ފެން ހިންދުމުގެ އޮޕަރޭޝަން 21 ގަޑިއިރު ފަހު ނިންމާލައިފި: 30،569 ޓަނުގެ ފެން ބޭރުކުރި

މާލެއަށް އިއްޔެ ވެހުނު ބޯވާރޭގައި މަގުތަކުން 30،569 ޓަނުގެ ފެން ހިންދާފައިވާ ކަމަށް އެމްއެންޑީއެފުން މިއަދު ބުނެފި އެވެ.

އިއްޔެ ހެނދުނު 11:00 ހާއިރުން ފެށިގެން މެދުކެނޑުމެއް ނެތި ވެހުނު ވާރޭގައި މުޅި މާލެ އޮތީ ފެނު އަޑީގަ އެވެ. ގޭގެ އާއި ފިހާރަތަކަށް ފެން ވަދެ ބޮޑެތި ގެއްލުންތަކެއް ވުމުގެ އިތުރުން ފެނުގެ ސަބަބުން އެތައް ވެހިކަލަކަށް ވެސް ވަނީ ގެއްލުން ވެފަ އެވެ.

ޕަމްޕުތައް ބަހައްޓައިގެން މާލޭގެ ހަ ސަރަހައްދަކުން ފެން ހިންދުމުގެ މަސައްކަތް ކުރަމުންދިޔަ އެމްއެންޑީއެފުން ބުނި ގޮތުގައި އިއްޔެ 11:37 ހާއިރުން ފެށިގެން އެމްއެންޑީއެފުން ފެން ހިންދުމުގެ މަސައްކަތް ދިޔައީ ކުރަމުންނެވެ. އަދި ރޭ 8:30 ހާއިރު އެ އޮޕަރޭޝަން ނިންމާލިއިރު 30،569 ޓަނުގެ ފެން މާލެއިން ހިންދާފައިވާ ކަމަށް ބުންޏެވެ. އެއީ 30 މިލިއަނަށް ވުރެ ގިނަ ލީޓަރުގެ ފެނެވެ.

އެމްއެންޑީއެފުން ހާމަކުރި މައުލޫމާތަށް ބަލާއިރު ފެން ހިންދުމަށް ހޭދަކުރި 20 ގަޑިއިރާއި 53 މިނެޓް ތެރޭ ކޮންމެ މިނެޓަކު ގާތްގަނޑަކަށް 24،397 ލީޓަރުގެ ފެން މާލެއިން ބޭރުކޮށްފައިވެ އެވެ.

ވަރަށް ގިނަ މަގުތަކުގައި އިއްޔެ ކަކުލުން މައްޗަށް ފެން ހެދިފައި އޮތެވެ. އެންމެ ބޮޑަށް ފެން ހެދޭ މާފަންނުކޮޅުގައި ފެން ނުހިނދި ލަސްވާން ފެށުމުން ރަސްފަންނާ ދިމާލުން މޫދަށް ކޯރެއް ވެސް ކަނޑަން ޖެހުނެވެ.

މެޓު އޮފީހުން ރޭ ބުނި ގޮތުގައި މާލެއަށް އިއްޔެ އެންމެ ބޯކޮށް ވާރޭ ވެހުނީ ހަވީރު 5-6 އާ ދެމެދު އެވެ. އެއީ 60 މިލިމީޓަރުގެ ވާރެ އެވެ.

ގެތަކަށް ފެން ވަދެ، ގެއްލުންވުމުގެ ސަބަބުން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ މާލެއިން ހާލުގައި ޖެހުނު 36 ގެއެއްގެ 226 މީހަކަށް ވަގުތީ ބޯހިޔާވަހިކަމާއި ކެއުންބުއިމުގެ އެހީތެރިކަން ފޯރުކޮށްދީފަ އެވެ.

މާލޭގެ އިތުރުން ރާއްޖޭގެ އެކި ހިސާބުތަކަށް މޫސުން ވަރަށް ބޮޑަށް ގޯސްވެ، ގެއްލުންވި އެވެ. ބައެއް ރަށްތަކަށް ވަަރަށް ބޮޑަށް އުދަ އަރައި ގެއްލުންވިއިރު ބޯކޮށް ވާރޭވެހި ފެން ބޮޑުވުމުގެ ސަބަބުން ރަށްރަށުގެ ގެތަކަށް ވެސް ގެއްލުންވި އެވެ.

މޫސުމާ ބެހޭ އިދާރާ އިން ލަފާކުރާ ގޮތުގައި ކުރިއަށް އޮތް 48 ގަޑިއިރު މަޑުމަޑުން މޫސުން ދާނީ ރަނގަޅުވަމުންނެވެ.