ބަޣުދާދީގެ ބޮލަށް ހުށަހެޅި 25 މިލިއަން ޑޮލަރު ކާކަށް؟

ވޮޝިންޓަން (ނޮވެމްބަރު 1) - އިސްލާމިކް ސްޓޭޓް (އައިއެސް) ގެ ލީޑަރު އަބޫބަކްރު އަލް ބަޣުދާދީ އެންމެ ފަހުން ދިރިއުޅުނު ކަމްޕައުންޑަށް އެމެރިކާގެ ކޮމާންޑޯ އިން ވަދެފައި ވަނީ ކޮންމެވެސް ފަރާތުން ދިން ޖާސޫސީ މައުލޫމާތުގެ އަލީގަ އެވެ.

އެމެރިކާ އާއި މެދުއިރުމަތީގެ ބައެއް އޮފިޝަލުން ބުނެފައިވާ ގޮތުގައި ބަޣުދާދީއާ ބެހޭ ތަފްސީލް މައުލޫމާތު އެމެރިކާ އަށް ފޯރުކޮށްދީފައި ވަނީ ބަޣުދާދީއާ ވަރަށް ގާތްކޮށް އުޅުނު މީހެކެވެ. އޭނާ ވަނީ ބަޣުދާދީ ސީރިއާގައި ދިރިއުޅުނު ގެ އާއި ބަޣުދާދީ ދެން ބަދަލުވާން އިމާރާތް ކުރަމުން ދިޔަ ގޭގެ މައުލޫމާތު އެމެރިކާގެ ޖާސޫސީ އިދާރާއަށް ފޯރުކޮށްދީފަ އެވެ.

ބަޣުދާދީ ދިރިއުޅުނު ގޭގެ އެހާ ތަފްސީލް މައުލޫމާތު ލިބުމުން އެމެރިކާގެ ސްޕެޝަލް ފޯސަސްގެ ކޮމާންޑޯ އިން ވަނީ މިދިޔަ ހޮނިހިރު ދުވަހުގެ ރޭ އެ ގެއަށް ހަމަލާދީ ބަޣުދާދީގެ ކަންތައް ނިންމާލައިފަ އެވެ. ވަރުގަދަ ތަމްރީނުތަކެއް ހަދާފައިވާ އެމެރިކާ ސިފައިންގެ އެންގުމަށް އަމާން ނުދީ ބަޣުދާދީ ފިލަން ވަނީ އެ ގޭގެ ބިންގަރާސް މަގަށެވެ. އެކަމަކު އެ މަގުގެ ކޮޅު ބެދިފައިވާކަން ވެސް އެމެރިކާ ސިފައިންނަށް އެނގެ އެވެ. ބަޣުދާދީ އަށް ގޮތް ހުސްވުމުން އެމެރިކާ ސިފައިންގެ އަތުނުވަން އޭނާ ވަނީ ގައިގައި ހަރުކޮށްފައިވާ ގޮވާތަކެތި ގޮއްވާލައިގެން މަރުވެފަ އެވެ. ބަޣުދާދީއާ އެކު ވަނީ އޭނާގެ ދެ ދަރިން ވެސް މަރުވެފަ އެވެ.

ބަޣުދާދީގެ ގެއަށް އެމެރިކާ ސިފައިންގެ އެލީޓް ޑެލްޓާ ފޯހުން ހަމަލާ ދިން އިރު، ބަޣުދާދީއާ ގުޅޭ މައުލޫމާތު ދިން މީހާ އެ ސަރަހައްދުގައި ހުރި ކަމަށްވެ އެވެ. އޭނާ އާއި އޭނާގެ އާއިލާ އެ ސަރަހައްދުން ގެންދިޔައީ ހަމަލާ ދިންތާ ދެ ދުވަސް ފަހުން ކަމަށްވެ އެވެ. އެއީ ކޮންމެ ގައުމަކަށް ނިސްބަތްވާ މީހެއް ކަމެއް އެމެރިކާ އިން ހާމައެއް ނުކުރެ އެވެ. އެކަމަކު ބަޣުދާދީގެ ބޮލަށް އެމެރިކާ އިން ކަނޑައެޅި 25 މިލިއަން ޑޮލަރު އެ މީހާ އަށް ދޭނެ ކަމަށްވެ އެވެ.

ބައެއް ރިޕޯޓްތައް ބުނާ ގޮތުގައި އެ މީހަކީ ސުންނީ އަރަތްބެކެވެ. އޭނާ އައިއެސްއާ ދެކޮޅުވީ އޭނާގެ އާއިލާ އައިއެސްގެ ހަމަލާތަކުގައި މަރާލާފައިވާތީ ކަމަށް ވެސް ވެ އެވެ.

ކުރުދީ ޖަމާއަތް، ސީރިއަން ޑިމޮކްރެޓިކް ފޯސަސްގެ ލީޑަރު ޖެނެރަލް މަޒްލޫމް އަބްދީ އެންބީސީ އަށް ބުނެފައި ވަނީ ބަޣުދާދީއާ ބެހޭ މައުލޫމާތު އެމެރިކާ އަށް ފޯރުކޮށްދިނީ އެ ޖަމާއަތުގެ މީހެއް ކަމަށެވެ.

ބަޣުދާދީ އަކީ ޓެރަރިސްޓެއް ކަމަށް އެމެރިކާ އިން ކަނޑައެޅީ އޮކްޓޯބަރު 2011 ގަ އެވެ.