މާލޭގެ މަގުތަކުން ފެން ހިންދަން މޯބައިލް ޓްރެއިލާ ޕަމްޕުތަކެއް ސަރުކާރުން ގެނެސްދެނީ

ވިއްސާރާގައި މާލޭގެ މަގުތަކުގައި ފެން ބޮޑުވާ މައްސަލައަށް ވަގުތީ ހައްލެއް ހޯދުމަށް މޯބައިލް ޓްރެއިލާ ޕަމްޕުތަކެއް ގެނައުމުގެ މަސައްކަތް ސަރުކާރުން ކުރަމުން އަންނަ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.

މާލޭގެ މަގުތަކުގައި ފެންބޮޑުވާ މައްސަލައާ ގުޅޭ ގޮތުން "މިހާރު" އަށް ދެއްވި އިންޓަވިއުއެއްގައި މުއްތަލިބް ވިދާޅުވީ މަގުތަކުގައި ފެން ބޮޑުވާ މައްސަލައަށް ދާއިމީ ހައްލެއް ލިބެންދެން، މި ވަގުތަށް ފެން ހިންދޭނެ އިތުރު ގޮތްތަކެއް ހޯދަން ޖެހިފައިވާ ކަމަށެވެ. އެންމެ މުހިންމު އެއް ކަމަކީ މިހާރު މާލޭގެ މަގުތަކުން ފެން ހިންދުމުގެ ކެޕޭސިޓީ އިތުރު ކުރުން ކަމަށް އޭނާ ވިދާޅުވި އެވެ.

އޭނާ ވިދާޅުވީ، އެ ކެޕޭސިޓީ އިތުރު ކުރުމަށް، ފެން ހިންދުމަށް ބޭނުންކުރާ މޯބައިލް ޓްރެއިލާ ޕަމްޕުތަކެއް ގެނައުމުގެ މަސައްކަތް ފަށާފައިވާ ކަމަށެވެ.

މޯބައިލް ޓްރެއިލާ ޕަމްޕަކީ އެއްތަނުން، އަނެއްތަނަށް ފަސޭހައިން ގެންދެވޭ ގޮތަށް ފަރުމާކޮށްފައި ހުންނަ ފުރޮޅުލީ ޕަމްޕެކެވެ. މާލޭގައި ފެން ހިންދަން މިހާރު ބޭނުންކުރަނީ ސިފައިން ގެންގުޅޭ މޯބައިލް ޓްރެއިލާ ޕަމްޕަކާއި އާދައިގެ ކުދިކުދި ޕަމްޕުތަކެވެ.

"މިހާރު މަސައްކަތް ކުރަމުން މި އަންނަނީ މޯބައިލް ޓްރެއިލާ ޕަމްޕުތަކެއް ގެނައުމަށް،" މުއްތަލިބް ވިދާޅުވި އެވެ.

"އޭގެ ފަހެއް ނޫނީ ހަ ޕަމްޕު ހުރެއްޖެ ނަމަ ވަރަށް ބޮޑު ރިލީފެއް ގެނެވިދާނެ. އޭގެ ޕަމްޕެއްގެ އާންމު ކެޕޭސިޓީއަކީ 600 ޓަނުގެ ފެން ގަޑިއެއްގެ ތެރޭގައި."

މިދިޔަ ހުކުރު ދުވަހު މާލެއަށް ކުރި ގަދަ ވިއްސާރާގައި މަގުތަކުގައި ވަރަށް ބޮޑަށް ފެންބޮޑުވެ، ބޮޑެތި ގެއްލުންތައް ލިބުނެވެ.

މުއްތަލިބް ވިދާޅުވި ގޮތުގައި ސިފައިން ގެންގުޅޭ ޕަމްޕުތަކުން އެ ދުވަހު 30،000 ޓަނުގެ ފެން ބޭރުކުރި އެވެ. އަދި މާލޭގެ ފަސް ސަރަހައްދެއްގައި ހަދާފައިވާ ވަގުތީ ޕަމްޕް ސްޓޭޝަންތަކުން ބޭރުކުރި ފެނާ އެކު 60،000 ޓަނުގެ ފެން ބޭރު ކޮށްފައި ވާނެ އެވެ.

މާލޭގެ މަގުތަކުގައި ފެންބޮޑުވާ މައްސަލައަށް ދާއިމީ ހައްލެއް އަންނާނީ ހުރިހާ މަގެއް އަލުން ހެދިގެން ކަމަށް އޭނާ ވިދާޅުވި އެވެ.

މާލެ އާއި ވިލިމާލޭގެ ހުރިހާ މަގެއް އަލުން ހެދުމަށް ޗައިނާ ސަރުކާރުން ވަނީ 100 މިލިއަން ޑޮލަރުގެ ހިލޭ އެހީ ހަމަޖައްސައި ދީފަ އެވެ. އެ މަސައްކަތް ފެށުމަށް މިދިޔަ އަހަރުގެ ނޮވެމްބަރު މަހު ޗައިނާގެ ކޮންސަލްޓަންޓުންގެ ޓީމެއް ރާއްޖެ އައިސް ވަނީ މާލެ އާއި ވިލިމާލޭގެ މަގުތަކުގެ ހާލަތު ބަލައި، ފީސިބިލިޓީ މަރުހަލާ ފަށައިފަ އެވެ.

މި އަހަރު މި ޕްރޮޖެކްޓުގެ އަމަލީ މަސައްކަތް ފެށުމަކީ ސަރުކާރުގެ އަމާޒެކެވެ.