ޓޫރިޒަމް އިޝްތިހާރު ކުރާ އުސޫލަށް ބޮޑު ބަދަލެއް: ޑޭޓާ އަށް ބަލައިގެން އިޝްތިހާރު ކުރަން ފަށަނީ

ރާއްޖޭގެ ޓޫރިޒަމް އިޝްތިހާރު ކުރުމަށް ގެންގުޅޭ އުސޫލު ބަދަލުކޮށް، ޑޭޓާ އަށް ބަރޯސާވެގެން އިޝްތިހާރު ކުރާނެ ގޮތްތައް ހޯދުމަށް ދާއިރާގެ އިސްވެރިން މިއަދު ފުރަތަމަ ފަހަރަށް ބައްދަލުކުރައްވަން ފައްޓަވައިފި އެވެ.

އިއްޔެ ފާހަގަކުރި ދުނިޔޭގެ ޓޫރިޒަމް ދުވަހާ ގުޅުވައިގެން ބާއްވާ "ޑެސްޓިނޭޝަން މާކެޓިން އެންޑް ޕްރޮމޯޝަން ކޮންފަރެންސް" ގައި ބައިވެރި ވަނީ ޓޫރިޒަމް އިޝްތިހާރު ކުރުމުގައި އުޅޭ ފަރާތްތަކާއި ރިސޯޓުތަކުގެ އިސްވެރިންނެވެ. މި ދާއިރާ އިން މިހާތަނަށް ބާއްވާ އެންމެ ބޮޑު ކޮންފަރެންސްގައި، ތަފާސްހިސާބުގެ މައްޗަށް ބިނާކޮށް ދިރާސާކޮށްގެން ޓޫރިޒަމް އިޝްތިހާރު ކުރުމާ ގުޅޭ ގޮތުން މަޝްވަރާ ކުރަން ވަނީ ހަމަޖައްސައިފަ އެވެ.

ދަރުބާރުގޭގައި ކުރިއަށް ގެންދާ ކޮންފަރެންސްގައި ބޭރުގެ ތަޖުރިބާކާރުން ވެސް ޕްރެޒެންޓޭޝަން ދެއްވަ އެވެ. އެ ގޮތުން، ޑޭޓާ އަށް ބިނާކޮށް ޓޫރިޒަމް އިޝްތިހާރު ކުރުމަށްޓަކައި ކުރެވިދާނެ ކަންކަމާ ގުޅޭ ގޮތުން އެމެރިކާގެ ޑޭޓާ އެނޭލިސިސް ކުންފުންޏެއް ކަމަށް ވާ ލެކްސިސްނެކްސިސްގެ ތޯމަސް ސްޓޮއިކަލް ވާހަކަ ދައްކަވާއިރު، ވައިގެ ދަތުރުފަތުރާ ގުޅޭ ޑޭޓާ އެއްކޮށް އެ އަށް ބަލައިގެން ޓޫރިޒަމް އިޝްތިހާރު ކުރުމާ ގުޅޭ ގޮތުން އޭވިއޭޝަން ދާއިރާގެ ޚަބަރުތައް ގެނެސްދޭ އެންމެ މަގުބޫލް ވެބްސައިޓު ކަމަށް ވާ ފްލައިޓު ގްލޯބަލްގެ ފަރާތުން މެޓް ކުލާކާއި ރިންޓާ މުއްކަމް ޕްރެޒެންޓޭޝަނެއް ދެއްވާނެ އެވެ. މީގެ އިތުރުން، ޓޫރިޒަމް ފެއާތަކުގައި ބައިވެރިވުމާ ގުޅޭ ގޮތުން ރީޑް ޓްރެވަލް އެގްޒިބިޝަންގެ ސައިމަން ޕްރެސް މައުލޫމާތު ދެއްވާނެ އެވެ.

މި ކޮންފަރެންސް ފެށުމުގެ ގޮތުން ޓޫރިޒަމް މިނިސްޓަރު މޫސާ ޒަމީރު ވިދާޅުވި ގޮތުގައި އެންމެ މަތީ ފަންތީގެ މަންޒިލެއްގެ ގޮތުގައި ދަމަހައްޓަން ރާއްޖެ އިޝްތިހާރު ކުރުމަށް މިހާރު ގެންގުޅޭ އުސޫލުތައް ބަދަލުކުރަން ޖެހެ އެވެ. ރާއްޖެ އަށް ޓޫރިޒަމް ތައާރަފް ކުރުމުގައި އެންމެ އިސް ދައުރެއް އަދާކުރެއްވި ބޭފުޅުން ތިއްބަވާ ލަފާ ދޭ ކޮމިޓީން ވެސް އެންމެ ބޮޑަށް ފާހަގޮށްފައި ވަނީ، އޭނާ ވިދާޅުވި ގޮތުގައި، އިޝްތިހާރު ކުރާ އުސޫލުތަކަށް ބަދަލު ގެނައުމެވެ.

އެހެންވެ، ޑޭޓާ އާއި ތަފާސްހިސާބުތަކުގެ މައްޗަށް ބިނާކޮށް ޓޫރިޒަމް އިޝްތިހާރު ކުރުމަށް ނިންމާފައިވާކަން މިނިސްޓަރު ޒަމީރު ހާމަކުރެއްވި އެވެ. އޭނާ ވިދާޅުވީ އަންނަ އަހަރު ޓޫރިޒަމް އިޝްތިހާރު ކުރާނީ އެ ގޮތަށް ކަމަށެވެ.

"އާ ވިސްނުންތައް ގެންގުޅެން އެބަޖެހޭ. ބަދަލުތައް ގެންނަން އެބަޖެހޭ. އެކަން ކުރެވޭނެ،" ރާއްޖޭގެ ޓޫރިޒަމް ސިނާއަތުގެ ބާނީން ކަމަށް ވާ ޔުނިވާސަލްގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) އާއި ޗަމްޕާ ހުސެން އަފީފް ފަދަ ބޭފުޅުން ވެސް ބައިވެރިވެވަޑައިގަންނާ ކޮންފަރެންސްގައި މިނިސްޓަރު ވިދާޅުވި އެވެ.

ޓޫރިޒަމް އިޝްތިހާރު ކުރުމަށް މިހާރު އާއްމުކޮށް ކުރާ ކަމަކީ އެކި ގައުމުތަކުގައި ބާއްވާ ފެއާތަކުގައި ބައިވެރިވުމާއި ރޯޑްޝޯތައް ބޭއްވުމެވެ. އަދި ބައެއް ޓީވީތަކުގައި އިޝްތިހާރު ދެއްކުން ފަދަ ކަންކަން ވެސް ކުރެ އެވެ. އެކަމަކު، ޑޭޓާ އާއި ތަފާސްހިސާބުތަކަށް ބަލައިގެން ޓޫރިޒަމް އިޝްތިހާރު ކުރަން އެންމެ އެދެވޭ މަސައްކަތްތަކެއް އަދި ކޮށްފައެއް ނުވެ އެވެ.

ޓޫރިޒަމް އިޝްތިހާރު ކުރުމާ ބެހޭ ފޯރަމެއް ބާއްވާއިރު، އިއްޔެ ވަނީ ޓޫރިޒަމް ތަރައްގީ ކުރުމާ ބެހޭ ކޮންފަރެންސެއް ވެސް ކުރިއަށް ގެންގޮސްފަ އެވެ. "ހައި ލެވެލް ޓޫރިޒަމް އިންޑަސްޓްރީ ފޯރަމް" ގެ ނަމުގައި ބޭއްވި އެ ބައްދަލުވުމުގައި ސަރުކާރުގެ ކަމާއި ބެހޭ އިސް ފަރާތްތަކާއި ޓޫރިޒަމް ދާއިރާގެ އިސް ބޭފުޅުން ބައިވެރިވެވަޑައިގެން، ޓޫރިޒަމް ސިނާއަތް އިތުރަށް ތަރައްގީކޮށް، ކުރިއަރުވަން ބޭނުންވާ ސިޔާސަތުތައް އެކުލަވައިލުމުގައި ހިޔާލު ހޯދާފައިވެ އެވެ.

ރާއްޖޭގެ ޓޫރިޒަމް އަޑިއަޅާލާފައި އޮތުމަށް ފަހު މިހާރު އަނެއްކާ ވެސް ވަނީ ރަނގަޅުވާން ފަށައިފަ އެވެ. އެކަމަކު، ރާއްޖެ އަށް އެންމެ ގިނައިން ޓޫރިސްޓުން އަންނަ ޗަައިނާ ފަދަ މުހިއްމު މާކެޓުތައް ދަށަށް ދިއުމުގެ ބިރު އެބައޮތެވެ.