މި ފަހަރު ރާއްޖެ އަށް އިރުވައި މޫސުން ފެށުނީ ލަހުން

އާންމުކޮށް އިރުވައި މޫސުން ފެށޭ ދުވަސްވަރަށް ވުރެ މާ ލަހުން އިއްޔެ ރާއްޖެއަށް އެ މޫސުން ފެށިއްޖެ އެވެ.

މެޓް އޮފީހުން މިއަދު ބުނީ މިދިޔަ އަހަރުގެ އިރުވައި މޫސުން ރާއްޖެ އަށް ފެށުނީ އިއްޔެ (ޖެނުއަރީ 2، 2025 ގައި) ކަމަށެވެ. އާންމުކޮށް އިރުވައި މޫސުން ފެށޭ ދުވަސްވަރަށް ވުރެ މި ފަހަރުގެ އިރުވައި މޫސުން ފެށުން ލަސްވި ކަމަށް އެ އޮފީހުން ވެސް ބުންޏެވެ.

އާންމުކޮށް ޑިސެމްބަރު މަސް ނިމުމުގެ ކުރިން ރާއްޖެ އަށް އިރުވައި މޫސުން ފެށެ އެވެ. ރާއްޖެ އަށް 2023 ވަނަ އަހަރު އިރުވައި މޫސުން ފެށުނީ ޑިސެމްބަރު 24 ގަ އެވެ. އަދި 2022 ވަނަ އަހަރު ޑިސެމްބަރު 31 ގަ އެވެ.

ރާއްޖެއަށް އިރުވައި މޫސުން ފެށުނު ކަމަށް މެޓް އޮފީހުން ނިންމަނީ ވައިގެ މިސްރާބު އިރުމަތިން ހުރެފައި، ގަޑިއަކު 10 ނޯޓިކަލް މޭލަށް ވުރެ ބާރުމިނުގައި ވައިޖެހުން އަދި އެ ހާލަތު ވިދިވިދިގެން ދެ ދުވަހަށް ނުވަތަ އިތުރަށް ދެމިގެން ދިއުމުންނެވެ.

ރާއްޖޭގައި އޮންނަ ދެ މޫސުމުގެ ތެރެއިން އިރުވައި މޫސުން އާންމުކޮށް ދެމިގެންދަނީ ޖެނުއަރީން ފެށިގެން މާޗު މަހުގެ ނިޔަލަށެވެ. ހުޅަނގު މޫސުން ދެމިގެންދަނީ މެއި މަހުން ފެށިގެން ނޮވެމްބަރު މަހުގެ ނިޔަލަށެވެ. އެޕްރީލް މަހާއި ޑިސެމްބަރު މަހަކީ މޫސުން ބަދަލުވާ ފަށާ ދުވަސްވަރެވެ.

އިރުވައި މޫސުން ފެށި، އޭގެ އަސަރުތައް އާންމު ގޮތެއްގައި ޑިސެމްބަރު މަހުގެ ދެވަނަ ނުވަތަ ތިންވަނަ ހަފުތާގައި، އުތުރާއި މެދުރާއްޖެތެރޭގެ އަތޮޅުތަކަށް ފަށަ އެވެ. ޖެނުއަރީ މަހު މުޅި ރާއްޖެއަށް އިރުވައި މޫސުން ފެށެ އެވެ.

ރާއްޖޭގެ ނަކަތް ކަލަންޑަރުގައިވާ ގޮތުގައި، މިއީ އިރުވައިގެ މޫސުމުގެ ދެވަނަ ނަކަތް ކަމަށްވާ ފުރަހަޅައިގެ 12 ވަނަ ދުވަހެވެ. މި ދުވަސްވަރު އިރު އުތުރުން ބާރަށް ވައިޖެހި، ކަނޑުތައް ގަދަވެ އެވެ. ފުރަހަޅަ ނިމި، އުތުރަހަޅަ ފަށާނީ އަންނަ ހޯމަ ދުވަހު އެވެ.

ދުނިޔޭގެ މޫސުމަށް އަންނަމުންދާ ބޮޑެތި ބަދަލުތަކާ އެކު، ދިވެހި ނަކަތާއި މޫސުން ދިމާ ނުވާ ފަހަރު މިހާރު ވަރަށް ގިނަ އެވެ. މި ފަހަރު ވެސް އެ ތަފާތު މި ފެންނަނީ އެވެ. އެހެންވެ، ހުޅަނގު މޫސުމާއި އިރުވައި މޫސުމުގެ ނަކަތްތައް ވެސް، ކުރީގެ ދުވަސްވަރާ ބަލާއިރު، ގިނަ ފަހަރަށް ދިމައެއް ނުވެ އެވެ.

މި ދުވަސްވަރު ރާއްޖޭގެ ބޮޑު ސަރަހައްދަށް ވަރަށް ބޮޑަށް މޫސުން ގޯހެވެ. މޫސުން ގޯސްވުމުގެ ސަބަބުން ބައެއް ރަށްރަށުގައި ފެންބޮޑުވުމާއި އުދައެރުމުގެ ހާދިސާތައް ވަނީ ހިނގައިފަ އެވެ. އަދި ދަތުރުފަތުރަށް ވެސް ވަނީ ބުރޫއަރައިފަ އެވެ.