ސްޓާ ވޯޒް ބޭނުންކޮށްގެން ރާއްޖެ އިޝްތިހާރުކޮށް، ސްޓޫޑިއޯ އައިލެންޑެއް ހެދުމަށް ވިސްނަނީ

ރާއްޖޭގައި ގިނަ މަންޒަރުތަކެއް ނަގާފައިވާ ސްޓާ ވޯޒްގެ އާ ފިލްމް ބޭނުންކޮށްގެން، ރާއްޖޭގެ ޓޫރިޒަމް އިޝްތިހާރު ކުރުމުގެ މަސައްކަތް ފަށާފައިވާ ކަމަށާއި ރާއްޖޭގައި ސްޓޫޑިއޯ އައިލެންޑެއް ތަރައްގީ ކުރުމުގެ ވިސްނުން ވެސް އެބަހުރި ކަމަށް ޓޫރިޒަމް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.

ގައުމީ އެއާލައިން، މޯލްޑިވިއަން އަށް އާ މަތިންދާބޯޓެއް ގެނައުން ފާހަގަކުރުމަށް އިބްރާހިން ނާސިރު އިންޓަނޭޝަނަލް އެއާޕޯޓް (އައިއެންއައިއޭ) ގައި ބޭއްވި ހަފްލާ އަށް ފަހު، މިނިސްޓަރު ވިދާޅުވީ ސްޓާ ވޯޒްގެ ފިލްމުގެ ސަބަބުން ރާއްޖޭގެ ޓޫރިޒަމް ޔޫރަޕްގައި ވަރަށް ބޮޑަށް މަޝްހޫރު ވާނެ ކަމަށެވެ. މި ފިލްމް ބޭނުންކޮށްގެން، ރާއްޖެ އިޝްތިހާރު ކުރުމުގެ މަސައްކަތް މޯލްޑިވްސް މާކެޓިން އެންޑް ޕީއާރް ކޯޕަރޭޝަން (އެމްއެމްޕީއާރްސީ) އިން މިހާރު ފަށާފައިވާ ކަމަށް އޭނާ ވިދާޅުވި އެވެ.

"ބައެއް ބްލޮގަރުން މެދުވެރިކޮށް ވެސް އަޅުގަނޑުމެން އެކަން އެބަކުރަން. މި ބަލަނީ ފިލްމުގައި ދައްކާ ލޮކޭޝަންތަކާއި އަދި މުޅި ރާއްޖެ ވެސް އިޝްތިހާރު ކުރުމުގެ މަސައްކަތްތަކެއް އެމްއެމްޕީއާރްސީން ކުރަމުން އެބަދޭ،" ޒަމީރު ވިދާޅުވި އެވެ.

އޭނާ ވިދާޅުވި ގޮތުގައި، ރާއްޖޭގައި ފިލްމުތައް ނެގުމަށް މަގުފަހިކޮށްދިނުމަށް ރާއްޖޭގައި ސްޓޫޑިއޯ އައިލެންޑެއް ގާއިމްކުުރުމުގެ ވިސްނުން ވެސް ސަރުކާރުން ވަރަށް ބޮޑަށް ގެންގުޅެ އެވެ. އަދި ބޮލީވުޑްގެ ބައެއް ފިލްމުތައް ރާއްޖޭގައި ނެގުމަށް ޕްރޮޑިއުސަރުންނާ ވާހަކަ ދައްކަމުން އަންނަ ކަމަށް މިނިސްޓަރު ވިދާޅުވި އެވެ. އެހެންކަމުން، އެކަންކަން ވީހާ ވެސް ފަސޭހައިން ރާއްޖޭގައި ކުރެވޭނެ އިންތިޒާމް ހަމަޖައްސައިދިނުމުގެ މަސައްކަތް ކުރަމުން އަންނަ ކަމަށް ވިދާޅުވި އެވެ.

"ރާއްޖޭގައި މިފަދަ ފިލްމުތައް ނެގުމަށް ވަރަށް ބޮޑަށް އަޅުގަނޑުމެން އެންކަރޭޖް ކުރާނަން. އަޅުގަނޑުމެން މި ބަލަނީ އެކަން ވީހާ ވެސް ފަސޭހަކޮށް ކުރެވޭނެ ގޮތެއް ހެދުމަށް،" ޒަމީރު ވިދާޅުވި އެވެ.

"ރޯގް ވަން: އަ ސްޓާ ވޯޒް ސްޓޯރީ" ދުނިޔޭގެ ސިނަމާތަކުގައި މިދިޔަ ބުދަ ދުވަހު ދައްކަން ފަށާފައިވެ އެވެ. ރާއްޖޭގައި މި ފިލްމް އިއްޔެ ވަނީ އަޅުވައިފަ އެވެ.

ރޯގް ވަންގެ މަންޒަރުތައް ނެގުމަށް ސްޓާ ވޯޒްގެ ކުރޫ މިދިޔަ އަހަރު ފަހުކޮޅު ރާއްޖޭގައި މަހެއްހާ ދުވަސް ހޭދަ ކުރި އެވެ. އެއީ 100 އަށް ވުރެ ގިނަ މީހުން ހިމެނޭ ބޮޑު ކުރޫ އެކެވެ. ދިވެހި ކުންފުންޏެއް ކަމަށްވާ ބްލޫ އެންޑް ވައިޓްއާ ގުޅިގެން ހެލިކޮޕްޓަރަކާއި އެ ނޫން ވެސް ބޮޑެތި އާލާތްތައް ގެނެސް، ލ. އަތޮޅު ފުރައިލި އެވެ. ބޮޑަށް ނެގީ ހަނގުރާމަ މަތީ މަންޒަރުތައް ކަމަށް ވާއިރު، ރާއްޖޭގެ ވިއްސަކަށް މިނިޓުގެ ފުޓޭޖް ފިލްމުގައި ހިމަނާފައިވެ އެވެ.

ރޯގު ވަން އަކީ ސްޓާ ވޯޒް ފިލްމް ސިލްސިލާގެ ނުވަ ވަނަ ފިލްމެވެ. އެކަމަކު، މިއީ މައި ސިލްސިލާއާ ވަކިން ނެރޭ ދެ ފިލްމު ހިމެނޭ "ސްޓާ ވޯޒް އެންތޮލޮޖީ"ގެ ފުރަތަމަ ފިލްމެވެ. މި ފިލްމުގެ ޕޯސްޓަރުތަކާއި ޓްރެއިލާ އިން ވެސް އެންމެ ބޮޑަށް ފާހަގަކުރެވެނީ ރާއްޖެ އަށް ވަރަށް ބޮޑަށް ފޯކަސް ކޮށްފައިވާ ކަމެވެ. ރާއްޖޭގެ ގުދުރަތީ ރީތިކަން ދައްކަން ކޮށްފައިވާ މަސައްކަތެވެ.

މި ފިލްމް މިހާރު އަޅުވާފައިވާ އިރު، ފިލްމަށް އެކި ފަރާތްތަކުގެ ތަރުހީބް ވަރަށް ބޮޑަށް އަންނަނީ ލިބެމުންނެވެ. ހާއްސަކޮށް ރާއްޖޭގެ މަންޒަރުތަކުން ފެންނަ ރީތިކަން ވަރަށް ގިނަ ބަޔަކު ފާހަގަކުރެ އެވެ.