނޭޝަނެއް ލިބިފައިވެ އެވެ.

މި އަހަރުގެ އެމީގައި އެންމެ ގިނަ ނޮމިނޭޝަންތައް ލިބުނު އެޕަލް ޓީވީ ޕްލަސްގެ ސައިކޮލޮޖިކަލް ޑްރާމާ "ސިވިއަރެންސް"އަށް ކާމިޔާބުކުރެވުނީ 8 އެވޯޑެކެވެ. އޮފީހެއްގައި މަސައްކަތްކުރާ މުވައްޒަފުންތަކެއް އެމީހުންގެ މަސައްކަތުގެ ދިރިއުޅުމާއި އަމިއްލަ ދިރިއުޅުމުގެ ހަނދާންތައް ވަކިކުރުމަށް ކުރާ އާދަޔާ ހިލާފު ކަންތައްތަކެއް ދައްކާ އެ ސީރީޒަށް 27 ނޮމިނޭޝަނެއް ލިބުނެވެ.

އެމެރިކާގެ ލޮސް އެންޖެލިސްގެ ޕީކޮކް ތިއޭޓަރުގައި އިއްޔެ ބޭއްވި 77 ވަނަ އެމީ އެވޯޑުގައި އެންމެ ފާހަގަކޮށްލެވޭ އެވޯޑަކަށް ވީ ލިމިޑެޓް ސީރީޒްގެ ކެޓަގަރީން އެންމެ މޮޅު ސަޕޯޓިން އެކްޓަރުގެ އެވޯޑް ކާމިޔާބުކުރި އެކްޓަރެވެ. އެ އެވޯޑް ކާމިޔާބުކުރީ އުމުރުން 15 އަހަރުގެ އޯވެން ކޫޕާ އެވެ. އެއީ، ނެޓްފްލިކްސްގެ ސައިކޮލޮޖިކަލް ކްރައިމް ޑްރާމާ "އެޑޮލެސެންސް"ގައި އޭނާ ކުޅުނު ރޯލުންނެވެ.

އެމީގެ އެވޯޑެއް ކާމިޔާބުކުރި އެންމެ ހަގު އެކްޓަރުގެ ލަގަބު ހޯދައި، އޯވެން ކޫޕާ ވަނީ ތާރީހުގެ ތެރެއަށް ގޮސްފަ އެވެ.

"އެޑޮލެސެންސް"އަށް ވަނީ އެންމެ މޮޅު ލިމިޑެޓް ސީރީޒްގެ އެވޯޑް ވެސް ލިބިފަ އެވެ.

މި އަހަރުގެ އެމީގައި އެންމެ ގިނަ އެވޯޑުތައް ކާމިޔާބުކުރި ސްޓޫޑިއޯތަކަކީ އެންމެ ގިނަ ނޮމިނޭޝަންތައް ވެސް ހޯދި އެޗްބީއޯ އާއި ނެޓްފްލިކްސްގެ ސީރީޒްތަކެވެ. އެ ދެ ސްޓޫޑިއޯ އިން ވެސް ވަނީ 30 އެވޯޑެއް ކާމިޔާބުކޮށްފަ އެވެ. އަދި ވާދަވެރި އެޕަލް ޓީވީ ޕްލަސް އަށް 21 އެވޯޑެއް ލިބުނެވެ.