މާލެ "އަޑިއަށް" ދަނީ ހޯދި ވަގުތީ ހައްލުތަކުން!

ދައްކަން މި އުޅެނީ އާ ވާހަކައެއް ނޫނެވެ. ކޮންމެ ވިއްސާރަ މޫސުމެއް ނުވަތަ މާލެ އަށް ވާރޭ ވެހޭ ކޮންމެ ފަހަރަކު އޮންނަ "ފެންކޯރު" ގެ ވާހަކަ އެވެ. މި ފަހުން އައި ކޮންމެ ސަރުކާރަކަށް ކަހަލަ ގޮތަކަށް އޮތީ އޭގެ ހައްލުގެ ވާހަކަ ދެއްކުމެވެ. އަނެއް ބަޔަކަށް އޮތީ "ބްލޭމް ގޭމް" ކުޅުމެވެ. މިދިޔަ ހުކުރު ދުވަހު މާލެ އަށް އާދަޔާ ހިލާފަށް ގިނައިން ބޯކޮށް ވާރޭ ވެހި، ގިނަ މަގުތަކުގައި ހިނގާބިނގާ ނޫޅެވޭ ވަރަށް ފެންބޮޑުވުމުން ވެސް ފެނުނީ ހަމަ އެ މަންޒަރެވެ.

އެ ދުވަހު ވެހުނު ގޮތަށް، ހުއްޓުމެއް ނެތި ދެތިން ގަޑިއިރު މާލެއަށް ބޯކޮށް ވާރޭ ވެހިއްޖެ ނަމަ އެ ވަރަށް ފެންބޮޑު ނުވާނެ ހަމަ އެއް ގޮތެއް ވެސް މިހާރަކު ނެތެވެ. މާލެ އޮތީ ފަރާތަކަށް އަޑިޔަށޭ ކިޔާ ވާހަކައަކީ ހަމަ ހަގީގަތެކެވެ. މަގުތައް އެއްވަރެއް ނޫނެވެ. ތަންތަނުން ކޮނެކޮނެ މަގުތައް އޮތީ ހަލާކުކޮށްފަ އެވެ. ފެން ހިންދާނެ ރަނގަޅު ނިޒާމެއް ނެތެވެ. މަގު މަރާމާތު ކުރިޔަސް ކުރަނީ ވަގުތީ ހައްލެއް އަންނަ ގޮތަށެވެ. އެއް ތަނުން ފެން ހިނދޭ ގޮތް ހަދައިދިއްޔާ، އަނެއް ދިމާލުގައި ފެންބޮޑުވެ އެވެ. ވަގުތީ ހައްލުތަކާ ހެދި އެކަނިވެސް މާލޭގެ މަގުތަކުގައި ފެންބޮޑުވުން ވީ އިތުރަށް ގޯހެވެ.

ޒަމާންވީ މައްސަލައެއް

މާލޭގައި ފުރަތަމަ ނަރުދަމާ އެޅީ ގެތަކުގެ ފުރާޅުން ފައިބާ ފެން، އެ ނިޒާމުގެ ތެރެއިން ހިންދާލާ ގޮތަށެވެ. އޭރު އެ ނިޒާމު ފަރުމާކުރީ މާލޭގައި އެ ވަގުތު އޮތް މަދު އާބާދީގެ ނިސްބަތަށް ބަލައިގެންނެވެ. އެކަމަކު، ކުއްލިއަކަށް މާލޭގެ އާބާދީ ލައްކައަކަށް ވުރެ މައްޗަށް އަރައި، އިމާރާތްތައް ވެސް އުސްކުރަން ފެށުމާ އެކު، އެ ނިޒާމަށް ނުކަތާވަރުވީ އެވެ.

ވާރޭވެހުމުން ނަރުދަމާ ނިޒާމު އޯވާ ފްލޯވެ، އެތައް މައްސަލައެއް ޖެހުނެވެ. އެ ހިސާބުން ޖެހުނީ ފުރާޅުން ފައިބާ ފެން ނަރުދަމާ ނިޒާމަށް ދާ ގޮތް ހެދުން މަނާކުރާށެވެ. ދެން ހުއްދަ ދިނީ އެ ފެންގަނޑު މަގަށް ފައިބާ ގޮތަށް ހެދުމަށެވެ. އޭރުއްސުރެ، މިއަދާ ހަމައަށް ވެސް މާލޭގެ އިމާރާތްތަކުގެ މައްޗަށް ފައިބާހާ ފެނެއް ދަނީ މަގުމައްޗަށެވެ.

މާލޭގައި ކުރިން އިމާރާތްތައް ހެދިއިރުގައި ޑީވޯޓަރިން ސިސްޓަމް ވެސް ނަރުދަމާ ނިޒާމާ ގުޅައިގެން ފެން ބޭރުކުރި އެވެ. އެކަމަކު، އެކަން ވެސް ވަކި ހިސާބަކުން ނުކަތާވަރުވުމުން މަނާކުރަން ޖެހުނީ އެވެ. ކޮންސްޓްރަކްޝަން މަސައްކަތް ކުރާ ތަންތަނުން މާލޭގެ މަގުތައް މަތީގައި ހޮޅި އަޅައިގެން ފެން ބޭރު ކުރަން ފެށީ އެހިސާބުންނެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ދުވަސްވަރު އަމީނީ މަގު ހެދި އިރުގައި، އެ މަގުގެ އަޑީގައި ޑީވޯޓަރިން ސިސްޓަމެއް ހަދާފައި އެބައޮތެވެ. އެކަމަކު، އެ ސިސްޓަމް އަދި ބޭނުންކުރެވޭ ގޮތެއް ނުވެ އެވެ.

ދިމާވި އެންމެ ބޮޑު އެއް މައްސަލައަކީ ރަނގަޅު ޕްލޭނެއް ނެތި، ނުވަދިހައިގެ އަހަރުތަކުގައި ގާ އަޅައިގެން މާލޭ މަގުތައް ހެދުމެވެ. އެ މަގުތައް ހެދީ މަގުގައި ބޮޑުވާ ފެން އެއްވެސް ވަރަކަށް ޕަމްޕަ އައުޓް ކުރެވޭނެ ގޮތަކަށް ނޫނެވެ. މަގުތަކުގެ ދެ ފަރާތުގައި ކާނުތަކެއް ހަދައިގެން ކާނުތަކަށް ފެން ހިނދޭ ގޮތަށެވެ. އެހެން ހެދުމުން، ވާރޭ ވެހޭ ދުވަސްވަރު ބައެއް ސަރަހައްދުތަކުގައި އެތައް ދުވަހެއް ވަންދެން ފެންގަނޑު ނުހިނދި އޮތެވެ. ކާނުތައް ބެދި، ވެލިގަނޑު ޗަކަވެ، ބިން މަތީގައި ހުންނަ ފެން އަޑިއަކަށް ނުދެ އެވެ.

އެ މައްސަލަ ހައްލުކުރަން އެމްޑަބްލިއުއެސްސީން 2014 އާއި 2018 ވަނަ އަހަރާ ދެމެދުގައި އެކި ފިޔަވަހިތަކަށް ބަހާލައިގެން މާލޭގައި ސްޓޯމް ވޯޓާ ޑްރެއިނޭޖް ސިސްޓަމެއް ގާއިމްކުރި އެވެ.

އޭރު އެ މަސައްކަތްކުރީ، އެ ދުވަސްވަރު އާންމުކޮށް މާލެއަށް ވާރޭ ވެހުނު ވަރަށް ބަލައި، ވާރޭ ވެހި ނިމޭތާ ތިރީހަކަށް މިނިޓުގެ ތެރޭގައި ފެންގަނޑު ހިނދޭނެ ގޮތަށް ޕްލޭން ކޮށްގެންނެވެ. އެކަމަކު، އެ ޕްރޮޖެކްޓު ވެސް ހިންގުނީ އެންމެ ރަނގަޅަށް ޕްލޭންކޮށްގެން ނޫންކަން މިހާރު މި އޮތީ ފެންނާށެވެ. އެހެން ނޫން ނަމަ މިހާރު މިހާ ގޯސްވެގެން ނުވާނެ ކަމަށް ތަޖުރިބާކާރުން ވިދާޅުވެ އެވެ.

މޫސުމީ ބަދަލާއި ބަދަލުނުވި ނިޒާމު

އޭރާއި މިހާރުގެ ހާލަތު ވެސް ވަރަށް ބޮޑަށް ތަފާތެވެ. މި ސަރުކާރުގެ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވެސް ހިއްސާކުރެއްވީ މި ކަންބޮޑުވުންތަކެވެ.

"މިހާރު މި ދިމާވާ މައްސަލައަކީ މި އަންނަ ފްލެޝް ފްލަޑާ އެކު، މީހުންގެ ގެތަކަށް ފެން ވަދެ، ގެއްލުން ލިބޭ މައްސަލަ. މާނައަކީ ފެން ހެދިފައި މާ ގިނައިރު އޮންނަ މައްސަލަ އަށް ވުރެ ބޮޑަށް، ފްލަޑާ އެކު މީހުންނަށް ގެއްލުންވުން. އެކަން ހައްލުކުރަން މިހާރު މި އިންނަ ސްޓޯމް ވޯޓާ ސިސްޓަމަށް ވުރެ، ފްލެޝް ފްލަޑުގައި ވަގުތުން ވަގުތައް ފެންގަނޑު ޕަމްޕް އައުޓް ކުރެވޭނެ ކަހަލަ ކެޕޭސިޓީއެއް ބިލްޑުކުރަން ޖެހޭނީ،" މުއްތަލިބް ވިދާޅުވި އެވެ.

"އެހެންވީމާ އަޅުގަނޑު މި ބުނަނީ މާލޭގެ މި މައްސަލައަށް ހައްލެއް އަންނާނީ ހުރިހާ މަގެއް އަލުން ޑިޒައިންކޮށް، ހުރިހާ މަގުތައް އަލުން ހެދިގެންނޭ،

ކޮންމެ ފަހަރަކު ވަކިވަކި ތަންކޮޅު ހަދައިގެން ފްލަޑްވުން ނުހުއްޓުވޭނެ."

ރާއްޖޭގެ ރަށްރަށަށް ވާރޭ ވެހޭ ގޮތަށް ބަދަލުތަކެއް އަންނަކަން މޫސުމާ ބެހޭ އިދާރާ، މެޓް އޮފީހަށް ވެސް ފާހަގަކުރެވިފައިވެ އެވެ. މިދިޔަ އަހަރުގެ އޮގަސްޓް މަހު މާލެ އަށް އެންމެ ވިއްސާރަކުރި ދުވަސްވަރު މެޓްގެ މީޓިއޮރޮލޮޖިސްޓަކު "މިހާރު" އަށް ވިދާޅުވެފައިވާ ގޮތުގައި، ރާއްޖެ އަށް ވާރޭ ވެހޭ އަދަދުތަކުން އާދަޔާ ހިލާފު ބަދަލެއް ފާހަގައެއް ނުވެ އެވެ. ނަމަވެސް، ކުޑަކުޑަ ވަގުތުކޮޅެއްގެ ތެރޭގައި ވާރޭ ވެހޭ ވަރު ކުރިއަށް ވުރެ ބޮޑު ތަނުން އިތުރެވެ.

ކުރިން އެވްރެޖުކޮށް މާލެއަށް 3-4 ގަޑިއިރުގެ ތެރޭގައި ވެހެނީ 40-45 މިލިމީޓަރުގެ ވާރޭ އެވެ. އެކަމަކު، މިހާރު އެ އަދަދު ބައެއް ފަހަރު 60 މިލިމީޓަރަށް ވުރެ މަތިވެ އެވެ. މިދިޔަ ހުކުރު ދުވަހު ވެސް ހުރީ އެހާ ވަރުގަ އެވެ. ކުޑަކުޑަ ވަގުތުކޮޅެއްގެ ތެރޭގައި ވެހޭ ވަރު ގިނަވުމުން ފެން ހިންދާ ސިސްޓަމްތަކަށް ކުޅަދާނައެއް ނުވެ އެވެ.

ވާރޭ ވެހޭ ވަރު މަދުވަނީ ނުވަތަ ގިނަވަނީއެއް ވެސް ނޫނެވެ. ވެހޭއިރު، ކުޑަ ވަގުތުކޮޅެއްގެ ތެރޭގައި މާ ބޯކޮށް ވެހެނީ އެވެ. އެހާ ކުޑަ ވަގުތުކޮޅެއްގެ ތެރޭގައި، އެއްފަހަރާ މާ ގިނައިން ވާރޭ ވެހުމުން ފެންބޮޑުވުމުގެ ހާދިސާތައް ވެސް އިތުރުވަނީ އެވެ. ރަނގަޅު ފެންވަރުގެ ފެން ހިންދާ ނިޒާމެއް ނެތުމުން މާ ބޮޑަށް ފެންބޮޑުވެ، ލިބޭ ގެއްލުން ވެސް އިންތިހާއަށް ބޮޑުވަނީ އެވެ.

ދުނިޔޭގެ މޫސުމަށް އަންނަމުންދާ ބަދަލުތަކާ އެކު "ފްލެޝް ފްލަޑް" ނުވަތަ ބޯކޮށް ވާރޭ ވެހި ކުޑަ ވަގުތުކޮޅެއްގެ ތެރޭގައި އާދަޔާ ހިލާފަށް ފެންބޮޑުވާ މައްސަލަތައް އެހެން ބައެއް ގައުމުތަކުގައި ވެސް މި ފަހުން ވަރަށް ގިނައިން ހިނގާފައި އެބަހުއްޓެވެ.

އިމަޖެންސީ ހައްލާއި ދާއިމީ ހައްލު!

މާލޭގެ މަގުތައް ހަދާފައި ވަނީ މަގު ހުރަހަށް ބޭނުންވާ ލެޓަރަލް ކަނެކްޝަން ނެތި އެވެ. މަގު ހުރަހަށް ބޭނުންވާ ކޭބަލާއި އެހެނިހެން ސާވިސް ކޭބަލްތަކަށް މަގުން ގާ ނަގައި، އެކިއެކި މަސައްކަތަށް ކޮނުމުގެ ސަބަބުން ގިނަ ސަރަހައްދުތަކުން ވަނީ އަޑިގުޑަންތައް ހެދިފަ އެވެ. މަގުތައް ރަނގަޅަށް މަރާމާތު ނުކުރެވި، ގިނަ ދުވަސްވުމާއި ފެން ހިންދުމަށް ދާއިމީ ހައްލެއް ނުލިބި އޮތުމަކީ އެންމެ ބޮޑު މައްސަލަ އެވެ.

މަގުތަކުގައި ފެންބޮޑުވާ މައްސަލަ ވަގުތީ ހައްލެއް ގެނައުމަށް ޑިފެންސް މިނިސްޓްރީ އާއި ކޮންސްޓްރަކްޝަން މިނިސްޓްރީ ގުޅިގެން މިދިޔަ އަހަރު މެއި 10 ވަނަ ދުވަހު އާރުޑީސީއާ މަޝްރޫއެއް ވެސް ހަވާލުކުރި އެވެ. އެ މަޝްރޫއުގެ ދަށުން މާލޭގެ އެންމެ ބޮޑަށް ފެންބޮޑުވާ ފަސް ސަރަހައްދެއްގައި ފެން ހިންދާނެ ވަގުތީ ނިޒާމެއް ހެދި އެވެ. އެއީ؛

• ވެސްޓް ޕާކު ސަރަހައްދު

• މަޖީދީމަގު ރަސްފަންނު ސަރަހައްދު

• މަޖީދީމަގު އާޓިފިޝަލް ބީޗު ސަރަހައްދު

• އައިޖީއެމްއެޗު، ކަނބާއައިސާރާނީ ހިނގުން ސަރަހައްދު

• އައިޖީއެމްއެޗު، ތާޖުއްދީން ހިނގުން ސަރަހައްދު

އަމީނީމަގާއި ބުރުޒުމަގުގައި ހުރި ޕަމްޕް ސްޓޭޝަންތައް އަޕްގްރޭޑްކުރުމުގެ މަސައްކަތް ވެސް އެބަކުރެ އެވެ.

މުއްތަލިބް ވިދާޅުވި ގޮތުގައި، މިދިޔަ ހުކުރު ދުވަހު ސިފައިން ގެންގުޅޭ ޕަމްޕުތަކުން 30،000 ޓަނުގެ ފެން ބޭރުކުރި އިރު، މާލޭގެ ޕަމްޕް ސްޓޭޝަންތަކުން ބޭރުކުރި ފެނާ އެކު 60،000 ޓަނުގެ ފެން ބޭރު ކޮށްފައި ވާނެ އެވެ. އެކަމަކު، އެ ވަރުން ވެސް ގެއްލުން ކުޑަކުރެވޭ ވަރު ނުވީ އެވެ. މިގޮތަށް ފެންބޮޑުވާ ނަމަ މިހާރު ހުރި ނިޒާމުގެ އިތުރަށް ފެން ހިންދޭނެ އިތުރު ގޮތްތަކެއް ހޯދަން ޖެހެ އެވެ. ފެން ހިންދާނެ ކެޕޭސިޓީ އިތުރުކުރަން ޖެހެ އެވެ.

"މިހާރު މަސައްކަތް ކުރަމުން މި އަންނަނީ މޯބައިލް ޓްރެއިލާ ޕަމްޕުތަކެއް ގެނައުމަށް. އެންޑީއެމްއޭ އިން އެ މަސައްކަތް އެބަކުރޭ،" އޭނާ ވިދާޅުވި އެވެ.

"އޭގެ ފަހެއް ނޫނީ ހަ ޕަމްޕު ހުރެއްޖެ ނަމަ ވަރަށް ބޮޑު ރިލީފެއް ގެނެވިދާނެ. އޭގެ ޕަމްޕެއްގެ އާންމު ކެޕޭސިޓީއަކީ 600 ޓަނުގެ ފެން ގަޑިއެއްގެ ތެރޭގައި."

މުއްތަލިބް ވިދާޅުވީ މާލޭގެ އިތުރުން ރަށްރަށުގައި ހިނގި ފެންބޮޑުވުމުގެ ހާދިސާތަކަށް ބަލާއިރު ވެސް އެއް ޕެޓާނަކަށް ކަންކަން ހިނގާފައި ހުރިކަން ފާހަގަވާ ކަމަށެވެ.

"މިފަހުން ކ. ގުރައިދޫގައި ދިމާވި މައްސަލައަކީ ވެސް ސީދާ ބުނެވޭނެ ރަށް ހިއްކުމުން ދިމާވި ކަމެއް ކަމަށް. ހިއްކާފައި އޮތް ބިން، ރަށުގެ އަސްލު ބިމަށް ވުރެ އުސްވުމުން އެތަނަށް ވެހުނު ހުރިހާ ފެނެއް ވަނީ ރަށު ތެރެއަށް. ހިއްކި ސަރަހައްދާއި ކުރިން އޮތް ރަށުގެ ބިމާ ދެމެދުން ޓްރެންޗެއް ނުކަނޑާ ނަމަ، އެ މައްސަލަ ވެސް ހައްލު ނުވާނެ،" އޭނާ ވިދާޅުވި އެވެ.

ބިން ހިއްކާފައި އޮތް އެހެން ބައެއް ރަށްރަށުގައި ވެސް މި މައްސަލަ މިހާރު ދިމާވެ އެވެ. އަދި ބައެއް ރަށްރަށުގައި ބަނދަރުތައް ހަދައިފައި ހުރި ގޮތުން އުދައެރުމުގެ މައްސަލަތައް ވެސް ވަރަށް ބޮޑެވެ.

"[މާލެއަށް ބެލިޔަސް] ފްލަޑް އިޝޫ ބޮޑަށް ދިމާވަނީ ވެސް ފަހުން، ކުނި އަޅައިގެން މީހުން ކުރީގައި އަމިއްލައަށް ހިއްކާފައި އޮތް ސަރަހައްދުގައި،

"މީގައި ވަރަށް ކްރިޓިކަލް ކަމެއް ވެސް އެބަ އުޅޭ މިހާރު. މާލޭގައި މިހާރު އާންމުކޮށް މި ފެން ބޮޑުވާ ގެތަކުގައި ފެން ބޮޑުވަނީ ހަމައެކަނި މަގުން ވަންނަ ފެނަކުން ނޫން. ބިމު އަޑިން ވެސް އެބަ ފެން އަރާ. އެއީ ވެސް މިހާރު ބަލަން ޖެހިފައި އޮތް ކަމެއް،" އޭނާ ވިދާޅުވި އެވެ.

މާލެ އާއި ވިލިމާލޭގެ ހުރިހާ މަގެއް އަލުން ހެދުމުގެ ބޮޑު ޕްރޮޖެކްޓެއް ޗައިނާ ސަރުކާރުގެ ހިލޭ އެހީގެ ދަށުން ފަށަން އަންނަނީ ތައްޔާރުވަމުންނެވެ. ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ފުރަމާނާ ދަތުރުފުޅުގައި ޗައިނާއިން ދޭން ނިންމި އެ އެހީގެ ދަށުން މާލޭގެ މަގުތައް އަލުން ހެދުމުން ފެންބޮޑުވުމުގެ މައްސަލައަށް ދާއިމީ ހައްލެއް ލިބޭނެ ކަމަށް ސަރުކާރުން ގަބޫލުކުރެ އެވެ.

އެ މަސައްކަތް ފެށުމަށް މިދިޔަ އަހަރުގެ ނޮވެމްބަރު މަހު ޗައިނާގެ ކޮންސަލްޓަންޓުންގެ ޓީމެއް ރާއްޖެ އައިސް ވަނީ މާލެ އާއި ވިލިމާލޭގެ މަގުތަކުގެ ހާލަތު ބަލައި، ފީސިބިލިޓީ މަރުހަލާ ފަށައިފަ އެވެ.

މުއްތަލިބް ވިދާޅުވީ ކޮންސަލްޓަންޓުންގެ ޓީމުން ވެސް އެންމެ ޗެލެންޖިން ކަމެއްގެ ގޮތުގައި ފާހަގަކުރީ މާލޭގެ މަގުތަކުގައި ފެންބޮޑުވާ މައްސަލަ ކަމަށެވެ.

"އެ މީހުން ވެސް ވަރަށް ކަންބޮޑުވޭ ފެންބޮޑުވާ މައްސަލާގައި. އެއީ ވަރަށް ކްރިޓިކަލް، ބޮޑު މައްސަލައެއް، މުޅި މާލޭގައި އެ މައްސަލަ ހައްލު ކުރުމަކީ. އެ ޓީމު އައިސް އުޅުނުއިރުގައި ވެސް މާލެ ފްލަޑުވި. އެ މީހުނަށް ފެނިފައި ހުރީ،" އޭނާ ވިދާޅުވި އެވެ.

އޭނާ ވިދާޅުވީ އެ ހުރިހާ ކަމަކަށް ބަލައި، މި ޕްރޮޖެކްޓުގެ ޑީޓެއިލް ޑިޒައިން މަރުހަލާގައި، ރަނގަޅު ސްޓޯމް ވޯޓާ ޑްރެއިނޭޖް ނިޒާމެއް ގާއިމްކުރެވޭ ގޮތަށް މަގުތައް ޑިޒައިން ކުރުމަށް އިސްކަންދީގެން އެ ޓީމުން މަސައްކަތް ކުރާނެ ކަމަށެވެ. އަދި ޓެންޑަރިންގެ މަރުހަލާ ނިމި، މި އަހަރުގެ މި ޕްރޮޖެކްޓުގެ އަމަލީ މަސައްކަތް ފެށުމަކީ ސަރުކާރުގެ އަމާޒެއް ކަމަށް ވެސް އޭނާ ވިދާޅުވި އެވެ.

އެހެންވެ، މި މައްސަލައިގެ ދާއިމީ ހައްލު ގުޅިފައި އޮތީ ރަނގަޅު ފެންވަރެއްގައި ހުރިހާ މަގެއް އަލުން ހެދުމުގެ މި ޕްރޮޖެކްޓާ އެވެ. މާޒީން ފިލާވަޅު ލިބި، ކުރިން ހެދިފައި ހުރި ގޯސްތައް ތަކުރާރު ނުވާނެ ގޮތަށް މަގުތައް ހެދިގެންނެވެ. ވަގުތީ ހައްލުތައް ދޫކޮށްލައި، ދާއިމީ ހައްލު ހޯދައިގެން ނޫން ގޮތަކަށް މޫސުމީ މި ބަދަލުތަކާ އެކު ކެތްކުރެއްވޭކަށް ނެތެވެ. އެހެންވެ، އާ ޕްރޮޖެކްޓާ އެކު އޮތީ އުންމީދެވެ.