މާލެއިން އެހީއަށް އެދި 400 ކޯލު ލިބުނު، ބޮޑަށް ގެއްލުންވި ގެތަކުން މީހުން ބަދަލުކުރަނީ

މާލެއަށް މިއަދު ހެނދުނުން ފެށިގެން ބޯކޮށް ވާރޭވެހި ފެންބޮޑުވުމާ ގުޅިގެން އެހީއަށް އެދި 400 ކޯލް ލިބުނު ކަމަށާއި އޭގެތެރެއިން އެންމެ ބޮޑަށް ގެއްލުންވި 35 ގެއެއްގެ މީހުންނަށް އެހީވެ، ބައެއް ތަންތަނުން މީހުން ބަދަލުކުރަމުން އަންނަ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިރޭ ބުނެފި އެވެ.

އެންޑީއެމްއޭ އިން ބުނީ އެހީ އަށް އެދުނީ ފެންބޮޑުވުމާ ގުޅިގެން ވެލި ބަސްތާ ޖެހުމަށާއި އެ ނޫން ވެސް އެކި ކަންކަމުގައި ކަމަށެވެ.

މި ކޯލްތަކުގެ ތެރެއިން ރެޕިޑް އެސެސްމަންޓް ހެދުމަށް ފަހު އެންމެ ބޮޑަށް ހާލުގައި ޖެހިފައިވާ 35 ގޭގެ މީހުންނަށް އެހީތެރިކަން ފޯރުކޮށްދެމުން އަންނަ ކަމަށް އެ އޮތޯރިޓީން ބުންޏެވެ. އަދި މި ގެތަކުގައި ހިމެނޭ މީހުންގެ ތެރެއިން އެހެން ތަންތަނަށް ބަދަލުކުރަން ޖެހޭ މީހުން ބަދަލުކުރުމުގެ މަސައްކަތް ވެސް ކުރަމުން އަންނަ ކަމަށް އެންޑީއެމްއޭ އިން ބުންޏެވެ.

މެދުނުކެނޑި ވެހުނު ވާރޭގައި މުޅި މާލޭގައި ފެންބޮޑުވެ ގެތަކާއި ފިހާރަތަކަށް ފެންވަދެ އާއްމުންގެ މުދަލަށް ވަނީ ބޮޑެތި ގެއްލުންތަކެއް ލިބިފަ އެވެ. މާފަންނުކޮޅުގައި ވަރަށް ގިނަ ފިހާރަތަކަށް ފެންވަދެ ގިނަ އަދަދެއްގެ މުދަލާއި ސާމާނު ވަނީ ހަލާކުވެފަ އެވެ.

ފެންބޮޑުވުމާ ގުޅިގެން ވިޔަފާރިތައް ހުއްޓި، ވަރަށް ބޮޑު ގެއްލުމެއް ވި އެވެ.

މާފަންނުގެ ބައެއް ގެތަކުން ކަރަންޓް ކެނޑުމުގެ އިތުރުން ބައެއް ގޭގޭ ލިފްޓް ތަކަށް ފެންވަދެ ބޮޑެތި ގެއްލުންތަކެއް ލިބުނެވެ. މާލޭގެ ގިނަ ރެސްޓޯރެންޓްތަކުން ޑެލިވަރީގެ ޚިދުމަތް ވެސް ވަނީ މެދުކަނޑާލައިފަ އެވެ.

ގުގުރުމާ އެކު ބޯކޮށް ވާރޭވެހި، ފެންބޮޑުވާނެ ކަމަށް ލަފާކޮށް ރާއްޖޭގެ ބޮޑު ސަރަހައްދަކަށް މޫސުމާ ބެހޭ އިދާރާ އިން މިރޭގެ 11 ޖެހުމާ ހަމައަށް ވަނީ އޮރެންޖް އެލާޓް ނެރެފަ އެވެ.