ކުރިއަށް އޮތް 48 ގަޑިއިރު މޫސުން ދާނީ ރަނގަޅުވަމުން: މެޓް

ރާއްޖެއަށް މިދިޔަ ބުރާސްފަތި ދުވަހުން ފެށިގެން މޫސުން ގޯސްވިޔަސް ކުރިއަށް އޮތް 48 ގަޑިއިރު ތެރޭ މޫސުން މަޑުމަޑުން ރަނގަޅުވާނެ ކަމަށް މެޓު އޮފީހުން މިއަދު ބުނެފި އެވެ.

މޫސުމާ ބެހޭ ގައުމީ އިދާރާ (މެޓް) އިން ބުނީ މޫސުން ރަނގަޅުވަމުން އަޔަސް އުތުރާއި މެދުރާއްޖެތެރޭގެ އެކި ހިސާބުތަކަށް ވިއްސާރަކޮށް، ބައެއް ރަށްތަކަށް ގުގުރުމާ އެކު ބޯކޮށްވާރޭވެހޭނެ ކަމަށެވެ.

އެ ހިސާބުތަކަށް ވިލާގަނޑުގައި 35 މޭލަށް ވައި ބާރުވުން އެކަށީގެންވާ ކަމަށް ވެސް އެ އިދާރާ އިން ބުންޏެވެ.

މެޓުން ބުނި ގޮތުގައި ދެކުނުގެ މަދު ރަށްތަކަކަށް ކެރީގެ އަސަރު ކުރިޔަސް އާންމު ގޮތެއްގައި މޫސުން ރަނގަޅުވާނެ އެވެ.

ރާޅުގެ އުސްމިން މިއަދު އުޅޭނެ ކަމަށް ލަފާކުރަނީ 4-6 ފޫޓާ ދެމެދުގަ އެވެ. އަދި ކަނޑުތައް ވެސް އާދައިގެ ވަރަކަށް ގަދަވާނެ ކަމަށާއި ވިލާގަނޑުގައި އިތުރަށް ގަދަވާނެ ކަމަށް އެ އިދާރާ އިން ބުނެ އެވެ.

މެޓުން ވަނީ ބޯކޮށް ވާރޭވެހުމާ އެކު ގުގުރާނެ ކަމަށާއި ވިލާގަނޑުގައި ގަޑިއަކު 40 މޭލަށް ވައި ގަދަވާނެ ކަމަށް ލަފާކޮށް ޅ. އަތޮޅުން ލ. އަތޮޅަށް ވައިޓް އެލާޓް ނެރެފަ އެވެ.

ފާއިތުވި 24 ގަޑިއިރަށް ބަލާއިރު މުޅި ރާއްޖެއިން އެންމެ ގިނައިން ވާރޭވެހުނީ މާލެ އާއި ހުޅުލެ އާއި ހުޅުމާލެއަށެވެ.

އެ އޮފީހުގެ ތަފާސްހިސާބުތަކުން ދައްކާ ގޮތުގައި އެންމެ ބޯކޮށް ވެހުނު ހުޅުލެއަށް 144 މިލިލީޓަރުގެ ވާރޭވެހުނެވެ. އަދި މާލެއަށް 142.6 މިލިމީޓަރުގެ ވާރެވެހުނުއިރު ހުޅުމާލެއަށް ވެހުނީ 122 މިލިމީޓަރުގެ ވާރޭ އެވެ.

މި ފަހުގެ ތާރީހެއްގައި މިހާ ބޯކޮށް މާލެއަށް ވާރޭއެއް ނުވެހެ އެވެ.

އެމްއެންޑީއެފުން ބުނި ގޮތުގައި މާލެއަށް އިއްޔެ ވެހުނު ބޯވާރޭގައި މަގުތަކުން 30،569 ޓަނުގެ ފެން ހިންދާފައިވެ އެވެ.

ބޯވާރޭގައި އިއްޔެ ލިބުނު ގެއްލުން:

- ހާލުގައި ޖެހުނު 36 ގެއެއްގެ 226 މީހަކަށް ވަގުތީ ބޯހިޔާވަހިކަމާއި ކެއުންބުއިމުގެ އެހީތެރިކަން ފޯރުކޮށްދޭން ޖެހުނު.

- މާލޭގައި ފެންބޮޑުވެގެން އެހީތެރިކަމަށް 774 ތަނަކުން ރިޕޯޓްކުރި.

- 554 ތަނަކުން ރިޕޯޓުކުރީ ވެލި ބަސްތާ ޖަހައިދޭން.

- ފިހާރަތަކާއި ގެތަކަށް ފެން ވަދެ، އެކި ސާމާނަށް ގެއްލުންވި.

- ގިނަ އަދަދެއްގެ ވެހިކަލްތަކަށް ގެއްލުންވި.

- ބޯކޮށް ވާރޭވެހި ފ. ނިލަންދޫ އާއި ކ. ހިންމަފުށި، ކ. ގުރައިދޫގެ ގެތަކަށް ވެސް ފެންވަދެ ގެއްލުންވި.

- ށ. ނަރުދޫ އާއި ރ. އިނގުރައިދޫއަށް އުދަ އަރައި ގެއްލުންވި.