ބޮޑު ސަރަހައްދަކަށް މިރޭ ވެސް މޫސުން ގޯސް

ރާއްޖޭގެ ބޮޑު ސަރަހައްދަކަށް މިރޭ ވެސް މޫސުން ގޯސްވާނެ ކަމަށް މެޓް އޮފީހުން ލަފާކޮށްފި އެވެ.

މެޓް އޮފީހުން ބުނީ ރާއްޖޭގެ އެކި ހިސާބަށް ވިއްސާރަކުރާނެ ކަމަށާއި ބައެއް ރަށްތަކަށް ގުގުރުން އެކަށީގެންވާ ކަމަށެވެ.

އުތުރުގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު ހަތް މޭލާއި 17 މޭލާ ދެމެދުގެ ބާރުމިނުގައި ވައިޖެހޭ ކަމަށާއި އެހެން ހިސާބުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ވަނީ ލަފާކޮށްފަ އެވެ. އަދި ވިލާގަނޑުގައި ގަޑިއަކު 45 މޭލަށް ވައިގަދަވުން އެކަށީގެންވެ އެވެ.

މެޓް އޮފީހުން ބުނީ އުތުރު އަތޮޅުތަކުގެ ކަނޑުތައް އާދައިގެ ވަރަކަށް ގަދަވި ނަމަވެސް، އެހެން ހިސާބުތަކުގެ ކަނޑުތައް ގަދަވާނެ ކަމަށެވެ. އަދި ވިލާގަނޑުގައި ކަނޑުތައް އިތުރަށް ގަދަވުން އެކަށީގެންވާ ކަމަށް އެ އޮފީހުން ބުންޏެވެ.

އުތުރުގެ އަތޮޅުތަކަށް ރާޅުގެ އުސްމިން ހުންނާނީ ތިން ފޫޓާއި ހަ ފޫޓާ ދެމެދުގަ އެވެ. އަދި އެހެން ހިސާބުތަކަށް ރާޅުގެ އުސްމިން ހުންނާނީ ފަސް ފޫޓާއި ހަތް ފޫޓާ ދެމެދުގަ އެވެ.

"ހުރިހާ ފަރާތްތަކުން މޫސުމަށް ވަރަށް ބޮޑަށް ސަމާލުވުމަށް ދަންނަވަން. ދިޔަވަރު ބޮޑުވާ ގަޑިތަކުގައި ދެކުނާއި މެދު ރާއްޖެ ތެރޭގެ އަތޮޅުތަކަށް އުދައިގެ އަސަރުކުރުން އެކަށީގެންވޭ،" މެޓް އޮފީހުން ބުންޏެވެ.

ރާއްޖޭގެ ބޮޑު ސަރަހައްދަކަށް ރޭ ވެސް ވަރަށް މޫސުން ގޯހެވެ. ރޭ އެންމެ ގިނައިން ވާރޭވެހުނީ މާލެއަށެވެ. ރެއިން ފެށިގެން ހުއްޓުމެއް ނެތި މާލެއަށް ކުރި ވިއްސާރާގައި ފެންބޮޑުވެ، އާންމު ދިރިއުޅުމަށް ވެސް ބުރޫއެރި އެވެ. އަދި ބައެއް ގެތަކުން މީހުން ވަގުތީ ހިޔާތަކަށް ވެސް ބަދަލުކުރަން ޖެހުނެވެ.

މެޓް އޮފީހުގެ ތަފާސްހިސާބުތައް ދައްކާ ގޮތުގައި އިއްޔެ މާލެއަށް 136.5 މިލިމީޓަރުގެ ވާރޭވެހުނެވެ. އަދި މި ދުވަސްވަރު އެންމެ ގިނައިން ވިއްސާރަ ކުރަނީ އުތުރުގެ އަތޮޅުތަކަށް ކަން ވެސް މެޓް އޮފީހުގެ ތަފާސްހިސާބުތަކުން ދައްކަ އެވެ.

ރާއްޖެއަށް މިހާރު މި ކުރާ ވިއްސާރައަކީ މޫސުން ބަދަލުވާ ދުވަސްވަރާ ދިމާކޮށް މި ސަރަހައްދުގައި އުފެދިފައިވާ ދެ ކޮޅިގަނޑު ސަބަބުން ކުރާ އަސަރެވެ. މެޓް އޮފީހުން ލަފާކުރާ ގޮތުގައި، އަންނަ ހޯމަ ދުވަހުގެ ނިޔަލަށް ރާއްޖެއަށް މޫސުން ގޯސްވާނެ އެވެ.

އާންމު ގޮތެއްގައި މި ދުވަސްވަރަކީ ރާއްޖެއަށް ހުޅަނގު މޫސުން ނިމި، އިރުވައި މޫސުން ފެށުމުގެ އަސަރުތައް ފެންނަން ފަށާ ދުވަސްވަރެވެ. ނުވަތަ ދެ މޫސުން ބެދޭ ދުވަސްވަރެވެ. އިރުވައި މޫސުން ފަށަން ހަޅަޖަހަން ފަށާނީ މި މަހު ފަހުކޮޅު އެވެ.

ރާއްޖެއަށް އިރުވައި މޫސުން އާންމު ގޮތެއް ފެށެނީ ޖެނުއަރީގަ އެވެ.