ރާއްޖޭގެ ބޮޑު ބަޔަކަށް ރީނދޫ އެލާޓް ނެރެފި

ކުރިއަށް އޮތް ވަގުތުތަކުގައި ވެސް މޫސުން ގޯސްވާނެ ކަމަށް ލަފާކުރާތީ ރާއްޖޭގެ ބޮޑު ބަޔަކަށް މިރޭ ރީނދޫ އެލާޓް ނެރެފި އެވެ.

މެޓް އޮފީހުން ބުނީ މިރޭ ފަތިހު 4 ޖެހުމާ ހަމައަށް ނ. އަތޮޅުން ފެށިގެން ލ. އަތޮޅުގެ ހިސާބުތަކަށް ބޯކޮށް ވާރޭވެހި ވައިގަދަވާނެ ކަމަށް ލަފާކުރެވޭ ކަމަށެވެ. އެހެންވެ، މިރޭ 11:00 އިން ފެށިގެން 4:00 އަށް ވަނީ އެލާޓް ނެރެފަ އެވެ.

އެ ވަގުތުގައި، ވިލާގަނޑުގައި ގަޑިއަކު 40 މޭލަށް ވައިގަދަވެ، ކަނޑުތައް ގަދަވާނެ ކަމަށް މެޓުން ލަފާކުރެ އެވެ.

މެޓުން ބުނީ ކުރިއަށް އޮތް 24 ގަޑިއިރު ވެސް ރާއްޖޭގެ އެކި ހިސާބުތަކަށް ވިއްސާކުރާނެ ކަމަށެވެ. އަންނަ އާދިއްތަ ދުވަހު ވެސް ވާރޭވެހޭނެތީ، މޫސުން ރަނގަޅުވާން ފަށާނެ ކަމަށް ލަފާކޮށްފައިވަނީ އަންނަ ހޯމަ ދުވަހުން ފެށިގެންނެވެ.