ރީިތި ކޭތައެއް، މުޅި ރާއްޖެ އަށް ވެސް ފެނުނު

މިއީ، މުޅި ރާއްޖެ އަށް ވެސް ދޭތެރެދޭތެރެ އިން ވިއްސާރަ ކުރާ ދުވަސްވަރަކަށް ވުމުން، އިރުކޭތަ ހިފާ ވަގުތު ވެސް ވިއްސާރަ ވެދާނެ ކަމަށް އޭރު ލަފާ ކުރެވުނެވެ. ނަމަވެސް މިއަދުގެ މޫސުން ރަނގަޅު ކަމަށާއި ރާއްޖޭގެ ހުރިހާ ސަރަހައްދުތަކަށް ވެސް ކޭތަ ހިފާފައި ހުއްޓާ ރީތިކޮށް ފެނުނު ކަމަށް މެޓް އޮފީހުން ބުނެ އެވެ.

މާލެ އަށް އިރުކޭތަ ހިފީ ހެނދުނު 7:38 އިން 10:32 އަށެވެ. އުތުރުގެ ރަށްތަކަށް އެ ވަގުތަށް ވުރެ ފަސް މިނެޓް ކުރިން ކޭތަ ހިފިއިރު ދެކުނުގެ ރަށްތަކަށް ކޭތަ ހިފީ މާލެ އަށް ވުރެ ފަސް މިނެޓް ލަހުންނެވެ.

މެޓް އޮފީހުގެ އޮފިޝަލަކު ވިދާޅުވީ، މިއަދު މުޅި ރާއްޖެ އަށް ވެސް މޫސުން ރަނގަޅު ކަމަށެވެ. ކޭތަ ހިފި ވަގުތު ވެސް މޫސުން ރަނގަޅުވުމުން މުޅި ރާއްޖެ އަށް ވެސް ކޭތަ ރީތިކޮށް ފެނުނު ކަމަށް އޭނާ ވިދާޅުވި އެވެ.

ކޭތަ ހިފާފައި ވަނިކޮށް، މާލެ އަށް ކުޑައިރުކޮޅަކަށް ވިއްސާރަ ކުރި އެވެ. ނަމަވެސް ގިނަ ވަގުތު ކޭތަ ފެންނާނެހެން އުދުމަތި ސާފެވެ.

ކޭތަ ހިފުމާއެކު ރާއްޖޭގެ ހުރިހާ ރަށެއްގައި ވަނީ ކޭތަ ނަމާދުކޮށްފަ އެވެ.

ޖައްވީ ކަންކަން ދިރާސާ ކުރާ ދިވެހި ޖަމިއްޔާ، "މާސް" އިން ބުނިގޮތުގައި އެންމެ ބޮޑަށް އިރު ގެއްލިފައި ވަނިކޮށް ރާއްޖެ އިން ކޭތަ ފެންނުނީ އުތުރުގެ ރަށްތަކަށެވެ. އެ ސަރަހައްދުތަކަށް އިރުގެ 75 ޕަސެންޓް ގެއްލިފައި ވަނިކޮށް، ފެންނުނު އިރު، މާލެ އަށް ފެނުނީ އިރު 67 ޕަސެންޓަށް ގެއްލިފައި ވަނިކޮށް ކަމަށް އެ ޖަމިއްޔާ އިން ބުންޏެވެ. އަދި ދެކުނުގެ ރަށްތަކަށް ފެނުނީ އިރު 58 ޕަސެންޓަށް ގެއްލިފައި ވަނިކޮށް ކަމަށް ބުންޏެވެ.

އިރުކޭތަ ހިފަނީ ވަށައި ދަތުރުކުރާ ދުނިޔެ އާއި އިރާ ދޭތެރެ އަށް ހަނދު ވަނުމުންނެވެ.

އެންމެ ބޮޑަށް އިރުކޭތަ ހިފުމުން އިރު ފެންނާނީ އަނގޮއްޓިއެއް ހެން ވަށްކޮށެވެ. އެގޮތަށް އިރުކޭތަ ހިފާފައިވަނިކޮށް މި ފަހަރު ފެންނާނީ އިންޑިއާގެ ބައެއް އަވަށްތަކަށާއި ލަންކާގެ ޖަފްނާގެ އިތުރުން އިންޑޮނޭޝިއާ އާއި ސިންގަޕޫރުގެ އަވަށްތަކަށެވެ. އެންމެ ފަހުން ރާއްޖެ އަށް އިރުކޭތަ ހިފާފައިވަނީ 2017 ވަނަ އަހަރު އެވެ. އަދި އަންނަ އަހަރުގެ ޖޫން މަހުގެ 23 ވަނަ ދުވަހު ވެސް އިރުކޭތަ ހިފާނެ އެވެ. ނަމަވެސް އެ ފަހަރު ކޭތަ ހިފާނީ ވަރަށް ކުޑަކޮށް ކަމަށް "މާސް" އިން ބުނެ އެވެ.